Sezzjoni 57
Rivelazzjoni mogħtija permezz ta’ Joseph Smith il-Profeta, f’Sijon, fil-Kontea ta’ Jackson, nhar l-20 ta’ Lulju, 1831. Biex ikunu ubbidjenti lejn l-ordni tal-Mulej li jerħulha lejn Missouri “l-art ta’ wirtkom” (sezzjoni 52), il-presbiteri telqu minn Ohio u rħewlha lejn il-fruntiera tal-punent ta’ Missouri. Joseph Smith beda jikkontempla dwar l-istat li kienu jinsabu fih il-Lamaniti u staqsa lilu nnifsu: “Id-deżert meta se jiffjorixxi bħall-ward? Sijon meta sejra titwaqqaf fil-glorja kollha tagħha, u fejn sejjer jinbena t-tempju tiegħek, li lejh il-ġnus kollha għad jiġru fl-aħħar żminijiet?” Wara huwa rċieva din ir-rivelazzjoni.
1–3, Independence, Missouri, huwa l-post magħżul għall-Belt ta’ Sijon u għat-tempju; 4–7, Il-Qaddisin għandhom jixtru artijiet biex jingħataw lilhom f’dawk l-inħawi; 8–16, Sidney Gilbert għandu jiftaħ ħanut, William W. Phelps għandu jkun stampatur, u Oliver Cowdery għandu jedittja l-materjal għall-pubblikazzjoni.
1 Agħtu widen, O presbiteri tal-knisja tiegħi, jgħid il-Mulej Alla tagħkom, li nġbartu flimkien, skont il-kmandamenti tiegħi, f’din l-art, li hija l-art ta’ Missouri, li hija l-art li jiena għażilt u kkonsagrajt għall-ġabra tal-qaddisin.
2 Għalhekk, din hija l-art imwiegħda, u l-post magħżul għall-belt ta’ Sijon.
3 U dan jgħid il-Mulej Alla tagħkom, jekk intom lesti li tiksbu l-għerf, hawn qiegħed l-għerf. Araw, il-post li bħalissa jismu Independence huwa l-qalba tal-post; u l-post għat-tempju jinsab fin-naħa tal-punent, fuq biċċa art li mhijiex ’il bogħod wisq mill-bini tal-qorti.
4 Għalhekk, ikun għaqli li l-qaddisin jixtru din l-art, u kull biċċa art oħra li tinsab fin-naħa tal-punent, sewwasew sal-fruntiera li tgħaddi eżatt minn bejn il-Lhud u l-Ġentili;
5 Kif ukoll kull biċċa art li tinsab mal-konfini tal-prateriji, sewwasew kull biċċa art li d-dixxipli tiegħi kapaċi jixtru. Araw, ikun għaqli li huma jiksbuha biex tkun tagħhom għal dejjem.
6 U jeħtieġ li l-qaddej tiegħi Sidney Gilbert iwettaq dmiru fl-uffiċċju li jiena ħtartu għalih, u jeħtieġ li huwa jaċċetta għandu l-flus, u jagħmilha ta’ aġent f’isem il-knisja, u jixtri artijiet fl-inħawi kollha tal-madwar, dejjem jekk dan isir b’mod ġust, u kif jitlob l-għaqal.
7 U jeħtieġ li l-qaddej tiegħi Edward Partridge iwettaq dmiru fl-uffiċċju li jiena ħtartu għalih, u lill-qaddisin għandu jagħtihom sehemhom, kif jien ordnajtlu jagħmel; u l-istess għandhom jagħmlu dawk li jiena ħtart biex jassistuh.
8 U għal darb’oħra, tassew ngħidilkom, jeħtieġ li l-qaddej tiegħi Sidney Gilbert irabbi għeruqu f’dan il-post, u huwa għandu jiftaħ ħanut, fejn ikun jista’ jbiegħ affarijiet mingħajr frodi, biex huwa jkun jista’ jkollu l-flus biex jixtri artijiet għall-benefiċċju tal-qaddisin, u biex jikseb dak kollu li d-dixxipli jeħtieġu biex huma jkunu jistgħu jrabbu għeruqhom fl-art ta’ wirthom.
9 U jeħtieġ ukoll li l-qaddej tiegħi Sidney Gilbert jingħata liċenzja—araw, hawn qiegħed l-għerf, u ħa jifhem min jaqra—biex huwa jkun jista’ jibgħat l-affarijiet lin-nies, sewwasew permezz ta’ dawk li huwa jagħżel bħala skrivani biex jassistuh;
10 U b’hekk huwa jipprovdi dak li l-qaddisin tiegħi jeħtieġu, sabiex l-evanġelju tiegħi jkun jista’ jiġi mxandar lil dawk li jinsabu fid-dlam u fl-art u d-dell tal-mewt.
11 U għal darb’oħra, tassew ngħidilkom, jeħtieġ li l-qaddej tiegħi William W. Phelps irabbi għeruqu f’dan il-post, u jistabbilixxi lilu nnifsu bħala stampatur għall-knisja.
12 U araw, jekk id-dinja taċċetta kitbietu—araw hawn qiegħed l-għerf—jeħtieġ li huwa jingħata dak kollu li jista’ jingħata b’mod ġust, għall-benefiċċju tal-qaddisin.
13 U jeħtieġ li l-qaddej tiegħi Oliver Cowdery jassistih, sewwasew kif ordnajtlu jagħmel jien, f’kull post li jiena nordnalu jagħmel dan, billi jikkopja, jikkoreġi, u jagħżel il-kitbiet, ħalli kollox isir b’mod xieraq f’għajnejja, kif jindika l-Ispirtu permezz tiegħu.
14 U jeħtieġ li dawk li jiena tkellimt dwarhom irabbu għeruqhom fl-art ta’ Sijon, fl-anqas ħin possibbli, flimkien mal-familji tagħhom, biex huma jwettqu dak kollu li jiena tkellimt dwaru.
15 U issa fejn tidħol il-ġabra—Jeħtieġ li l-isqof u l-aġent jibdew iħejju għal dawk il-familji li jiena ordnatilhom biex jiġu f’din l-art, kemm jista’ jkun malajr, u jeħtieġ li huma jrabbu l-għeruq tagħhom fl-art ta’ wirthom.
16 U dwar il-kumplament tal-presbiteri u l-membri, se nagħtikom aktar informazzjoni aktar tard. Hekk għandu jkun. Ammen.