Taniela
Na tamata ka tukuni vakalevu ena iVola i Taniela ena Veiyalayalati Makawa; e dua na parofita ni Kalou ka tamata cecere na nona vakabauta.
E sega ni kilai rawa e dua na ka me baleti rau na nona itubutubu, e dina ni kena irairai ni tamata sucu turaga (Tani. 1:3). A kau vakabobula ki Papiloni, na vanua ka qai laki vakatokai kina ko Pelitisasari (Tani. 1:6–7). Eratou a sega ni via kania na kena kakana na tui ko Taniela kei na le tolu tale na kaivesu ena vuku ni nodratou vakabauta vakalotu (Tani. 1:8–16).
A rawata ko Taniela na nodrau veitokani ko Nepukanesa kei Taraiase ena nona kaukauwa me vakaibalebaletaka na tadra (Tani. 2; 4; 6.). A wilika ka vakaibalebaletaka talega na volavola ka tu ena lalaga (Tani. 5). Era a bukiveretaki koya na kena meca ka ra viritaki koya ki na dua na qara ni laione, ia a qai vakabulai koya na Turaga (Tani. 6).
Na iVola i Taniela
E rua na iwasewase ni ivola oqo: wase 1–6 era italanoa me baleti Taniela kei iratou na nona itokani e lewe tolu; na wase 7–12 era raivotu vakaparofita ka raica ko Taniela. E vakavuvulitaki ena ivola na bibi ni noda dinata na Kalou ka tukuna ni sa dau vakalougatataki ira na tamata yalodina na Turaga.
E dua na cau levu ni ivola oqo sai koya na vakaibalebaletaki ni tadra nei Nepukanesa na Tui. Ena tadra oqori e vakatakarakarataki kina na matanitu ni Kalou ena veigauna e muri ki na dua na vatu sa ta mai na ulunivanua. Ena qiqi tiko na vatu oqo me yacova ni sa roboti vuravura kece (Tani. 2; raica talega na V&V 65:2).