1 Thiab nim no tau muaj tias thaum Amas tab tom taug kev ntawm thaj av Nkide-oos mus lawm sab nram hav, mus rau thaj av Meethais, saib seb, nws ntsib Mauxiyas cov tub tab tom taug kev mus rau tom thaj av Xalahelas, uas ua rau nws xav tsis thoob.

2 Nim no Mauxiyas cov tub no yog cov uas nrog Amas ua ke thaum tus tim tswv tshwm sim los rau nws thawj zaug; yog li ntawd Amas xyiv fab heev uas nws tau ntsib nws cov kwv tij, thiab qhov uas ua rau nws xyiv fab ntxiv tuaj, lawv tseem yog nws cov kwv tij uas ntseeg tus Tswv; muaj tseeb tiag, thiab lawv txoj kev paub txog qhov tseeb twb muaj zog zuj zus tuaj lawm; vim lawv yog neeg txawj to taub zoo thiab lawv tau rau siab ntso tshawb xyuas cov vaj lug kub, xwv kom lawv yuav paub Vajtswv txoj lus.

3 Tiam sis tsis tas li no xwb; lawv tau rau siab thov Vajtswv thiab yoo mov heev; yog li ntawd lawv tau lub txiaj ntsim qhia tau tej yuav muaj los yav tom ntej, thiab lub txiaj ntsim txais tau kev tshwm sim, thiab thaum lawv qhia, lawv qhia nrog Vajtswv lub hwj chim thiab txoj cai.

4 Thiab lawv qhia Vajtswv txoj lus tau kaum plaub xyoos nyob hauv cov Neeg Lamas, thiab lawv vam meej heev uas lawv coj tau coob leej los paub qhov tseeb; muaj tseeb tiag, los ntawm lub hwj chim ntawm lawv tej lus, lawv coj tau coob leej los rau ntawm Vajtswv lub thaj, los hu txog nws lub npe thiab lees lawv tej kev txhaum rau nws.

5 Nim no tej no yog tej uas lawv raug nyob hauv lawv tej kev mus ncig, vim lawv tau muaj kev txom nyem ntau; lawv tau raug kev txom nyem ntau, ntawm cev nqaij daim tawv thiab hauv lub siab, xws li kev tshaib, kev nqhis thiab kev lim, thiab kev ua hauj lwm ntau ntawm sab ntsuj plig.

6 Nim no tej no yog lawv tej kev mus ncig: Tom qab lawv ncaim lawv txiv, Mauxiyas, nyob hauv thawj xyoo ntawm cov neeg txiav txim; tom qab lawv tsis kam kav teb chaws raws li lawv txiv xav kom lawv kav, thiab cov neeg los kuj xav li no thiab;

7 Txawm li ntawd los lawv tau ncaim ntawm thaj av Xalahelas mus, thiab nqa lawv tej ntaj, thiab lawv tej hmuv, thiab lawv tej hneev, thiab lawv tej xub, thiab lawv tej hlua fiav; thiab lawv tau ua li no xwv kom lawv yuav nrhiav tau nqaij rau lawv tus kheej thaum nyob tom hav zoov.

8 Thiab xws li no lawv tau ncaim mus rau tom hav zoov nrog cov neeg uas lawv tau xaiv, mus rau pem thaj av Nifais, mus tshaj tawm Vajtswv txoj lus rau cov Neeg Lamas.

9 Thiab tau muaj tias lawv ncig mus tau ntau hnub nyob hauv hav zoov, thiab lawv yoo mov heev thiab thov Vajtswv heev xwv kom tus Tswv yuav pub rau lawv ib feem ntawm nws tus Ntsuj Plig nrog lawv mus, thiab nrog lawv nyob, xwv kom lawv yuav ua tau zoo li ib rab cuab yeej nyob hauv Vajtswv txhais tes mus coj lawv cov kwv tij, cov Neeg Lamas, yog hais tias ua tau, kom los paub qhov tseeb, kom los paub txoj kev phem ntawm lawv cov yawg koob tej kab lis kev cai, uas yuam kev.

10 Thiab tau muaj tias tus Tswv tau los xyuas lawv nrog nws tus Ntsuj Plig, thiab hais rau lawv tias: Cia li txais kev nplij siab. Thiab lawv twb txais kev nplij siab lawm.

11 Thiab tus Tswv kuj hais rau lawv tias: Cia li mus rau hauv cov Neeg Lamas, uas yog nej cov kwv tij, thiab txhim tsa kuv txoj lus; tiam sis nej yuav tsum ua siab ntev nyiaj thaum raug kev txom nyem, xwv kom nej yuav ua tau yam ntxwv zoo rau lawv pom uas yog los ntawm kuv, thiab kuv yuav muab nej los ua ib rab cuab yeej nyob hauv kuv txhais tes kom coob leej txais tau txoj kev cawm seej.

12 Thiab tau muaj tias Mauxiyas cov tub lub siab, thiab cov uas nrog lawv lub siab, muaj zog tuaj tawm mus rau cov Neeg Lamas mus qhia Vajtswv txoj lus rau lawv.

13 Thiab tau muaj tias thaum lawv mus txog hauv tej ciam teb ntawm cov Neeg Lamas thaj av, lawv tau sib faib thiab ib leeg tau ncaim ib leeg, ntseeg tus Tswv tias lawv yuav sib ntsib dua thaum kawg ntawm lawv txoj kev sau qoob loo; vim lawv xav tias txoj hauj lwm uas lawv lav ris tseem ceeb heev.

14 Thiab yeej tseem ceeb heev tiag, vim lawv tau lav ris txoj hauj lwm mus tshaj tawm Vajtswv txoj lus rau ib co neeg qus, thiab tawv thiab nyaum; ib co neeg uas nyiam tua cov Neeg Nifais, thiab nyiag lawv tug thiab tua txeeb lawv tej khoom; thiab lawv tso siab rau tej kev nplua nuj, los sis rau kub, thiab nyiaj dawb, thiab tej pob zeb uas muaj nqis; txawm li ntawd los lawv nrhiav kev tua neeg thiab khuj rau lwm tus kom lawv tau tej yam no, xwv kom lawv txhob siv lawv txhais tes los khwv rau tej yam no.

15 Yog li ntawd lawv yog ib co neeg tub nkeeg heev, lawv coob leej teev tiam mlom, thiab Vajtswv txoj kev foom tsis zoo tau poob los rau lawv vim yog lawv cov yawg koob tej kab lis kev cai; txawm li ntawd los tus Tswv tseem muab nws tej lus cog tseg cev rau lawv yog hais tias lawv hloov siab lees txim.

16 Yog li ntawd, yog vim qhov no es Mauxiyas cov tub thiaj tau lav ris ua txoj hauj lwm no, xwv kom tej zaum lawv yuav coj tau cov Neeg Lamas los rau txoj kev hloov siab lees txim; xwv kom tej zaum lawv yuav coj tau cov Neeg Lamas los paub txog txoj hau kev txhiv dim.

17 Yog li ntawd lawv thiaj sib faib ib leeg ncaim ib leeg, thiab tawm mus rau hauv cov Neeg Lamas, nyias mus nyias, raws li Vajtswv txoj lus thiab lub hwj chim uas tau muab rau nws.

18 Nim no Amoos yog tus thawj nyob hauv lawv, los sis hais tias nws muab kev txhawb pab rau lawv, thiab nws tau ncaim ntawm lawv mus, tom qab nws foom koob hmoov rau lawv raws li lawv tej yam hauj lwm, tom qab nws faib Vajtswv txoj lus rau lawv, los sis foom koob hmoov rau lawv ua ntej nws ncaim mus; thiab xws li no lawv nyias ncaim mus nyias thoob plaws rau hauv thaj av.

19 Thiab Amoos mus rau tom thaj av Ixama-ees, thaj av uas yog muab hu raws li Ixama-ees cov tub, cov uas kuj los ua cov Neeg Lamas.

20 Thiab thaum Amoos nkag mus rau hauv thaj av Ixama-ees, cov Neeg Lamas txhom nws thiab muab nws khi, vim lawv yeej khi txhua tus Neeg Nifais uas poob mus rau hauv lawv tes, thiab cab lawv mus rau tus vaj ntxwv; thiab xws li no cia rau tus vaj ntxwv txiav txim saib puas muab lawv tua, los sis cia lawv poob cev qhev, los sis muab lawv tso rau hauv tsev kaw, los sis muab lawv ntiab tawm ntawm nws thaj av, raws li nws siab xav thiab siab nyiam.

21 Thiab xws li no lawv cab Amoos mus rau tus vaj ntxwv tus uas kav thaj av Ixama-ees; thiab nws lub npe hu ua Lamaunais; thiab nws yog Ixama-ees ib tug xeeb ntxwv.

22 Thiab tus vaj ntxwv nug Amoos saib puas yog nws xav nyob hauv thaj av nrog cov Neeg Lamas, los sis nrog nws cov neeg.

23 Thiab Amoos hais rau nws tias: Muaj tseeb tiag, kuv xav nyob nrog cov neeg no ib ntus; muaj tseeb tiag, thiab tej zaum mus txog hnub kuv tuag.

24 Thiab tau muaj tias vaj ntxwv Lamaunais zoo siab heev rau Amoos, thiab hais kom daws nws tej hlua; thiab nws xav kom Amoos yuav nws ib tug ntxhais ua poj niam.

25 Tiam sis Amoos hais rau nws tias: Tsis yuav, tiam sis kuv yuav ua koj tus tub qhe. Yog li ntawd Amoos los ua ib tug tub qhe rau vaj ntxwv Lamaunais. Thiab tau muaj tias vaj ntxwv Lamaunais cia Amoos nrog lwm cov tub qhe mus zov nws cov yaj, raws li cov Neeg Lamas txoj kev cai.

26 Thiab tom qab nws ua hauj lwm rau tus vaj ntxwv tau peb hnub, thaum nws tab tom tawm mus nrog lwm cov tub qhe Neeg Lamas coj lawv cov yaj mus rau qhov chaw uas muaj dej, uas yog hu ua lub qhov dej Xinpus, thiab tag nrho cov Neeg Lamas coj lawv cov yaj tuaj rau qhov chaw no, xwv kom lawv cov yaj yuav tau dej—

27 Yog li ntawd, thaum Amoos thiab tus vaj ntxwv cov tub qhe tab tom tav lawv cov yaj tuaj rau qhov chaw uas muaj dej no, saib seb, muaj ib pab Neeg Lamas, uas tau coj lawv cov yaj tuaj haus dej, sawv thiab ua rau Amoos thiab tus vaj ntxwv cov tub qhe cov yaj tawg khiav, ua rau cov yaj khiav mus rau txhua txhia txoj kev.

28 Nim no tus vaj ntxwv cov tub qhe pib yws yws, hais tias: Nim no tus vaj ntxwv yuav muab peb tua, ib yam li nws tau tua peb cov kwv tij vim yog cov neeg no txoj kev phem tau ua rau lawv cov yaj tawg khiav. Thiab lawv pib quaj heev kawg li, hais tias: Saib seb, twb ua rau peb cov yaj tawg khiav tas lawm.

29 Nim no lawv quaj vim yog txoj kev ntshai tsam lawv yuav raug muab tua. Nim no thaum Amoos pom qhov no ua rau nws lub siab xyiv fab puv npo; vim, nws hais tias, kuv yuav ua rau kuv cov phooj ywg tub qhe no pom kuv lub hwj chim, los sis lub hwj chim uas nyob hauv kuv, kom coj cov yaj no rov qab los rau tus vaj ntxwv, xwv kom kuv yuav yeej tau kuv cov phooj ywg tub qhe no lub siab, xwv kom kuv yuav coj tau lawv los ntseeg kuv tej lus.

30 Thiab nim no, tej no yog cov uas Amoos tau xav, thaum nws pom tej kev txom nyem ntawm cov uas nws hu ua nws cov kwv tij.

31 Thiab tau muaj tias nws hais nws cov lus txhawb lawv siab, hais tias: Kuv cov kwv tij, cia li zoo siab thiab cia peb mus nrhiav cov yaj, thiab peb yuav sau lawv los ua ke thiab coj lawv rov qab los rau ntawm qhov chaw uas muaj dej; thiab xws li no peb yuav ceev tau cov yaj rau tus vaj ntxwv thiab nws yuav tsis muab peb tua.

32 Thiab tau muaj tias lawv mus nrhiav cov yaj, thiab lawv tau lawv Amoos qab, thiab lawv maj nrawm nroos kawg nkaus li thiab caum tau tus vaj ntxwv cov yaj, thiab coj lawv rov qab los ua ke rau ntawm qhov chaw uas muaj dej.

33 Thiab cov neeg ntawd rov qab sawv ua rau lawv cov yaj tawg khiav dua; tiam sis Amoos hais rau nws cov kwv tij tias: Cia li ua voj voog ib ncig cov yaj kom lawv tsis txhob khiav; thiab kuv mam mus thiab sib tawm tsam nrog cov neeg no uas pheej ua rau peb cov yaj tawg khiav.

34 Yog li ntawd, lawv thiaj ua ib yam li Amoos txib lawv, thiab nws tau mus thiab sawv kom tawm tsam cov uas sawv ntawm cov dej Xinpus; thiab tsis yog lawv muaj neeg tsawg xwb.

35 Yog li ntawd lawv tsis ntshai Amoos, vim lawv xav tias ib tug ntawm lawv cov neeg xwb yeej muaj cuab kav tua tau nws raws li lawv siab nyiam, vim lawv tsis paub tias tus Tswv twb cog lus rau Mauxiyas tias nws yuav cawm nws cov tub dim tawm ntawm lawv tes; thiab lawv twb tsis paub ib yam dab tsi txog tus Tswv li; yog li ntawd lawv zoo siab thaum lawv cov kwv tij raug puas tsuaj; thiab vim yog qhov no lawv thiaj sawv thiab ua rau tus vaj ntxwv cov yaj tawg khiav.

36 Tiam sis Amoos sawv mus thiab pib siv nws txoj hlua fiav txawb pob zeb mus rau lawv; muaj tseeb tiag, nws siv zog heev txawb pob zeb mus rau lawv; thiab xws li no nws tua tau lawv ib txhia ua rau lawv pib xav tsis thoob rau nws lub zog; txawm li ntawd los lawv npau taws vim Amoos tua lawv cov kwv tij, thiab lawv xav ua kom nws vau; yog li ntawd, vim lawv pom tias lawv txawb lawv tej pob zeb tuaj tsis raug nws, lawv thiaj nqa qws tuaj tua nws.

37 Tiam sis saib seb, txhua tus neeg uas tsa nws rab qws los ntaus Amoos, nws xuas nws rab ntaj txiav pov tseg lawv tej caj npab; vim nws tiv tau lawv tej qws ntaus los ntawm nws xuas hniav ntaj txiav lawv txhais caj npab, ua rau lawv pib xav tsis thoob, thiab pib khiav ntawm nws mus; muaj tseeb tiag, thiab lawv tsis yog tsawg; thiab nws ua rau lawv khiav los ntawm lub zog ntawm nws txhais npab.

38 Nim no rau leej ntawm lawv cov neeg tau vau los ntawm txoj hlua fiav, tiam sis nws tsis tau xuas ntaj tua ib tug twg li tsuas yog lawv tus thawj xwb; thiab nws tau txiav pov tseg ntau sab caj npab npaum li uas tau tsa tuaj tawm tsam nws, thiab tsis yog muaj lawv caj npab tsawg xwb.

39 Thiab thaum nws tau raws lawv khiav mus deb lawm, nws rov qab los thiab lawv ywg dej rau lawv cov yaj thiab rov qab tav lawv mus rau tom tus vaj ntxwv thaj zaub, thiab tom qab ntawd nkag mus cuag tus vaj ntxwv, thiab lawv nqa cov caj npab uas Amoos rab ntaj tau txiav pov tseg, los ntawm cov uas nrhiav kev muab nws tua; thiab lawv nqa cov caj npab ntawd mus ua tim khawv rau tus vaj ntxwv txog tej uas lawv tau ua.