1 Hija r‑rieda tiegħi li l‑qaddej tiegħi Warren A. Cowdery jiġi maħtur u ordnat bħala qassis il‑kbir li jippresedi fuq il‑knisja tiegħi, fl‑art ta’ Freedom u fl‑inħawi tal‑madwar;

2 U huwa għandu jxandar l‑evanġelju ta’ dejjem tiegħi, u għandu jsemma’ leħnu u jwiddeb lin‑nies, mhux biss fl‑inħawi tiegħu iżda wkoll fil‑kontej tal‑madwar;

3 U għandu jiddedika ħinu kollu għal din is‑sejħa importanti u qaddisa, li qed insejjaħlu għaliha, u għandu jfittex bir‑reqqa s‑saltna tas‑smewwiet u s‑sewwa tagħha, u kull ħaġa meħtieġa tiġi miżjuda magħha; għax il‑ħaddiem ħaqqu ħlasu.

4 U għal darb’oħra, tassew ngħidilkom, il‑miġja tal‑Mulej tinsab fil‑qrib, u għad‑dinja se tiġi għal għarrieda bħal ħalliel billejl—

5 Għalhekk, ħażżmu ġenbejkom, biex intom tkunu ulied id‑dawl, u dak il‑jum ma jiġix fuqkom għal għarrieda bħal xi ħalliel.

6 U għal darb’oħra, tassew ngħidilkom, x’hena kien hemm fis‑smewwiet meta l‑qaddej tiegħi Warren issottometta ruħu għax‑xettru tiegħi, u tbiegħed mill‑falzità qarrieqa tal‑bnedmin;

7 Għalhekk, hieni hu l‑qaddej tiegħi Warren, għax miegħu se nuri ħniena; u, minkejja l‑frugħa ta’ qalbu, lilu jiena ngħolli ’l fuq jekk huwa jumilja ruħu quddiemi.

8 U lilu nagħtih il‑grazzja u l‑fiduċja biex jibqa’ sħiħ; u jekk huwa jibqa’ fidil fix‑xhieda tiegħu u jibqa’ jkun dawl għall‑knisja, jiena ħejjejt għalih kuruna fil‑postijiet li hemm fid‑dar ta’ Missieri. Hekk għandu jkun. Ammen.