O Le
Mataupu Faavae ma Feagaiga

1 Faalogo maia, E outou e tagata o la’u ekalesia, ua fetalai mai ai le siufofoga o ia o lē o afio i luga, ma o lē o ona fofoga ua i luga o tagata uma; ioe, e moni Ou te fai atu: Faalogo mai ia outou e tagata mai mea mamao; ma outou o loo i luga o motu o le sami, faafofoga mai faatasi.

2 Aua e moni o le siufofoga o le Alii ua mo tagata uma, ma e leai se tasi e sao mai ai; ma e leai se mata o le a lē vaai, po o se taliga o le a lē faalogo, po o se loto o le a lē tuia.

3 Ma o e e fouvale o le a tuia i le faanoanoa tele; ona o le a alagaina a latou amioletonu i luga o tumutumu o fale, ma o le a faaalia a latou galuega lilo.

4 Ma o le leo o le lapataiga ua mo tagata uma, e ala atu i fofoga o o’u soo, o e ua Ou filifilia i aso nei e gata ai.

5 Ma o le a latou o atu ma e leai se tasi o le a taofia i latou, ona o A’u o le Alii ua poloaiina i latou.

6 Faauta, o la’u pule lenei, ma le pule a a’u auauna, ma la’u uputomua i le tusi o a’u poloaiga, ua Ou tuu atu ia te i latou e faasalalau atu ia te outou, E, outou e o nonofo i le lalolagi.

7 O le mea lea, ia matatau ai ma gatete, E, outou tagata e, ona o mea ua folafola ai i totonu o i latou e A’u o le Alii o le a faataunuuina.

8 Ma e moni Ou te fai atu ia te outou, o i latou o e e o atu, ma tau atu nei tala i e o nonofo i le lalolagi, e tuu atu ia te i latou le mana e faamau ai i le lalolagi ma i le lagi, e e lē talitonu ma fouvale;

9 Ioe, e moni, e faamau ai i latou mo le aso o le a sasaa mai ai ma le lē fuaina le toasa o le Atua i luga o e e amioleaga—

10 Mo le aso e afio mai ai le Alii e taui i tagata taitoatasi e tusa ma lana galuega, ma fua mai i tagata taitoatasi e tusa ma le fua na ia fua atu i lona uso-a-tagata.

11 O le mea lea ua oo mai le siufofoga o le Alii ia oo atu i tuluiga o le lalolagi, ina ia mafai ona faalogoina e i latou uma o e e fia faalogo:

12 Inā outou saunia ia, inā outou saunia ia mo mea o le a oo mai, ona ua latalata mai le Alii;

13 Ma ua faateteleina le toasa o le Alii, ma ua faamama lana pelu i le lagi, ma o le a pa’ū ifo i luga o e o nonofo i le lalolagi.

14 Ma o le a faaalia le aao o le Alii; ma e oo mai le aso, o i latou o e e lē fia faalogo i le siufofoga o le Alii, po o le leo o ana auauna, pe lē gauai i upu a perofeta ma aposetolo, o le a vavae ese mai totonu o le nuu;

15 Ona ua latou se ese mai a’u sauniga, ma soli la’u feagaiga tumau e faavavau;

16 Ua latou lē sailia le Alii e faatu lana amiotonu, ae ua taitoatasi le tagata ma savali i lona lava ala, ma tusa ai ma le faatusa o lona lava atua, o lona foliga ua tusa ma foliga o le lalolagi, ma o lona uiga o lena o se tupua, lea e oo ina tuai ma o le a fano i Papelonia, o Papelonia tele lava lea o le a pa’ū.

17 O le mea lea, o A’u o le Alii, ona ua Ou iloa le malaia o le a oo mai i luga o e o nonofo i le lalolagi, na Ou valaau atu ai i la’u auauna o Iosefa Samita, Le Itiiti, ma tautala atu ia te ia mai le lagi, ma tuu atu ia te ia poloaiga;

18 Ma sa tuu atu foi i isi poloaiga, e tatau ona latou folafola atu nei mea i le lalolagi; ma ua faia lenei mea atoa ina ia mafai ona faataunuuina o mea na tusia e perofeta—

19 O le a oo mai mea vaivai o le lalolagi ma gaui i lalo mea tautaua ma le malolosi, ina ia lē fautuaina e le tagata lona uso-a-tagata, pe faalagolago i le lima o le tagata—

20 Ae ia mafai e tagata taitoatasi ona tautala i le suafa o le Atua le Alii, le Faaola lea o le lalolagi;

21 Ina ia mafai foi ona faateleina o le faatuatua i le lalolagi;

22 Ina ia mafai ona faatuina o la’u feagaiga tumau e faavavau;

23 Ina ia mafai ona folafola atu le atoatoaga o la’u talalelei e e vaivai ma e faatauvaa i tuluiga o le lalolagi, ma i luma o tupu ma pule.

24 Faauta, o A’u o le Atua ma ua Ou tautala atu ai; o nei poloaiga ua a a’u ia, ma sa tuuina atu i a’u auauna i lo latou vaivai, e tusa ma le ala o la latou gagana, ina ia mafai ona latou malamalama.

25 Ma e tusa ai ma lo latou sese, e mafai ona faailoaina;

26 Ma e tusa ai ma lo latou sailiga o le poto, e mafai ona aoaoina ai i latou;

27 Ma e tusa ai ma la latou agasala, e mafai ona aoaiina ai i latou, ina ia latou salamo;

28 Ma e tusa ai ma lo latou lotomaualalalo, e mafai ona faamalolosia ai i latou, ma faamanuiaina mai lugā, ma maua le malamalama mai lea taimi i lea taimi.

29 Ma ina ua uma ona maua o le talafaamaumau o sa Nifaē, ioe, ina ia mafai ai e la’u auauna lea o Iosefa Samita, Le Itiiti, ona maua o le mana e faaliliu ai le Tusi a Mamona e ala i le alofa mutimutivale o le Atua, i le mana o le Atua.

30 Ma ina ia mafai ai foi e i latou o e ua tuuina atu i ai nei poloaiga, ona maua le mana e faataoto ai le faavae o lenei ekalesia, ma aumai ai mai le lē mailoa ma le pouliuli, le ekalesia moni ma ola e tasi i luga o le fogaeleele atoa, lea ua fiafia tele i ai A’u, o le Alii, i le tautala atu lea i le ekalesia atoa ae lē i tagata taitoatasi—

31 Ona o A’u o le Alii e lē mafai ona Ou vaai atu i le agasala ma sina vaega itiiti e ono talia ai;

32 Ae ui i lea, o ia o lē e salamo ma faia poloaiga a le Alii o le a faamagaloina;

33 Ma o ia o lē e lē salamo, o le a aveesea mai ia te ia le malamalama lava lea na ia maua; ona e lē taumafai pea lo’u Agaga i le tagata, ua fetalai mai ai le Alii o ’Au.

34 O lenei foi, e moni Ou te fai atu ia te outou, E, e o nonofo i le lalolagi: O A’u o le Alii ua Ou loto e faailoa atu nei mea i tagata uma;

35 Ona o A’u e lē o se faailoga tagata, ma Ou te manao ia iloa e tagata uma ua vave ona oo mai o le aso; e lei oo mai le itula, ae ua latalata lava ona oo mai, le taimi o le a aveesea ai le filemu mai le lalolagi, ma o le a maua ai e le tiapolo le mana i luga o lana lava puleaga.

36 Ma o le a i ai foi i le Alii le mana i luga o lana au paia, ma o le a nofotupu i lo latou lotolotoi, ma o le a afio ifo i le faamasinoga i luga o Etoma, po o le lalolagi.

37 Suesue i nei poloaiga, ona ua moni ma faamaoni i latou, ma o le a faataunuuina lava valoaga ma folafolaga uma ua i totonu o i latou.

38 O le mea ua fai atu ai A’u o le Alii ua Ou fai atu ai, ma Ou te lē faatoese a’u lava ia; ma e ui ina mavae atu le lagi ma le lalolagi, e lē mavae atu lava la’u upu, ae o le a faataunuuina uma lava, pe i lo’u lava leo po o i le leo o a’u auauna, ua tutusa lava.

39 Aua faauta, ma tagai, o le Alii o le Atua lea, ma ua molimau ai le Agaga, ma ua moni le molimau, ma e tumau le upumoni e faavavau faavavau lava. Amene.