Sezzjoni 55
Rivelazzjoni mogħtija permezz ta’ Joseph Smith il-Profeta lil William W. Phelps, f’Kirtland, Ohio, nhar l-4 ta’ Ġunju, 1831. William W. Phelps, stampatur, u l-familja tiegħu kienu għadhom kif waslu ġewwa Kirtland, u l-Profeta talab lill-Mulej biex isir jaf ċerta informazzjoni dwaru.
1–3, William W. Phelps jiġi msejjaħ u magħżul sabiex jitgħammed, jiġi ordnat presbiteru, u jxandar l-evanġelju; 4, Huwa għandu wkoll jikteb kotba għat-tfal li jattendu l-iskejjel tal-Knisja; 5–6, Huwa għandu jerħilha lejn Missouri, il-post fejn se jwettaq il-ħidma tiegħu.
1 Ara, dan jgħidlek il-Mulej, O qaddej tiegħi William, iva, sewwasew Sid l-art kollha, inti ġejt imsejjaħ u magħżul; u wara li inti tiġi mgħammed bl-ilma, jekk tagħmel dan b’ħarstek iffukata fuq il-glorja tiegħi, inti tikseb maħfra ta’ dnubietek u l-għotja tal-Ispirtu s-Santu permezz tat-tqegħid tal-idejn;
2 Imbagħad inti tiġi ordnat permezz ta’ id il-qaddej tiegħi Joseph Smith, Jun., biex tkun presbiteru għal dil-knisja, biex inti xxandar l-indiema u l-maħfra tad-dnubiet, permezz tal-magħmudija, f’isem Ġesù Kristu, Bin Alla l-ħaj.
3 U dawk kollha li inti tqiegħed idejk fuqhom, jekk huma jindmu quddiemi, inti jkollok il-qawwa li tagħtihom l-Ispirtu s-Santu.
4 U inti tiġi ordnat ukoll sabiex tassisti lill-qaddej tiegħi Oliver Cowdery fil-ħidma tal-istampar, u fl-għażla u l-kitba ta’ kotba għall-iskejjel ta’ dil-knisja, biex it-tfal ċkejknin ikunu jistgħu jirċievu wkoll it-tagħlim li jogħġob lili.
5 U għal darb’oħra, tassew ngħidlek, li għal dan il-għan inti għandek titlaq flimkien mal-qaddejja tiegħi Joseph Smith, Jun., u Sidney Rigdon, sabiex inti tkun tista’ trabbi l-għeruq fl-art ta’ wirtek ħalli fiha twettaq din il-ħidma.
6 U jeħtieġ li l-qaddej tiegħi Joseph Coe jitlaq magħhom ukoll. Aktar tard se niżvelalek il-kumplament, skont ir-rieda tiegħi. Ammen.