Մաս 23. Օր 4

Բ Կորնթացիս 4–7

Նախաբան

Պողոս Առաքյալն ուսուցանել է, որ այս կյանքի փորձությունները և չարչարանքները ժամանակավոր և փոքր են հավերժության օրհնությունների համեմատ: Նա նաև ուսուցանել է Կորնթոսի սրբերին դատաստանի մասին և վկայել է, որ Հիսուս Քրիստոսը մեզ համար հնարավոր է դարձրել Աստծո հետ հաշտությունը: Շարունակելով պաշտպանել իր վարքը որպես Աստծո պաշտոնյա՝ Պողոսը խորհուրդ է տվել սրբերին իրենց հեռու պահել ամեն անիրավությունից և ուրախացել է, որ նրանք զգացել են աստվածային տրտմություն ու ապաշխարել են:

Բ Կորնթացիս 4

Պողոսը վկայում է, որ չի վախենում, ոչ էլ ընկճվում է իր չարչարանքներից:

man pushing another man

Ըստ ձեզ՝ ի՞նչ է արտացոլում այս նկարը: Ի՞նչ կարող է մտածել հրվող մարդը իրեն հրող մարդու մասին:

Նկարի ընդլայնված տարբերակը բացահայտում է, որ մարդը հրում է դիմացինին, որ փրկի վրա հասնող ավտոմեքենայից:

man pushing another man from street with automobile coming

Ինչպես կարող է իրավիճակին լայն համատեքստում կամ մեծ տեսանկյունից նայելը փոխել ձեր դատողությունը առաջին նկարի մասին:

Բ Կորնթացիս 4 գլխում Պողոս առաքյալը գրել է Կորնթոսի սրբերին, որպեսզի օգնի նրանց տեսնել իրենց նեղություններն ավելի մեծ տեսանկյունից: Ուսումնասիրելով այս գլուխը, մտածեք, թե ինչպես կարող եք կիրառել Պողոսի ուսուցանածը սրբերին՝ իրենց նեղությունների մասին:

Բ Կորնթացիս 4.1–7 հատվածներում կարդում ենք, թե Պողոսն ինչպես է հավաստիացրել սրբերին, որ ճշմարտապես քարոզել է ավետարանը նրանց: Նա ուսուցանել է, որ Սատանան՝ «այս աշխարհքի աստուածը» (Բ Կորնթացիս 4.4), ջանում է մարդկանց հեռու պահել ավետարանն ընդունելուց: Պողոսը իրեն և իր ծառայակիցներին համեմատում է հողե անոթի հետ, որի մեջ «գանձ» կա՝ «Աստուծոյ փառքի գիտութեան լուսաւորութիւնը» (Բ Կորնթացիս 4.6–7):

Կարդացեք Բ Կորնթացիս 4.8–9 հատվածները, պարզելով, թե Պողոսը ինչպես է նկարագրում միսիոներական իր ջանքերը:

Ձեր կարծիքով՝ Պողոսն ինչպե՞ս էր կարողանում դրական վերաբերմունք պահպանել այդ փորձությունների ժամանակ:

Բ Կորնթացիս 4.11–14 հատվածներում Պողոսն ուսուցանել է, որ չնայած որ ոմանք կարող է մահանան հանուն Հիսուս Քրիստոսի ավետարանի, նրանց մահը ժամանակավոր կլինի:

Կարդացեք Բ Կորնթացիս 4.14–16 հատվածները, պարզելով, թե ինչ գիտելիք էր Պողոսին օգնում դիմակայել փորձություններին ու հալածանքներին:

«Թէ եւ մեր դրսի մարդը փճանում է, բայց մեր ներսի մարդն օրէցօր նորոգվում է» արտահայտությունը (Բ Կորնթացիս 4.16) նշանակում է, որ չնայած որ Պողոսն ու իր գործընկերները ֆիզիկապես կարող է մահանային, նրանց հոգին ամեն օր ամրանում էր:

Կարդացեք Բ Կորնթացիս 4.17–18 հատվածները, պարզելով, թե Պողոսն ինչ ճշմարտություններ է ուսուցանել սրբերին իրենց փորձությունների ու չարչարանքների վերաբերյալ:

Ճշմարտություններից մեկը, որ կարող ենք սովորել այս հատվածներից, այն է, որ այս կյանքի մեր փորձություններն ու չարչարանքները փոքր են հավերժության օրհնությունների ու աճի համեմատ, որոնք կտրվեն դրանց հավատարմությամբ դիմակայողներին:

1. Սուրբ գրությունների ուսումնասիրության ձեր օրագրում պատասխանեք հետևյալ հարցերին.

   1. Ինչո՞ւ է կարևոր մեր չարչարանքներին նայել Երկնային Հոր ծրագրի ավելի լայն տեսանկյունից:

   2. Պատահե՞լ է արդյոք տեսնել ինչ-որ մեկին, ով ամուր է եղել փորձություններին դիմակայելիս, որովհետև նայել է իր չարչարանքներին Երկնային Հոր ծրագրի ավելի լայն տեսանկյունից:

Բ Կորնթացիս 5

Պողոսը սրբերին ուսուցանում է դատաստանի և Հիսուս Քրիստոսի Քավության մասին

Վերցրեք թղթի մի կտոր և ծալեք մեջտեղից: Բացեք թուղթը: Մի կեսի վրա գրեք ձեր անունը, մյուս կեսի վրա գրեք Երկնային Հայր: Երբ եկանք երկիր, մենք հեռացանք Երկնային Հոր ներկայությունից: Ճղեք թուղթը մեջտեղից՝ առանձնացնելով երկու մասերը: Մտածեք, թե ինչպես է ճղված թուղթը ներկայացնում, թե ինչ տեղի ունեցավ, երբ լքեցինք Երկնային Հոր ներկայությունը և երկիր եկանք՝ մահկանացու փորձառություն ունենենալու: Բ Կորնթացիս 5 գլխում կարդում ենք Պողոսի ասած մի քանի ճշմարտությունների մասին, որոնք օգնում են հասկանալ, թե ինչ պետք է անենք Երկնային Հոր ներկայություն վերադառնալու համար:

Կարդացեք Բ Կորնթացիս 5.6–10 հատվածները, պարզելով ճշմարտություններ, որոնք մեզ օգնում են աչքի առաջ ունենալ Երկնային Հոր հետ մեր հարաբերությունները: Կարող եք ձեր սուրբ գրություններում նշագծել կամ գրառում կատարել ձեր գտածի վերաբերյալ:

Ահա երկու ճշմարտություններ, որոնք կարող ենք սովորել այս հատվածներից. Քանի որ մենք բաժանված ենք Աստծուց մահկանացու կյանքում, մենք պետք է քայլենք հավատքով, ոչ թե երևույթով: Յուրաքանչյուրս պետք է դատվենք Հիսուս Քրիստոսի կողմից՝ մահկանացու կյանքում կատարած մեր գործերի համեմատ:

Մտածեք, թե ինչ է նշանակում «հաւատքով ենք գնում, եւ ոչ թէ երեւոյթով» (Բ Կորնթացիս 5.7): Ո՞ւմ գիտեք, ով ապրում է հավատքով, ոչ թե երևույթով:

Մտածեք, թե ինչ ջանքեր պիտի թափեք ձեր կյանքում, որպեսզի «հաճոյ լինեք [Տիրոջը]» (Բ Կորնթացիս 5.9):

Կարդացեք Բ Կորնթացիս 5.15–16 հատվածները, պարզելով, թե Քավության պատճառով ինչ են անում Հիսուս Քրիստոսի հետևորդները: Կարդացեք նաև Ջոզեֆ Սմիթի Թարգմանություն, Բ Կորնթացիս 5.16 (անգլերեն աստվածաշնչում 2 Corinthians 5.16, ծանոթագրություն a): «Այլևս չենք ապրում ըստ մարմնի» արտահայտությունը նշանակում է՝ մենք թողնում ենք աշխարհիկ կյանքը:

Ձեր անունով թղթի կտորի վրա գրեք, թե ըստ ձեր սովորածի՝ ինչպե՞ս պիտի ապրեն Հիսուս Քրիստոսի հետևորդները:

Կարդացեք Բ Կորնթացիս 5.17–19, պարզելով, թե Հիսուս Քրիստոսի Քավությունը ինչպես կարող է օգնել մեզ վերադառնալ Երկնային Հոր ներկայությունը: Կարող եք ձեր սուրբ գրություններում նշագծել կամ գրառում կատարել ձեր գտածի վերաբերյալ:

«Երկնային Հայր» գրված թղթի կտորի վրա գրեք հետևյալ ճշմարտությունը. Հիսուս Քրիստոսի Քավության միջոցով մենք կարող ենք նոր ստեղծված մարդիկ դառնալ և հաշտվել Աստծո հետ:

Ձեր կարծիքով ի՞նչ է նշանակում «նոր ստեղծուած» դառնալ (Բ Կորնթացիս 5.17):

Միացրեք թղթի երկու կտորները միմյանց: Աստծո հետ հաշտվել նշանակում է, որ Հիսուս Քրիստոսի Քավության միջոցով մենք կարող ենք փոխվել և մաքրվել, այսինքն՝ նոր ստեղծված անձ դառնալ, որպեսզի վերադառնանք ապրելու Երկնային Հոր ներկայության մեջ:

Բ Կորնթացիս 5.20–21 հատվածներում կարդում ենք, որ Պողոսն իրեն և իր հետ ուսուցանողներին անվանում է «Քրիստոսի պատգամավորներ» և սրբերին հորդորում է հաշտվել Աստծո հետ:

Բ Կորնթացիս 6

Պողոսը նկարագրում է Աստծո պաշտոնյաների բնութագիրը և սրբերին խորհուրդ է տալիս դուրս մնալ չար ընկերություններից

Երբևէ եղե՞լ է, որ ձեզ ծաղրեն կամ քննադատեն ուրիշներին ծառայելու կամ օգնություն ցուցաբերելու համար: Բ Կորնթացիս 6.1–13 հատվածներում կարդում ենք, թե Պողոսն ինչպես է խրախուսել սրբերին որպես Աստծո պաշտոնյաներ համբերատար լինել և գայթակղության առիթ չտալ, անգամ եթե նրանց հանդեպ անգութ են վերաբերվում:

Բ Կորնթացիս 6.14–18 հատվածներում տեղեկանում ենք, որ Պողոսը սրբերին ուսուցանել է իրենց հեռու պահել անարդարությունից:

Լրացրեք հետևյալ աղյուսակը՝ կարդալով Բ Կորնթացիս 6.14–18 հատվածներն ու թվարկելով Պողոսի խորհուրդներն ու հարակից խոստումները.

Խորհուրդ սրբերին	Տիրոջ խոստումները

Բ Կորնթացիս 6.15 հատվածի միաբանություն բառը նշանակում է ներդաշնակության մեջ լինել, Բելիարը նշանակում է ամբարշտություն (տես Bible Dictionary, «Belial»), և անհավատ բառը ակնարկում է նրանց, ովքեր հավատում էին կեղծ աստվածների: Վաղ քրիստոնյաների համար ոչ քրիստոնյաները անհավատ էին համարվում:

«Բաժանուեցէք» և «պիղծ բաների մի դպչիք» արտահայտությունները (17 հատվածում) զգուշացումներ են՝ հեռու մնալ կռապաշտներից ու նրանց սովորություններից և կիրառելի է նաև մեր օրերի համար: «Պողոսը Կորնթոսի սրբերին համեմատել է «կենդանի Աստուծոյ տաճարի» հետ (Բ Կորնթացիս 6.16): Այնուհետև, նա նրանց հորդորել է կռապաշտողներից հեռու մնալ և չմասնակցել նրանց «պիղծ» գործերին (տես Եսայիայի 52.11): Այս ուսմունքներով Պողոսը վերահաստատել է Աստծո հին ժողովրդին տված խոստումը, որ եթե «դուրս գան» ամբարիշտների միջից, Աստված կբնակվի նրանց մեջ ու նրանց Աստվածը կլինի (Բ Կորնթացիս 6.17, տես նաև … Երեմիա 32.38 և Եզեկիել 11.19–20)» (New Testament Student Manual [Church Educational System manual, 2014], 402): Պողոսը առանձնապես զգուշացրել է անդամներին խուսափել ամեն տեսակի կեղծ երկրպագությունից, կռապաշտությունից ու կեղծ սովորույթներից, ճիշտ ինչպես Հին Կտակարանն էր ժողովրդին սովորեցնում, որ պաշտեն Աստծուն և դառնան նրա ընտրյալ ժողովուրդը՝ մերժելով մյուս բոլոր աստվածներին:

Սկզբունքներից մեկը, որ կարող ենք սովորել Բ Կորնթացիս 6.14–18 հատվածներից, այն է, որ երբ հեռու մնանք կեղծ սկզբունքներից ու անմաքուր գործերից, Տերը կընդունի մեզ: (Այդ սկզբունքը չի ենթադրում, որ կոպիտ վերաբերվենք այլ հավատքի պատկանողների հետ, ոչ էլ, որ հրաժարվենք շփվել նրանց հետ):

2. Սուրբ գրությունների ուսումնասիրության ձեր օրագրում պատասխանեք հետևյալ հարցերին.

   1. Մեր օրերում ի՞նչ է նշանակում հեռու մնալ կեղծ սովորույթներից ու անմաքուր գործերից: (Տես ՎևՈւ 1.15–16):

   2. Պատահե՞լ է արդյոք, որ ձեզ օրհնված եք զգացել, երբ հեռու եք մնացել մի իրավիճակից, որը կարող էր հեռացնել ձեզ Տիրոջից:

Բ Կորնթացիս 7

Պողոսն ուրախանում է սրբերի ճշմարիտ ապաշխարության համար

Բ Կորնթացիս 7 գլխում Պողոս առաքյալը բացատրել է, որ մինչ նա իր միսիոներական գործընկերների հետ ծանր նեղությունների մեջ չարչարվում էր Մակեդոնիայում, Տիտոսը Կորնթոսից լուր էր բերել, որը Պողոսին ուրախություն ու մխիթարություն էր պատճառել: Մինչ այդ Պողոսը Կորնթոսի սրբերին նամակ էր ուղարկել՝ ապաշխարության կանչելով նրանց, իսկ Տիտոսը պատմեց նրան Եկեղեցու անդամների արձագանքի մասին:

Կարդացեք Բ Կորնթացիս 7.8–10 հատվածները, պարզելով, թե Կորնթոսի սրբերը ինչպես էին արձագանքել Պողոսի նամակին:

Ինչո՞ւ էր Պողոսն ուրախություն ապրել այն բանի համար, որ սրբերը տրտմել էին իր նամակից:

Ձեր կյանքի գնահատումը

Երբ ժամանակ ենք հատկացնում ազնվորեն գնահատելու, թե որքան լավ ենք ապրում ավետարանային որոշակի սկզբունքով, մենք հնարավորություն ենք տալիս, որ Սուրբ Հոգին օգնի մեզ հասկանալ, թե ինչն ենք լավ անում և ինչը կարող ենք բարելավել: Երբ գնահատում եք ձեզ, փորձեք հետևել Սուրբ Հոգու առաջնորդությանը և լիովին ազնիվ լինել:

Մտածեք, թե արդյոք ձեր մեղքերի համար զգացած տրտմությունը աստվածայի՞ն տրտմություն է, որը «ապաշխարութիւն է գործում փրկութեան համար», թե «աշխարհքի տրտմութիւն» է (Բ Կորնթացիս 7.10), որը նշանակում է ափսոսալ, որ ձեր մեղքը բացահայտվել է կամ ստիպված եք տանել ձեր սխալի հետևանքները:

Կարդացեք Բ Կորնթացիս 7.11 հատվածը, պարզելով, թե ինչ փոփոխություններ են սրբերը կատարել իրենց կյանքում այն բանի շնորհիվ, որ աստվածային տրտմությունը նրանց օգնել է ապաշխարել:

3. Սուրբ գրությունների ուսումնասիրության ձեր օրագրում այսօրվա հանձնարարության տակ գրեք հետևյալը.

   Ես ուսումնասիրեցի Բ Կորնթացիս 4–7 գլուխները և ավարտեցի այս դասը (ամսաթիվ):

   Լրացուցիչ հարցեր, մտքեր և գաղափարներ, որոնցով ես կցանկանայի կիսվել իմ ուսուցչի հետ.