Tusitusiga Paia
Mataupu Faavae ma Feagaiga 69


Vaega 69

Faaaliga na tuuina mai e ala mai ia Iosefa Samita le Perofeta, i Hairama, Ohaio, i le aso 11 o Novema, 1831. O le tuufaatasiga o faaaliga na faamoemoe e vave lomia na pasia i se konafesi faapitoa o Novema 1–2. I a Novema 3, na faaopoopo ai le faaaliga ua tusia iinei o le vaega 133, na taua mulimuli ane o le Faaopoopoga, sa faaopoopoina. Sa muai tofiaina Oliva Kaotui na te ave i Initipene, Misuri, kopi tusilima o faaaliga ma poloaiga na tuufaatasi, mo le lomiga. Sa tatau foi ia te ia ona ave faatasi ma ia tupe na foai mai mo le atiinaeina o le Ekalesia i Misuri. O le faaaliga lenei ua faatonuina ai Ioane Uitimera e malaga faatasi ma Oliva Kaotui ma sa faatonuina ai foi Uitimera ia malaga atu ma aoina mai mea tautalafaasolopito i lona tofiga o se tusitalafaasolopito ma tusitalafaamaumau a le Ekalesia.

1–2, O Ioane Uitimera ia malaga faatasi ma Oliva Kaotui i Misuri; 3–8, Ia talai atu foi o ia ma ao mai, talafaamaumau, ma tusi faamatalaga o talafaasolopito.

1 Faalogo mai ia te a’u, ua fetalai mai ai le Alii lo outou Atua, mo le lelei o la’u auauna o aOliva Kaotui. Ua lē o se mea poto ia te a’u le tatau ona faatuatua atu ia te ia o poloaiga ma tupe o le a alu o ia ma ave i le laueleele o Siona, vagana ai ua o faatasi ma se tasi o se o le a faamaoni ma faatuatuaina.

2 O le mea lea, ua loto ai A’u, o le Alii, e tatau ona o o la’u auauna, o aIoane Uitimera, faatasi ma la’u auauna o Oliva Kaotui;

3 O lenei foi ia faaauau pea e ia ona tusitusi ma faia se atalafaasolopito o mea tāua uma o le a ia vaaia ma iloaina e uiga i la’u ekalesia;

4 O lenei foi ina ia maua e ia afautuaga ma le fesoasoani mai la’u auauna o Oliva Kaotui ma isi.

5 O lenei foi, e tatau i a’u auauna o e o loo i fafo i le lalolagi ona auina atu tala o a latou amatafaioi i le laueleele o Siona;

6 Aua o le laueleele o Siona o le a avea ma laumua ma nofoaga e talia ma fai ai nei mea uma.

7 Ae ui i lea, ia tuu atu i la’u auauna o Ioane Uitimera e malaga i le tele o taimi mai lea nofoaga i lea nofoaga, ma mai lea aulotu i lea aulotu, ina ia faigofie ia te ia ona maua le poto—

8 Ma talai ma faamalamalama atu, tusitusi, kopi, filifili, ma maua mai mea uma o le a avea mo le lelei o le ekalesia, mo tupulaga fai a’e o le a tutupu mai i luga o le laueleele o aSiona, ia latou mauaina mai lea tupulaga i lea tupulaga, e faavavau ma faavavau lava. Amene.