Yalo
    Footnotes

    Yalo

    E tolu na ivakarau ni kena tukuni na yalo ena ivolanikalou: (1) na veika bula vakayalo, ena bula taumada kei na bula ni sa oti eke (Alama 40:11–14; Epa. 3:23); (2) e dua na yalo kei na dua na yago erau mai cokoti vata ena bula oqo (V&V 88:15; Epa. 5:7); kei na (3) e dua na tamata sa tucake tale mai na mate, ka rau sa cokoti vata me sega tale ni veitawasei rawa na yalona kei na yagona, sa yaco me tawamate rawa (2 Nif. 9:13; V&V 88:15–16).

    Na tiki ni ka bula ka sa tu rawa ni se bera na sucu mai ki na bula oqo, mai vakaitikotiko ena yago vuca oqo ena gauna ni bula vakayago oqo, ka na tu ga me dua na ka bula vakataki koya ni sa oti na mate me yacova na Tucake tale. Na veika bula kece sara—na kawatamata, na manumanu, kei na kau—era a yalo tu ni se bera ni tu e delai vuravura e dua na ka bula (iVakate. 2:4–5; Mosese 3:4–7). Na yago vakayalo e tautauvata ga kei na irairai ni yago (1 Nif. 11:11; Ica 3:15–16; V&V 77:2; V&V 129). Na Yalo e vakavotukana, ia sa savasava ka uasivi cake sara mai na veika vakayago, (V&V 131:7).

    Na tamata kecega e luvena tagane se yalewa na Kalou, ni a sucu vakayalo vei rau na iTubutubu Vakalomalagi ni bera ni qai mai sucu vei rau na itubutubu vakayago e vuravura (Ipe. 12:9). Na tamata yadua e vuravura e taukena e dua na yago vakayalo ka cokoti vata kei na dua na yago vakalewe kei na sui. Me vaka na kena dau vakamacalataki ena ivolanikalou, na yalo kei na yago vuca ni rau cokoti vata sa qai yaco me tamata (iVakate. 2:7; V&V 88:15; Mosese 3:7, 9, 19; Epa. 5:7). Na yalo e rawa ni bula ga vakataki koya kevaka e sega na kena yago vuca, ia na yago vuca ena sega ni rawa ni bula vakataki koya kevaka e sega na yalo (Jeme. 2:26). Na mate vakayago sai koya na kena tawasei na yalo mai na yago. Ena gauna ni Tucake tale, erau na cokoti vata tale na yalo vata kei na yago vuca vakalewe kei na sui vata ga a mai taukena voli ena bula vakayago oqo, ena rua ga na kena duidui lelevu: erau na sega tale ni tawasei rawa, ka vakakina ni sa na vakataucokotaki ka sega tale ni vuca rawa na yago vuca (Alama 11:45; V&V 138:16–17).

    Na talei ni yalo

    Na tamata kecega e luvena vakayalo na Kalou. E dau kauwaitaka o Koya na Luvena yadua ka dau vakasamataki ira yadua me ra ka bibi sara Vua. Me vaka ni ra Luvena, sa rawa me ra yaco me vakataki Koya. O koya sa cecere kina na kedra yaga.

    Yalo ca