Pita

Ena Veiyalayalati Vou a kilai taumada ko Pita me Simioni se ko Saimoni (2 Pita 1:1), e dua na gonedau ni Peciseita ka vakaitikotiko mai Kapenaumi vata kei na watina. A vakabula na tinai wati Pita ko Jisu (Mari. 1:29–31). A kacivi vata kei na tacina o Adriu, ko Pita, me rau tisaipeli i Jisu Karisito (Maci. 4:18–22; Mari. 1:16–18; Luke 5:1–11). Na yacana vaka-Aramea ko Kifa, a kena ibalebale “na daurairai” se na “vatu,” a solia vua na Turaga (Joni 1:40–42; VJS, Joni 1:42 [Ai Kuri]). E dina ni tukuni ena Veiyalayalati Vou eso na nona malumalumu vakayago ko Pita, e vakaraitaki talega kina ni a vorata na nona malumalumu ka vakaukauwataki ena nona vakabauti Jisu Karisito.

A vakatusa ko Pita ni Karisito ko Jisu ka Luve ni Kalou (Joni 6:68–69), ka digitaki koya na Turaga me taura tu na idola ni matanitu e vuravura (Maci. 16:13–19). Ena Ulunivanua ni Veivakamataliataki, a raica ko Pita na iVakabula sa vakamataliataki, ka vakakina ko Mosese kei Iliesa (Ilaija) (Maci. 17:1–9).

Ko Pita na iApositolo liu ena nona gauna. Ni oti na nona mate, Tucake tale, ka Lako cake na iVakabula, a kaciva vata na Lotu ko koya ka liutaka na nona lesi e dua na iApositolo me sosomitaki Jutasa Isikarioti (Cakacaka 1:15–26). Erau a vakabula ko Pita kei Joni e dua na tamata sucu gera (Cakacaka 3:1–16) ka rau a sereki mai na vale ni veivesu (Cakacaka 5:11–29; 12:1–19). A kau ena imatai ni gauna na kosipeli vei ira na kai Matanitu Tani ena gauna ni veiqaravi nei Pita (Cakacaka 10–11). Ena veigauna e muri oqo, eratou a lako sobu mai lomalagi ko Pita, Jemesa, kei Joni ka mai solia na Matabete i Melikiseteki kei na kena idola vei rau ko Josefa Simici kei Oliva Kaudari (V&V 27:12–13; 128:20).

iMatai ni ivola i Pita

Na imatai ni ivola a volai mai “Papiloni” (se mai Roma beka) ka vakau vei ira na Yalododonu ena vanua sa vakatokai tu ena gauna oqo me Esia Lailai ni se qai oti ga na nona vakacacani ira na lotu vakarisito ko Nero.

Na wase 1 e tukuna na nona sa tabaki rawa mai na Karisito me mai Dauveivueti. Na wase 2–3 e vakamacalataki kina ni ko Karisito na vatunitutu liu ni Lotu, ni tu vei ira na Yalododonu e dua na matabete tabu, ka ni a vunau vei ira na yalo ena valeniveivesu na Karisito. Na wase 4–5 e vakamacalataka na vuna e vunautaki kina na kosipeli vei ira na mate kei na vuna me ra vakania kina na sipi ko ira na italatala qase.

iKarua ni ivola i Pita

Na wase 1 e vakauqeti ira na Yalododonu me ra vakadeitaka na nodra ilesilesi kei na nodra veidigidigi. Na wase 2 e veivakasalataki me ia na qaqarauni mai na ivakavuvuli vakailasu. Na wase 3 e tukuna me baleta na veigauna mai muri kei na iKarua ni nona Lako mai na Karisito.