1 Faalogo mai ia, outou e tagata o la’u ekalesia, o e ua tuu atu i ai le malo; ia outou faalogo mai ia ma uai mai o outou taliga ia te ia o lē na faataotoina le faavae o le lalolagi, o lē na faia le lagi ma ona ’au uma, ma o lē na faia mea uma e ola, ma gaoioi, ma i ai.

2 Ma Ou te toe fai atu, faalogo mai ia i lo’u leo, ne’i manumalo le oti ia te outou; i se itula tou te lē manatunatu ai o le a mavae atu ai le taumafanafana, ma uma ai le seleselega, ma lē faaolaina ai o outou agaga.

3 Faalogo ia ia te ia o lē o le fautua i le Tamā, o lē o loo augani lo outou faamoemoe i ona luma—

4 Ua fetalai atu: Le Tamā e, faauta i mafatiaga ma le oti o lē na lē faia e ia se agasala, o lē na e fiafia tele i ai; faauta i le toto o lou Atalii na faamaligiina, le toto o ia o lē na e tuu atu ina ia faamamaluina oe;

5 O le mea lea, le Tamā e, ia faasaoina i latou nei o o’u uso o e ua talitonu i lo’u igoa, ina ia mafai ona latou o mai ia te a’u ma maua le ola tumau e faavavau.

6 Faalogo mai ia, outou e tagata o la’u ekalesia, ma faalogo faatasi mai outou toeaina, ma faalogo mai i lo’u leo a’o valaau atu i le aso, ma aua le faamaaaina o outou loto;

7 Aua e moni Ou te fai atu ia te outou, o A’u o le Alefa ma le Omeka, o le amataga ma le gataaga, o le malamalama ma le ola o le lalolagi—o se malamalama ua susulu i le pouliuli ma ua lē malamalama i ai le pouliuli.

8 Na Ou sau i lo’u lava nuu, ma sa lē talia a’u e lo’u lava nuu; ae o le toatele o i latou o e na talia a’u na Ou tuu atu i ai le mana latou te faia ai vavega e tele, ma avea ai ma atalii o le Atua; ma o i latou na talitonu i lo’u igoa na Ou tuu atu lava i ai le mana latou te maua ai le ola e faavavau.

9 Ma ua faapea lava ona Ou auina atu o la’u feagaiga e faavavau i le lalolagi, e avea o se malamalama i le lalolagi, ma avea o se tagavai mo lo’u nuu, ma Nuuese ia saili i ai, ma avea o se avefeau i luma o o’u mata e sauni le ala i o’u luma.

10 O le mea lea, ia outou o mai i ai, ma o le a Ou filifili faatasi ma ia o lē e sau e pei ona Ou faia ma tagata i aso anamua, ma o le a Ou faaali atu ia te outou le malosi o lo’u manatu.

11 O le mea lea, ia outou faalogo mai faatasi ma tuu mai ia te a’u e faailoa atu ia te outou lo’u poto lava—o le poto lea o ia o lē ua outou fai mai o le Atua o Enoka, ma ona uso,

12 O e na vavae ese mai le lalolagi, ma na Ou talia mo a’u lava—o se aai ua faasaoina seia oo mai se aso o le amiotonu—o se aso lea sa saili i ai tagata paia uma, ma sa latou lē mauaina ona o le amioleaga ma mea inosia;

13 Ma latou fai mai ai o i latou o ni tagata ese ma e ua aumau i luga o le lalolagi;

14 Peitai sa latou maua se folafolaga o le a latou mauaina ma vaai i ai i o latou tino.

15 O le mea lea, faalogo mai ma o le a Ou talatala faatasi ma outou, ma o le a Ou tautala atu ia te outou ma vavalo atu, e pei ona faia i tagata i aso anamua.

16 Ma o le a Ou faaalia manino atu e pei ona sa Ou faaalia atu i o’u soo a’o Ou tulai i o latou luma i le tino, ma tautala atu ia te i latou, ua fai atu: Ona ua outou ole mai ia te a’u e uiga i faailoga o lo’u sau, i le aso pe a Ou alu atu i lo’u mamalu i ao o le lagi, e faataunuu ai folafolaga na Ou faia i o outou tamā,

17 Aua e pei ona outou vaai i le umi o le o ese o o outou agaga mai i o outou tino o se nofopologa, o le a Ou faaali atu ai ia te outou le ala o le a oo mai ai le aso o le togiolaina, ma le toefuataiga foi o Isaraelu ua faataapeapeina.

18 Ma o lenei, ua outou vaai i lenei malumalu ua i Ierusalema, lea ua outou ta’ua o le maota o le Atua, ma ua fai mai o outou fili o le a lē pa’ū lava lenei fale.

19 Ae, e moni Ou te fai atu ia te outou, o le a oo mai faatafunaga i luga o lenei tupulaga e pei o se gaoi i le po, ma o le a faaumatia lenei nuu ma faataapeapeina i totonu o atunuu uma.

20 Ma o lenei malumalu ua outou vaai atu nei i ai o le a soloia i lalo o le a lē tuua se tasi maa e taatia i luga o se isi maa.

21 Ma o le a oo mai, o le a lē mavae atu lenei tupulaga o tagata Iutaia seia faataunuuina faatafunaga uma na Ou fai atu ai ia te outou e faatatau ia te i latou.

22 Ua outou fai mai ua outou iloa o le a oo mai le iuga o le lalolagi; ua outou fai mai foi ua outou iloa o le a mavae atu le lagi ma le lalolagi;

23 Ma i lenei mea, ua moni la outou upu, ona ua faapea lava; ae o nei mea ua Ou ta’u atu ia te outou o le a lē mavae atu seia faataunuuina mea uma.

24 Ma ua Ou ta’u atu ia te outou lenei mea e faatatau ia Ierusalema; ma a oo mai lena aso, o le a faataapeapeina se vaega o totoe i atunuu uma;

25 Peitai o le a toe faapotopoto mai i latou; ae o le a latou nonofo pea seia faataunuuina aso o Nuuese.

26 Ma i lena aso o le a faalogoina ai taua ma tala o taua, ma o le a vāvāō le lalolagi atoa, ma o le a faavaivaia loto o tagata, ma o le a latou fai mai ua tolopo e Keriso lona afio mai seia oo i le iuga o le lalolagi.

27 Ma o le a faasolo maluluina le alofa o tagata, ma o le a faateteleina le amioletonu.

28 Ma a oo mai taimi o Nuuese, o le a susulu atu se malamalama i totonu o i latou o e o nonofo i le pouliuli, ma o le atoatoaga lea o la’u talalelei;

29 Peitai latou te lē taliaina; ona latou te lē iloaina le malamalama, ma ua latou liliu ese o latou loto mai ia te a’u ona o mataupu a tagata.

30 Ma o le tupulaga lena o le a faataunuuina ai taimi o Nuuese.

31 Ma o le a i ai ni tagata e tutulai i lena tupulaga o le a lē mavae atu seia latou vaai i se faasalaga tele naua; ona o le a ufitia le laueleele i se faamai faatafunaina.

32 Ae o o’u soo o le a tutulai i nofoaga paia, ma o le a lē masii lava; ae i totonu o e e amioleaga, o le a siitia a’e i luga e tagata o latou leo ma upuleaga le Atua ma feoti ai.

33 Ma o le a i ai foi mafuie i nofoaga eseese, ma faatafunaga e tele; peitai o le a faamaaa e tagata o latou loto faasaga mai ia te a’u, ma o le a latou siia’e i luga le pelu, o le tasi e faasaga i le isi, ma o le a latou fasioti o le tasi i le isi.

34 Ma o lenei, ina ua tautala atu e A’u o le Alii nei upu i o’u soo, sa latou atuatuvale.

35 Ma sa Ou fai atu ia te i latou: Aua tou te atuatuvale, aua, a faataunuuina nei mea uma, o le a mafai ona outou iloa o le a faataunuuina folafolaga na fai atu ia te outou.

36 Ma a amata ona susulu atu o le malamalama, o le a i ai faatasi ma i latou e pei o se faataoto o le a Ou faaali atu ia te outou—

37 Tou te vaai ma iloa atu laau o mati, ma e tou te vaai atu ia te i latou i o outou mata, ma tou fai ane pe a amata ona latou totogo a’e, ma a’o mu’amu’a pea o latou lau, ua lata mai nei le tau mafanafana;

38 O le a faapea lava ona i ai i lena aso pe a latou vaai i nei mea uma, ona latou iloa ai lea ua lata mai le itula.

39 Ma o le a oo mai o le a tulimatai i luma o ia o lē e mata’u ia te a’u mo le oo mai o le aso tele o le Alii, e oo lava i faailoga o le afio mai o le Atalii o le Tagata.

40 Ma o le a latou vaai i faailoga ma mea e ofo ai, ona o le a faaalia i latou i le lagi i luga, ma i le lalolagi o i lalo.

41 Ma o le a latou vaaia le toto, ma le afi, ma le puao o le asu.

42 Ma ae lei oo mai le aso o le Alii, o le a faapouliuligia le la, ma gasetoto le masina, ma o le a pa’u’ū ifo fetu mai le lagi.

43 Ma o le a faapotopoto mai le vaega o totoe i lenei nofoaga;

44 Ma ona latou vaavaai lea mo a’u, ma, faauta, o le a Ou sau; ma o le a latou vaaia a’u i ao o le lagi, ua faaofuina i le mana ma le mamalu tele; faatasi ma agelu paia uma; ma o ia o lē e lē vaavaai mo a’u o le a vavae ese.

45 Peitai ae lei pa’ū mai le aao o le Alii, o le a ilia e se agelu lana pu, ma o le a tutulai mai le au paia o e na momoe e faafetaiai a’u i le ao.

46 O le mea lea, afai na outou momoe i le filemu, amuia outou; ona e pei ona outou vaai mai nei ia te a’u ma iloa ua Ou i ai, o le a faapea lava ona outou o mai ia te a’u ma ola ai o outou agaga, ma o le a faaatoatoaina lo outou togiolaina; ma o le a o mai le au paia mai i itu e fa o le lalolagi.

47 Ona pa’ū mai ai lea o le aao o le Alii i luga o atunuu.

48 Ma ona afio a’e lea o le Alii i luga o le mauga lenei, ma o le a vaeluaina, ma o le a gatete le lalolagi, ma malualua solo, ma o le a luluina foi le lagi.

49 Ma o le a tulei mai e le Alii lona siufofoga, ma o le a lagona e tuluiga uma o le lalolagi; ma o le a laue faavauvau atunuu uma o le lalolagi, ma o i latou o e na toē o le a vaai i lo latou valea.

50 Ma o le a ufitia i mala lē e tauemu, ma o lē e ’amu’amu o le a faaumatia; ma o i latou o e na vaavaai mo le amioletonu o le a taia i lalo ma lafo i le afi.

51 Ma ona vaai mai ai lea o tagata Iutaia i luga ia te a’u ma fai mai: O a ia manua ua i ou lima ma ou vae?

52 Ona latou iloa lea o A’u o le Alii; ona o le a Ou fai atu ia te i latou: O nei manua, o manua ia na Ou manua ai i le fale o a’u uo. O A’u o lē na siitia a’e i luga. O A’u o Iesu o lē na faasatauroina. O A’u o le Atalii o le Atua.

53 Ma ona latou fetagisi ai lea ona o a latou amioletonu; ona latou tagiauē ai lea ona ua latou sauaina lo latou tupu.

54 Ma ona togiolaina ai lea o atunuu faapaupau, ma o i latou o e sa latou lē iloa se tulafono o le a i ai sa latou vaega i le uluai toetutu; ma o le a gafatia e i latou.

55 Ma o le a noatia Satani, o le a lē maua ai e ia se nofoaga i totonu o loto o le fanauga a tagata.

56 Ma i lena aso, pe a Ou alu atu i lo’u mamalu, o le a faataunuu ai le faataoto na Ou tautala atu ai e faatatau i taupou e toasefulu.

57 Aua o i latou o e e popoto ma ua latou talia le upumoni, ma ua latou ave le Agaga Paia mo o latou taiala, ma sa lei faaseseina—e moni Ou te fai atu ia te outou, o le a lē taia i latou ma lafo i le afi, ae o le a latou gafatia le aso.

58 Ma o le a tuu atu ia te i latou le lalolagi e fai mo so latou tofi; ma o le a latou uluuluola ma faasolo malolosi, ma o le a tutupu a’e i le olataga a latou fanau e aunoa ma le agasala.

59 Ona o le a i ai le Alii i lo latou lotolotoi, ma o le a i ai lona mamalu i luga o i latou, ma o le a avea o ia ma o latou tupu ma o latou faitulafono.

60 Ma o lenei, faauta, Ou te fai atu ia te outou, o le a lē tuu atu ia te outou ia outou iloa atili ni isi mea e faatatau i lenei mataupu, seia faaliliuina le Feagaiga Fou, ma o ona totonu o le a faailoa atu ai ia mea uma;

61 O le mea lea Ou te tuu atu ia te oe ia mafai nei ona e faaliliuina, ina ia mafai ona outou saunia mo mea o le a oo mai.

62 Aua e moni Ou te fai atu ia te outou, e i ai mea sili o loo faatali mai mo outou;

63 Ua outou faalogo i taua i laueleele ese; ae, faauta, Ou te fai atu ia te outou, ua lata mai i latou, ua i o outou faitotoa lava, ma e lē tele ni tausaga mai le taimi nei ae o le a outou faalogo i taua i o outou lava laueleele.

64 O le mea lea o A’u, o le Alii, na Ou fai atu ai, ia outou faapotopoto i fafo mai itu- laueleele i sasae, ia outou faapotopoto faatasi outou lava o toeaina o la’u ekalesia; ia outou o atu i itu-laueleele i sisifo, valaau atu i e o nonofo ai ia salamo, ma e tusa ai ma lo latou salamo, ia atia’e ai i luga aulotu ia te a’u.

65 Ma ia faaputuputu faatasi a outou oa ma le loto e tasi ma le mafaufau e tasi, ina ia mafai ona outou faatauina se tofi o le a tuu atu ia te outou pe a mavae le taimi nei.

66 Ma o le a ta’ua o le Ierusalema Fou, o se laueleele o le filemu, o se aai o le sulufaiga, o se nofoaga o le saogalemu mo le au paia a le Atua Silisili Ese;

67 Ma o le a i ai iina le mamalu o le Alii, ma o le i ai iina le mata’u o le Alii, e oo ina lē o mai i ai o e amioleaga, ma o le a ta’ua o Siona.

68 Ma o le a oo mai i e e amioleaga, o tagata taitoatasi e lē siia’e lana pelu e faasaga i lē la te tuaoi, e ao ina sola i Siona mo le saogalemu.

69 Ma o iina o le a faapotopoto i ai tagata mai fafo o atunuu uma i lalo o le lagi; ma o le a nao le pau ia o tagata o le a lē tau le tasi ma le isi.

70 Ma o le a faapea ane i totonu o e e amioleaga: Aua tatou te o a’e i luga e tau faasaga ia Siona, ona ua matua matautia lava tagata o Siona; o le mea lea e lē mafai ai ona tatou tutu.

71 Ma o le a oo mai o le a faapotopoto mai e e amiotonu mai atunuu uma, ma o le a o mai i Siona, ma pepese i pese o le olioli e tumau e faavavau.

72 Ma o lenei Ou te fai atu ia te outou, ia taofi nei mea mai le oo atu i le lautele o le lalolagi seia oo ina tatau ai ia te a’u, ina ia mafai ona outou faataunuuina lenei galuega i luma o mata o tagata, ma i luma o mata o o outou fili, ina ia latou lē iloa a outou galuega seia outou faataunuuina le mea ua Ou poloaiina ai outou;

73 Ona a oo ina latou iloaina, ia mafai ona latou manatunatu i nei mea.

74 Ona a afio mai le Alii o le a matautia tele o ia ia te i latou, ina ia maua i latou i le mata’u, ma o le a latou tutulai mamao ese ma gatete.

75 Ma o le a matata’u atunuu uma ona o le matautia o le Alii, ma le mana o lona malosi. E faapea lava. Amene.