Aisea
    Footnotes
    Theme

    Aisea

    E dua na parofita ni Veiyalayalati Makawa ka a parofisaitaka mai na 740–701 B.K. Ni nona daunivakasala liu tu na Tui ko Esekaia, e dau veivakauqeti vakalevu ena veika vakalotu kei na politiki ko Aisea.

    Sa dau cavuta vakalevu cake na vosa nei Aisea mai vei ira na veiparofita kecega ko Jisu. Sa dau cavuti vakalevu talega mai vei Pita, Joni kei Paula ena Veiyalayalati Vou. Na iVola i Momani kei na Vunau kei na Veiyalayalati era tu kina e vuqa sara na vosa cavuti mai vei Aisea ni vakatauvatani kei ira na parofita kecega ka vakarautaki talega kina e vuqa sara na veivuke ena kena vakadewataki na Aisea. A vakavulici ira na nona tamata ko Nifai mai na volavola nei Aisea (2 Nif. 12–24; Ais. 2–14). A tukuna vei ira na Nifaiti na Turaga ni sa “ka bibi vakaidina na vosa i Aisea” ka ni na vakayacori na veika kecega sa parofisaitaka ko Aisea (3 Nif. 23:1–3).

    Na ivola i Aisea

    E dua na ivola ena Veiyalayalati Makawa. E vuqa na parofisai i Aisea e baleta na nona lako mai na Dauveivueti, ena Nona veiqaravi e vuravura (Ais. 9:6) ka vakakina ni Tui Cecere ena iotioti ni gauna (Ais. 63). A parofisaitaka talega e vuqa na ka me baleta na nodra veigauna e muri na Isireli.

    Na wase e 1 e ivakamacala ni vo ni ivola. Na Aisea 7:14; 9:6–7; 11:1–5; 53; kei na 61:1–3 era iyaloyalo ni nona veiqaravi na iVakabula. Na wase 2, 11, 12, kei na 35 e baleta na veika ena yaco ena veigauna e muri, ni sa vakalesui mai na kosipeli, ka vakasoqoni vata ko Isireli, ka ra seraka mai na veivanua dravuisiga me vaka na rosi. Na wase 29 e koto kina e dua na parofisai me baleta na kena lako mai na iVola i Momani (2 Nif. 27). Na wase 40–46 e tukuni kina na nona qaqa ko Jiova me vaka ni Kalou dina mai vei ira na nodra kalou matakau na dau qaravi kalou lasu. Na vo ni wase, mai na 47–66, e baleta na veika e yaco ena iotioti ni veivakalesui mai me baleti ira na Isireli kei na tauyavutaki kei Saioni, kei na nona mai tiko vata kei ira na Nona tamata na Turaga.