Kalili
    Footnotes
    Theme

    Kalili

    Ena veigauna makawa kei na gauna oqo, na yasana yawa duadua vaka ki na vualiku kei Isireli e koto ena ra ni Uciwai na Joritani kei na Wasawasa ko Kalili. Ko Kalili e rauta ni onosagavulu na maile (ciwasagavulu kavitu na kilomita) na kena balavu ka tolusagavulu na maile (vasagavulu kawalu na kilomita) na kena raba. E liu era tu kina eso na vanua bulabula sara kei na veitauni osooso duadua e Isireli. E levu na gaunisala lelevu ka ra lako vaka ki Tamasiko, Ijipita kei na tokalau kei Isireli era lako siviti Kalili. Na kena draki daumaka kei na qele bulabula sa dau tamusuki kina vakalevu na olive, na witi, bali, kei na vaini. Na qoli ena Wasawasa ko Kalili sa rawa kina na ivoli levu ka sa ivurevure ni iyau levu. A dau tiko voli vakalevu e Kalili na iVakabula.

    Na Wasawasa o Kalili

    Na Wasawasa o Kalili e koto ena vualiku kei Isireli. A dau vakatokai talega me Wasawasa ko Kinereci ena Veiyalayalati Makawa kei na Drano ko Kenisareti se ko Taiperia ena Veiyalayalati Vou. A vakavuvulitaka e vica na ivunau mai kea ko Jisu (Maci. 13:2). E vaka na ibulibuli ni pea na wasawasa, e 12.5 na maile (20 na kilomita) na kena balavu ka 7.5 na maile (12 na kilomita) na kena raba ena vanua rabailevu duadua. E davo koto ena 680 na fiti (207 na mita) ena ruku ni iyalayala ni waitui, ka sa dau vakavuna me katakata na cagi e vakavolivolita. Na cagi batabata e siro sobu mai na veidelana sa dau vakavuna na cava vakasauri ni sota vata kei na cagi katakata e dela ni wai (Luke 8:22–24).