Tusitusiga Paia
Mataupu Faavae ma Feagaiga 134


Vaega 134

O se folasaga lautele o talitonuga e faatatau i malo ma tulafono, na talia i se palota autasi i se faapotopotoga aoao a le Ekalesia sa faia i Katelani, Ohaio, i le aso 17 o Aokuso, 1835. E toatele le Au Paia na faapotopoto faatasi e iloilo mea na faatutu mai e tuu i totonu o le lomiga muamua o le Mataupu Faavae ma Feagaiga. I le taimi lena, sa tuuina i lenei folasaga uputomua nei: “Ina ia lē faaliliuseseina pe malamalama sese o tatou talitonuga lautele e faatatau i malo ma tulafono faalelalolagi, ua matou manatu ai e tatau ona tuuina atu, i le faaiuga o lenei tusi, lo matou manatu e faatatau i ia lava mea.”

1–4, E tatau i malo ona puipui le saolotoga o le lotofuatiaifo ma tapuaiga; 5–8, E tatau i tagata uma lava ona lagolago o latou malo ma e tatau ona faaaloalo ma faamamalu i le tulafono; 9–10, E lē tatau i faalapotopotoga faalelotu ona faaaoga ni pule faalemalo; 11–12, E tauamiotonuina tagata i le puipuiga o i latou lava ma a latou meatotino.

1 Matou te talitonu sa faatutuina e le Atua amalo mo le lelei o tagata; ma ua tuu e ia e etali tagata mo a latou mea e fai e faatatau i malo, i le faia o tulafono ma lo latou faatinoga, mo le lelei ma le saogalemu o tagata.

2 Matou te talitonu e leai se malo e mafai ona ola i le fīlemu, vagana ua faia ma faamalosia ituaiga tulafono e mautinoa ai le maua e tagata taitoatasi o le faaaoga asaoloto o le elotofuatiaifo, le aiā ma le pulea o meatotino, ma le ipuipuiga o le ola.

3 Matou te talitonu e tatau ona manaomia e malo uma ni a‘au mautofi ma ni taitai faalemalo e faamalosia tulafono o ia malo; ma e tatau ona sailia ma lagolagoina i le leo o le nuu ituaiga o tagata o le a faatinoina le tulafono, i le tutusa ma le faamasinotonu pe afai o se malo faitele, e sailia ai ma lagolagoina e le leo o tagata, po o le finagalo o le tupu.

4 Matou te talitonu na faatutuina e le Atua mea tau lotu; ma e tali atu tagata ia te ia, ma na’o ia lava, mo lona faaaogaina, vagana ai ua uunaia i latou e o latou manatu faalelotu e faalavelave i aiā ma saolotoga o isi; ae ua matou lē talitonu ua i ai i tulafono faaletagata se aiā e faalavelave ai i le faia o tulafono afaaletapuaiga e saisaitia ai le lotofuatiaifo o tagata, pe faatonu ai ala e fai ai tapuaiga faitele pe faaletagata lava ia; ma e faapea e tatau i le taitai faalemalo ona taofi le solitulafono, ae lē pulea le lotofuatiaifo; e tatau ona faasala le tausalaina, ae lē taofia le saolotoga o le agaga.

5 Matou te talitonu ua fusia tagata uma e lagolago ma talisapaia malo eseese ua latou nonofo ai, a’o puipuia i tulafono a ia malo ia latou aiā na soifua mai ma i latou ma lē ma’aveeseina; ma o le faatuiese ma le afouvale e lē tatau ai i tagatanuu taitoatasi ua faapea ona puipuia ai, ma e tatau ona faasalaina e pei ona tatau ai; ma e faapea ua i ai i malo uma se aiā e faia ai ituaiga o tulafono ua tusa ai ma a latou lava faautaga silisili ona lelei e mautinoa ai le manuia o tagata lautele; e ui i lea, e faamamaluina pea i lea lava taimi e tasi, le saolotoga o le mafaufau fetalai.

6 Matou te talitonu e tatau ona faamamaluina tagata uma taitoatasi i lona lava tulaga, e pei o pule ma faipule, ua faatutuina mo le puipuiga o e ua lē sala ma le faasalaina o e ua sala; ma e faapea e tatau i tagata uma ona ava ma faaaloalo i atulafono, aua a aunoa ma ia tulafono o le a suia le filemu ma le lotogatasi i le pule faamalosi ma le mata’u; ona ua faatutuina tulafono faaletagata mo le faamoemoe tonu o le faafoeina o o tatou faamoemoega o ni tagata taitoatasi ma atunuu, i le va o le tagata ma le tagata; ma ua tuu mai tulafono paia mai le lagi, ua tuu mai ai tulafono e faatatau i atugaluga faaleagaga, mo le faatuatua ma le tapua’i, o ni mea uma e tali atu ai le tagata i Lē na faia o ia.

7 Matou te talitonu ua i ai i pule, setete, ma malo se aiā, ma ua fusia e faia ni tulafono mo le puipuiga o tagatanuu uma i le faaaogaina saoloto o o latou talitonuga faalelotu; ae ua matou lē talitonu ua i ai ia te i latou se aiā faamasinotonu e aveesea ai mai tagatanuu lenei aiā, pe faasa i latou mai o latou manatu, pe a faapea o loo faaalia le ava ma le migao i tulafono ma e lē o ta’uamiotonuina i ia manatu faalelotu le faatuiese po o le fouvale.

8 Matou te talitonu e tatau ona afaasalaina le solia o le tulafono e tusa ma le uiga o le solitulafono; ma e faapea o le fasioti tagata, faalata malo, faomea, gaoi, ma le lepeti o le filemu lautele, i itu uma, e tatau ona faasalaina e tusa ma lo latou ituaiga ma lo latou uiga leaga i tagata, i tulafono a lena malo na faia ai le solitulafono; ma e tatau i tagata uma ona laa i luma ma faaaoga lo latou malosi i le aumaia i le faasalaga e ua solitulafono e faasaga i tulafono lelei, mo le filemu ma le to’a o tagata lautele.

9 Matou te lē talitonu o se mea tonu le tuufaatasi o aafiaga faalelotu ma malo faaleatunuu, lea e lagolago ai le tasi faapotopotoga faalelotu ae faasa le isi i ana aiā faaleagaga, ma faafitia ai aiā faaletagata lava ia a ona tagata, o ni tagatanuu.

10 Matou te talitonu ua i ai i faalapotopotoga faalelotu uma se aiā e faia ai i o latou lava tagata mo amioga ua lē tatau, e tusa ma tulafono ma faatonuga a ia lava faalapotopotoga; pe a faapea o ia mea e faia mo le faaaumeaina ma le tulaga lelei; ae matou te lē talitonu ua i ai i se faalapotopotoga faalelotu se pule e faamasino ai tagata e uiga i meatotino po o le ola, e aveese ai mai ia te i latou oloa o le lalolagi lenei, pe tuu lamatia ai o latou ola po o tino, pe faaoo atu ai ni faasalaga faaletino i luga o i latou. Pau le mea e mafai ona latou faia o le afaate’a o i latou mai i la latou faalapotopotoga, ma aveese la latou faaaumea mai ia te i latou.

11 Matou te talitonu e tatau i tagata ona tagi atu i le tulafono faalemalo mo le toe totogi mai o sese ma tiga uma, i mea na faia ai le sauā i le tagata pe na solia ai le aiā i meatotino po o le ta’uleleia, i mea ua i ai ituaiga tulafono e puipui ai ia aiā; ae matou te talitonu e ta’uamiotonuina tagata uma i le puipuiga o i latou lava, a latou uo, ma meatotino, ma le malo, mai osofaiga ma soliga lē tusa ai ma le tulafono a tagata uma i taimi o faalavelave faafuasei, i tulaga e lē mafai ona fai vave atu ai se tagi i le tulafono, ma lē maua ai se fesoasoani.

12 Matou te talitonu o se mea tonu le atalai atu o le talalelei i atunuu uma o le lalolagi, ma lapatai atu i e amiotonu e lavea’i i latou lava mai mea eleelea o le lalolagi; ae matou te lē talitonu o se mea sa’o le faalavelave fua atu i auauna-pologa, pe talai atu i ai le talalelei, pe papatisoina i latou e lē tusa ai ma le finagalo malie ma le manao i ai o o latou matai, pe faalavelave i ai pe uunai i latou i sina mea itiiti e faaoso ai i latou ia lē fiafia i o latou tulaga i le olaga nei, ma faapea ona faamata’uina ai ola o tagata; o ia faalavefau matou te talitonu ua lē tusa ai ma le tulafono ma ua lē tonu, ma e lamatia ai le filemu o malo uma e faatagaina le taofi o tagata i le pologa.