1 Ko ʻeni, vakai, koeʻuhí ko e meʻa kuó ke kole ʻe koe, ko ʻeku tamaioʻeiki ko ʻŌliva Kautele, ke ʻilo meiate aú, ʻoku ou fai ai kiate koe ʻa e ngaahi leá ni:

2 Vakai, kuó u fakahā kiate koe, ʻi hoku Laumālié ʻi he ngaahi taimi lahi, ʻoku moʻoni ʻa e ngaahi meʻa kuó ke tohí; ko ia ʻokú ke ʻiloʻi ʻoku moʻoni ia.

3 Pea kapau ʻokú ke ʻiloʻi ʻoku moʻoni ia, vakai, ʻoku ou fai kiate koe ʻa e fekau, ke ke falala ki he ngaahi meʻa ʻa ia kuo tohí;

4 He ʻoku ʻi ai ʻa e ngaahi meʻa kotoa pē kuo tohi ʻo kau ki he tuʻunga ʻo hoku siasí, mo ʻeku ongoongoleleí, pea mo ʻeku maká.

5 Ko ia, kapau te ke langa hake hoku siasí, ki he tuʻunga ʻo ʻeku ongoongoleleí mo ʻeku maká, ʻe ʻikai ke ikunaʻi koe ʻe he ngaahi matapā ʻo helí.

6 Vakai, ʻoku fakaʻau ke kakato ʻa e fai angahala ʻa e māmaní; pea ʻoku ʻaonga ke ueʻi hake ʻa e fānau ʻa e tangatá ke nau fakatomala, ʻa e kau Senitailé kae ʻumaʻā foki mo e fale ʻo ʻIsilelí.

7 Ko ia, koeʻuhi ko hono papitaiso koe ʻi he nima ʻo ʻeku tamaioʻeiki ko Siosefa Sāmita, ko e Siʻí, ʻo fakatatau ki he meʻa ʻa ia kuó u fekau kiate iá, kuó ne fakahoko ai ʻa e meʻa naʻá ku tuʻutuʻuni kiate iá.

8 Pea ko ʻeni, ʻoua te ke ofo ʻi heʻeku ui ia ke fakahoko ʻa e meʻa ʻoku ou loto ki aí, ʻa ia ko e meʻa ʻoku ou ʻiloʻi ʻe au; ko ia, kapau te ne faivelenga ʻi he tauhi ʻeku ngaahi fekaú ʻe tāpuakiʻi ia ke ne maʻu ʻa e moʻui taʻengatá; pea ko hono hingoá ko Siosefa.

9 Pea ko ʻeni, ʻe ʻŌliva Kautele, ʻoku ou lea kiate koe, kae ʻumaʻā foki kia Tēvita Uitemā, ʻi he fekau; he vakai, ʻoku ou fekau ki he kakai kotoa pē ʻi he feituʻu kotoa pē ke nau fakatomala, pea ʻoku ou lea kiate kimoua ʻo hangē kia Paula ko ʻeku ʻaposetoló, he ʻoku ui ʻa kimoua ʻo hangē pē ko e ui naʻe fai kiate iá.

10 Manatu, ʻoku mahuʻinga lahi ʻa e ngaahi laumālié ʻi he ʻao ʻo e ʻOtuá;

11 He vakai, naʻe kātakiʻi ʻe he ʻEikí ko homo Huhuʻí ʻa e mate ʻi he kakanó; ko ia, naʻá ne kātakiʻi ai ʻa e mamahi ʻa e kakai kotoa pē, koeʻuhí ke lava ʻa e kakai kotoa pē ʻo fakatomala pea haʻu kiate ia.

12 Pea kuó ne toe tuʻu hake mei he maté, koeʻuhí ke ne lava ʻo ʻomi ʻa e kakai kotoa pē kiate ia, tuʻunga ʻi he fakatomalá.

13 Pea hono ʻikai ke lahi ʻa ʻene fiefia ʻi he laumālie ʻe toko taha ʻoku fakatomalá!

14 Ko ia, ʻoku ui ʻa kimoua ke kalanga ʻaki ʻa e fakatomalá ki he kakaí ni.

15 Pea kapau te mo ngāue ʻi homo ngaahi ʻahó kotoa pē ʻi hono kalanga ʻaki ʻo e fakatomalá ki he kakaí ni, pea ʻomi, ʻa e foʻi laumālie ʻe toko taha pē kiate au, hono ʻikai ke lahi pehē fau ʻa hoʻomo fiefia fakataha mo ia ʻi he puleʻanga ʻo ʻeku Tamaí!

16 Pea ko ʻeni, kapau ʻe lahi ʻa hoʻomo fiefiá mo e foʻi toko taha kuó mo ʻomi kiate au ki he puleʻanga ʻo ʻeku Tamaí, hono ʻikai ke lahi hoʻomo fiefiá, ʻo kapau te mo ʻomi ʻa e ngaahi laumālie tokolahi kiate au!

17 Vakai, ʻokú mo maʻu ʻa ʻeku ongoongoleleí ʻi homo ʻaó, pea mo ʻeku maká, pea mo ʻeku fakamoʻuí.

18 Kole ki he Tamaí ʻi hoku hingoá, ʻi he tui ʻo tui te mo maʻu, pea te mo maʻu ʻa e Laumālie Māʻoniʻoní, ʻa ia ʻokú ne fakahā ʻa e ngaahi meʻa kotoa pē ʻoku ʻaongá ki he fānau ʻa e tangatá.

19 Pea kapau ʻoku ʻikai te mo maʻu ʻa e tuí, ʻamanaki leleí, mo e manavaʻofá, ʻe ʻikai te mo lava ʻo fai ha meʻa ʻe taha.

20 ʻOua ʻe fakakikihi mo ha siasi, ka ko e siasi pē ʻo e tēvoló.

21 Toʻo kiate kimoua ʻa e huafa ʻo Kalaisí, pea lea ʻaki ʻa e moʻoní ʻi he fakamātoato.

22 Pea ʻilonga ʻa kinautolu kotoa pē ʻe fakatomala mo papitaiso ʻi hoku hingoá, ʻa ia ko Sīsū Kalaisí, pea kātaki ki he ngataʻangá, ʻe fakamoʻui ʻa kinautolu.

23 Vakai, ko Sīsū Kalaisi ʻa e huafa kuo tuku mai ʻe he Tamaí, pea ʻoku ʻikai toe ʻi ai mo ha hingoa kehe kuo tuku mai ʻa ia ʻe lava ʻo fakamoʻui ai ʻa e faʻahinga ʻo e tangatá;

24 Ko ia, kuo pau ke toʻo ʻe he kakai kotoa pē kiate kinautolu ʻa e hingoa kuo tuku mai ʻe he Tamaí, he ko e hingoa ia ʻe ui ʻaki ʻa kinautolu ʻi he ʻaho fakaʻosí;

25 Ko ia, kapau ʻoku ʻikai te nau ʻiloʻi ʻa e huafa ʻoku ui ʻaki ʻa kinautolú, ʻe ʻikai te nau lava ʻo maʻu ha nofoʻanga ʻi he puleʻanga ʻo ʻeku Tamaí.

26 Pea ko ʻeni, vakai, ʻoku toe ʻi ai mo ha niʻihi kehe kuo ui ke malanga ʻaki ʻa ʻeku ongoongoleleí, ki he Senitailé mo e Siú fakatouʻosi;

27 ʻIo, naʻa mo e toko hongofulu mā ua; pea ʻe hoko ʻa e Toko Hongofulu Mā Uá ko ʻeku kau ākonga, pea te nau toʻo kiate kinautolu ʻa hoku hingoá; pea ko e Toko Hongofulu Mā Uá ʻa kinautolu te nau holi ke toʻo kiate kinautolu ʻa hoku hingoá ʻaki ʻa e loto-fakamātoato moʻoní kotoa.

28 Pea kapau ʻoku nau holi ke toʻo hoku hingoá kiate kinautolu ʻaki ʻa e loto-fakamātoato moʻoni, ʻoku ui ʻa kinautolu ke ʻalu atu ki he māmaní kotoa pē ke malanga ʻaki ʻeku ongoongoleleí ki he kakai kotoa pē.

29 Pea ko kinautolu ia ʻa ia kuó u fakanofo ʻe au ke fai papitaiso ʻi hoku hingoá, ʻo fakatatau ki he meʻa ko ia kuo tohí;

30 Pea ʻokú mo maʻu ʻi homo ʻaó ʻa e meʻa kuo tohí; ko ia, kuo pau ke mo fai ia ʻo fakatatau mo e ngaahi lea ʻa ia kuo tohí.

31 Pea ko ʻeni ʻoku ou lea kiate kimoutolu, ko e Toko Hongofulu Mā Uá—Vakai, ʻoku feʻunga ʻa ʻeku ʻaloʻofá kiate kimoutolu; kuo pau ke mou ʻaʻeva angatonu ʻi hoku ʻaó pea ʻikai fai angahala.

32 Pea, vakai, ko kimoutolu ia ʻa kinautolu ʻoku fakanofo ʻiate au ke fakanofo ʻa e kau taulaʻeikí mo e kau akonakí; ke malanga ʻaki ʻa ʻeku ongoongoleleí, ʻo fakatatau mo e mālohi ʻo e Laumālie Māʻoniʻoni ʻa ia ʻoku ʻiate kimoutolú, pea fakatatau ki he ngaahi ui mo e ngaahi meʻa-foaki ʻa e ʻOtuá ki he tangatá;

33 Pea ko au, Sīsū Kalaisi, ko homou ʻEikí mo homou ʻOtuá, kuó u lea ʻaki ia.

34 Ko e ngaahi leá ni ʻoku ʻikai mei ha kau tangata pe mei ha tangata, ka ʻoku meiate au ia; ko ia, ke mou fakamoʻoni ʻoku meiate au ia kae ʻikai mei he tangatá;

35 He ko hoku leʻó ʻoku lea ʻaki ia kiate kimoutolú; he ʻoku ʻoatu ia ʻi hoku Laumālié kiate kimoutolu, pea ʻi hoku mālohí te mou lava ʻo felauʻaki ia ʻiate kimoutolu; pea ka ne taʻeʻoua hoku mālohí ʻe ʻikai te mou lava ʻo maʻu ia;

36 Ko ia, te mou lava ʻo fakamoʻoniʻi kuo mou fanongo ki hoku leʻó, mo ʻiloʻi ʻa ʻeku ngaahi leá.

37 Pea ko ʻeni, vakai, ʻoku ou tuku kiate koe, ʻe ʻŌliva Kautele, kae ʻumaʻā foki kia Tēvita Uitemā, ke mo kumi ʻa e Toko Hongofulu Mā Uá, ʻa ia te nau maʻu ʻa e ngaahi holi kuó u lau ki aí;

38 Pea te mo ʻiloʻi ʻa kinautolu ʻi heʻenau ngaahi holí pea mo ʻenau ngaahi ngāué.

39 Pea ʻo ka hili hoʻomo ʻiloʻi ʻa kinautolú ke mo fakahā ʻa e ngaahi meʻá ni kiate kinautolu.

40 Pea te mo fakatōmapeʻe hifo ʻo hū ki he Tamaí ʻi hoku hingoá.

41 Pea kuo pau ke mo malanga ki he māmaní, ʻo pehē: Kuo pau ke mou fakatomala ʻo papitaiso, ʻi he huafa ʻo Sīsū Kalaisí;

42 He kuo pau ke fakatomala ʻa e kakai kotoa pē ʻo papitaiso, ʻo ʻikai ngata ʻi he kakai tangatá pē, ka ko e kakai fefiné foki, pea mo e fānaú, ʻa ia kuo taʻu motuʻa feʻunga ke ala ʻekeʻi meiate kinautolu ʻenau ngaahi ngāué.

43 Pea ko ʻeni, ʻo ka hili ʻa hoʻomo maʻu ʻení, kuo pau ke mo tauhi ʻeku ngaahi fekaú ʻi he meʻa kotoa pē;

44 Pea te u fakahoko ʻi homo nimá ha ngāue fakaofo ʻi he lotolotonga ʻo e fānau ʻa e tangatá, ki hono fakamahino ki he tokolahi ʻa ʻenau ngaahi angahalá, koeʻuhi ke nau aʻusia ʻa e fakatomalá, pea ke nau lava ʻo haʻu ki he puleʻanga ʻo ʻeku Tamaí.

45 Ko ia, ko e ngaahi tāpuaki ʻoku ou ʻoatu kiate kimouá ʻoku māʻolunga hake ia ʻi he meʻa kotoa pē.

46 Pea ʻo ka hili hoʻomo maʻu ʻení, kapau ʻe ʻikai te mo tauhi ʻeku ngaahi fekaú ʻe ʻikai lava ʻo fakamoʻui ʻa kimoua ʻi he puleʻanga ʻo ʻeku Tamaí.

47 Vakai, ko au, Sīsū Kalaisi, ko homo ʻEikí mo homo ʻOtuá, pea mo homo Huhuʻí, kuó u lea ʻaki ia ʻi he mālohi ʻo hoku Laumālié. ʻĒmeni.