Lako Yani, Na
    Footnotes
    Theme

    Lako Yani, Na

    E dua na ivola a vola ko Mosese ena Veiyalayalati Makawa ka vakamacalataka na nodra biuti Ijipita mai na Isireli. Na itukutuku taumada kei Isireli me vaka e volai ena Lako Yani e rawa ni wasei vakatolu: (1) na nodra vakabobulataki na tamata ki Ijipita, (2) na nodra biuti Ijipita mai ena veiliutaki nei Mosese, kei na (3) nodra yalodina ena veiqaravi vua na Kalou ena nodra bula vakalotu kei na nodra bula vakapolitiki.

    Na imatai ni iwasewase, Lako Yani 1:1–15:21, e vakamacalataka na nodra vakararawataki na Isireli mai Ijipita; na itukutuku taumada kei na nona lesi ko Mosese; na Lako Yani kei na kena yaco na Lako Sivia; kei na tayabe ki na Wasa Damudamu, na vakarusai ni mataivalu nei Fero, kei na nona sere ni qaqa ko Mosese.

    Na ikarua ni iwasewase, Lako Yani 15:22–18:27, e tukuna na sereki kei Isireli kei na veika e yaco ena ilakolako mai na Wasa Damudamu ki Saineai; na waigaga mai Mara, na soli mai ni toa kei na mana, na vakarokorokotaki ni Siga ni Vakacecegu, na isolisoli cakamana ni wai mai Rifitimi, kei na ivalu mai kea vata kei ira na Amalekaiti; na tadu yani nei Jecoro ki na keba kei na nona ivakasala me baleta na nodra liutaki na tamata.

    Na ikatolu ni iwasewase, wase 19–40, e baleta na nodra vakatabui na Isireli me ra qarava na Kalou ena veika bibi a vakayacori mai Saineai. Sa vakatikori ira na tamata na Turaga me dua na matanitu ni bete ka matanitu tabu; sa solia na iVakaro e Tini; ka solia na idusidusi me baleta na valecavu, na kena iyaya, kei na sokalou e vakayacori kina. Sa qai tarava mai na itukutuku ni nodra ivalavala ca na tamata ena nodra sokalou tiko ki na matakau koula, qai tinia na itukutuku ni kena tara na valecavu kei na vakarautaki ni veiqaravi ena vakayacori kina.