Sezzjoni 23
Sensiela ta’ ħames rivelazzjonijiet mogħtija permezz ta’ Joseph Smith il‑Profeta, ġewwa Manchester, New York, f’April, 1830, lil Oliver Cowdery, Hyrum Smith, Samuel H. Smith, Joseph Smith Sr., u Joseph Knight Sr. B’riżultat tax‑xewqa ħerqana li kellhom il‑ħames persuni msemmija biex ikunu jafu x’inhuma d‑dmirijiet rispettivi tagħhom, il‑Profeta talab lill‑Mulej u huwa rċieva rivelazzjoni għal kull wieħed minnhom.
1–7, Dawn id‑dixxipli tal‑ewwel żminijiet ġew imsejħa sabiex ixandru l‑kelma, iħeġġu, u jsaħħu l‑Knisja.
1 Ara, jien se ngħid xi ħaġa żgħira lilek, Oliver. Ara, hieni int, u inti m’int taħt l‑ebda kundanna. Iżda oqgħod attent mill‑kburija, biex ma tidħolx fit‑tiġrib.
2 Għarraf bis‑sejħa tiegħek lill‑knisja, kif ukoll lid‑dinja, u qalbek tkun lesta biex ixxandar il‑verità minn issa u għal dejjem. Ammen.
3 Ara, jien se ngħid xi ħaġa żgħira lilek, Hyrum; għax inti wkoll m’int taħt l‑ebda kundanna, u qalbek tinsab lesta, u lsienek nħall; u s‑sejħa tiegħek hi li inti l‑ħin kollu għandek tħeġġeġ, u ssaħħaħ il‑knisja. Għalhekk id‑dmir tiegħek hu lejn il‑knisja għal dejjem, u dan minħabba familtek. Ammen.
4 Ara, jien se ngħid xi ħaġa żgħira lilek, Samuel; għax inti wkoll m’int taħt l‑ebda kundanna, u s‑sejħa tiegħek hi li tħeġġeġ u ssaħħaħ il‑knisja; u inti għadek ma ġejtx imsejjaħ biex ixxandar il‑kelma lid‑dinja. Ammen.
5 Ara, jien se ngħid xi ħaġa żgħira lilek, Joseph; għax inti wkoll m’int taħt l‑ebda kundanna, u s‑sejħa tiegħek hi li tħeġġeġ u ssaħħaħ il‑knisja; u dan huwa d‑dmir tiegħek minn issa u għal dejjem. Ammen.
6 Ara, permezz ta’ dan il‑kliem jiena se nurik, Joseph Knight, li inti għandek terfa’ salibek, billi titlob b’fommok quddiem id‑dinja u bil‑moħbi, u fil‑familja tiegħek, u fost sħabek, u f’kull post.
7 U, ara, huwa d‑dmir tiegħek li inti tingħaqad mal‑vera Knisja, u li inti tħeġġeġ bla heda lil ħaddieħor, ħalli inti tkun tista’ tikseb ħlas il‑ħaddiem. Ammen.