Tusitusiga Paia
Mataupu Faavae ma Feagaiga 123
Mea e Sii mai
Tusi Atoa (PDF)
Vaefaamatalaga

Hide Footnotes

Autu

Vaega 123

O le tiute o le Au Paia e faatatau i e faasauā mai i te i latou, e pei ona tuuina mai e Iosefa Samita le Perofeta, aʼo avea ma pagota i le falepuipui i Lipereti, Misuri, Mati 1839 (History of the Church, 3:302–303).

1–6, E tatau i le Au Paia ona faaputuputu ma lomia faasalalau se tala o o latou mafatiaga ma sauaga; 7–10, O le agaga lava lea e tasi na faatuina talitonuga pepelo ua afua mai ai foi sauaga o le Au Paia; 11–17, E toatele o loo i totonu o lotu uma o le a talia le upumoni.

1 O Lenei foi, matou te fautua atu mo lo outou manatunatu i ai, le tatau i le au paia uma ona faaputuputu o se malamalama e uiga i mea moni uma, ma mafatiaga ma sese na faia ia i latou e tagata o le Setete lenei;

2 Ma meatotino uma foi ma le aofai o faatamaʼiga na latou mafatia ai, i le loto atoa ma manuʼa faaletagata lava ia, faapea foi ma meatotino moni;

3 Ma igoa foi o tagata uma na i ai se lima i o latou sauaga, seʼi oo ina mafai ona latou maua ai i latou ma iloa ai i latou.

4 Ma atonu e mafai ona tofia se komiti e sailia ia mea, ma maua mai faamatalaga ma tautinoga tusitusia; ma faaputuputu mai foi lomiga taufaaleaga pepelo ua feaveaʼi;

5 Ma mea uma o i ai i mekasini, ma tusi o auiliiliga moni, ma talafaasolopito taufaaleaga pepelo uma ua lomia, ma o loo tusia, ma o ai foi na tusia, ma tuu atu se faasologa atoa o faiga faatiapolo ma faamalosiga amioleaga ma fasioti tagata na faia i luga o lenei nuu—

6 Ina ia lē gata ina tatou faasalalau atu i le lalolagi atoa, ae tuu atu i latou i ao o le malo i lo latou pouliuli atoa ma lanu seoli, o se taumafaiga mulimuli ua faatonuina ai i tatou e lo tatou Tamā Faalelagi, ae lei mafai ona tatou maua uma ma atoatoa o lena folafolaga lea o le a valaauina ai o ia mai lona aafioaga lafi; ma ina ia tuua le atunuu atoa e aunoa ma se ʼalofaga ae lei auina mai e ia le mana o lona aao malosi.

7 O se tiute lē maʼalofia ua tatou nofo aitalafu ai i le Atua, i agelu, o e o le a aumai i tatou tatou te tutu faatasi, ma ia i tatou foi, ia tatou avā ma fanau, o e ua faia ia ifo i lalo i le faavauvau, faanoanoa, ma le atuatuvale, i lalo o le lima e sili ona tausalaina o le fasioti tagata, pule malosi, ma le faasauā, ua lagolago ma uunaia ma sapasapaia e uunaiga a lena agaga lea na tuʼifaomauina taofi o tamā, o e ua fai mo latou tofi le pepelo, i loto o fanau, ma faatumuina le lalolagi i le fenumiaʼi, ma ua tupu malosi pea lava, ma ua avea nei ma puna-autu o mea eleelea uma, ma ua ōi le alalolagi atoa i lalo o le mamafa o lona amioletonu.

8 O se aamo uʼamea, o se maea malosi; o taofi-lima lava ia, ma filifili, ma tauvae, ma nonoa o seoli.

9 O lea o se tiute lē maʼalofia ua tatou aitalafu ai, e lē nao ia tatou lava avā ma fanau, ae i fafine foi ua oti a latou tane ma e ua aunoa ma tamā, o e o a latou tane ma tamā na afasiotia i lalo o lona lima uʼamea;

10 O galuega pouliuli ma pogisa ia ua lava ona tetete ai o seoli lava ia, ma tu faateʼia ma sesega ai, ma galulu ma faamaʼitete ai lima o le tiapolo lava ia.

11 Ma o se tiute lē maʼalofia foi ua tatou aitalafu ai i tupulaga fanaʼe uma, ma i e uma ua loto mamā—

12 Aua o loo i ai nei tagata e toatele i luga o le lalolagi i totonu o lotu uma, vaega, ma tapuaiga, o e ua afaatauasoina i le taufaasese poto o tagata, lea ua latou taooto faapupuna ai e faasese, ma o e ua nao na taofia mai le upumoni ona ua latou lē eiloa le mea e maua ai—

13 O lea, e tatau ona tatou faamaʼumau ai ma faaaoga ia uma o tatou olaga i le aumaia i le malamalama o amea natia uma a le pogisa, i mea ua tatou iloa ai; ma ua faaalia moni mai i latou mai le lagi—

14 Ona o lea e tatau ai ona faasaga atu i le faia o ia mea ma le filiga tele.

15 Ia lē tuu atu i se tagata ia manatu i ia mea o ni mea faatauvaa; aua e tele mea o i lumanai, e faatatau i le au paia, ua faalagolago i luga o ia mea.

16 Ua outou silafia, uso e, e aaoga tele i se vaa tele se foeuli laitiiti i le taimi o se afa, e taofiofi faasagatonu ai i le matagi ma galu.

17 O lea, le au uso pele e, ia tatou faia ai ma le afiafia mea uma ua i ai i lo tatou mana; ona mafai lea ona tatou tutu, ma le mautinoa atoatoa, e vaai i le efaaolataga a le Atua, ma mo lona aao e faaali mai.