iVolatabu
    Footnotes
    Theme

    iVolatabu

    Na vakasokumuni vata ni volavola vaka-Iperiu kei na vakabauta Vakarisito ka koto kina na ivakatakila vakalou. Na iVolatabu e nodra cakacaka na parofita e vuqa kei ira na dauvolavola vakauqeti ka ra cakacaka ena veivakauqeti ni Yalo Tabu (2 Pita 1:21).

    Na iVolatabu ni Vakabauta Vakarisito e rua na kena iwasewase, ka sa kilai levu tu me Veiyalayalati Vou kei na Veiyalayalati Makawa. Na Veiyalayalati Makawa e lewena na ivola eso ni ivolanikalou era a vakayagataka na Jiu mai Palesitaina ena nona gauna ni veiqaravi e vuravura na Turaga. Na Veiyalayalati Vou e lewena na volavola eso ena veitabayabaki vakaiapositolo ka kilai ni tautauvata kei na ivolanikalou vaka-Jiu ena kena savasava kei na kena kaukauwa. Na ivola eso ni Veiyalayalati Makawa e tauri mai na dua na ivola era vola na tamata ena dua na vanua ka sa tu ena vuqa na veisenijiuri ka volai ena vosa vaka-Iperiu, ia na Veiyalayalati Vou e nodra cakacaka e dua ga na itabatamata ka volai ga vakalevu ena vosa vaka-Kirisi.

    Na Veiyalayalati Makawa sai koya na lawa ka a soli vei Mosese ena gauna era sa besetaka kina na Isireli na taucoko ni kosipeli a tu vei ira na tamata ni Kalou ena itekivu ni bula vakayago. Na Veiyalayalati Vou sai koya na kosipeli me vaka e vakavuvulitaka ko Jisu Karisito.

    Ena iVolatabu vaka-Iperiu (na Veiyalayalati Makawa) e wasei tu vakatolu na kena ivola: na Lawa, o ira na Parofita, kei na Volavola eso. Na iVolatabu a vakayagataki ena vuravura Vakarisito e wasewasea na ivola eso me vaka na kedra iulutaga, me vaka na itukutuku makawa, na serekali kei na veika vakaparofita.

    Na ivola eso ni Veiyalayalati Vou e dau vakaoqo na kena ituvatuva: na va na Kosipeli kei na Cakacaka; na ivola i Paula; na ivola raraba nei Jemesa, Pita, Joni, kei Juta; kei na iVakatakila nei Joni.

    Na Lotu i Jisu Karisito ni Yalododonu Edaidai e vakarokorokotaka ka doka na iVolatabu ka vakadeitaka talega ni sa tomana tiko na Turaga na ikuri ni ivakatakila mai vei ira na Nona parofita ena iotioti ni gauna ka tokona ka vakamatatataka na itukutuku vakaivolatabu ni nona veiqaravi na Kalou ki na kawatamata.

    True