Paula, Na iVola Eso e Vola ko

A vola mai Korinica na ivola vei ira na kai Cesalonaika ko Paula ena ikarua ni nona ilakolako vakaulotu. E vakamacalataki ena Cakacaka 17 na nona cakacaka mai Cesalonaika. A vinakata me lesu tale ki Cesalonaika, ia a sega ni rawa me vakakina (1 Cesa. 2:18). A mani talai Timoci me laki vakauqeti ira na sa saumaki mai ka kauta lesu mai na itukutuku me baleti ira. Na imatai ni ivola e tukuni kina na nona vakavinavinaka ni sa lesu mai ko Timoci. Na ikarua ni ivola a volai ena dua na gauna lekaleka e muri.

A volavola vei ira mai Korinica ko Paula ena ikatolu ni nona ilakolako vakaulotu me sauma na taro ka vakadodonutaka na veika e cala ena kedra maliwa na Yalododonu e Korinica.

Na ivola vei ira mai Kalatia e rawa ni a volai ki na veitabana ni Lotu e Kalatia raraba. Eso na lewe ni Lotu era sa biuta tiko na kosipeli ena vuku ni lawa vaka-Jiu. Ena ivola oqo, e vakamacalataka kina ko Paula na inaki ni lawa i Mosese kei na yaga ni lotu vakayalo.

A vola mai Korinica ko Paula na ivola vei ira mai Roma, ka dua na kena inaki me vakarautaki ira na Yalododonu mai Roma me baleta e dua na veisiko ka nakita tiko me vakayacora vei ira. E vakadeitaki talega ena ivola oqo na ivunau eso ka ra veibataka tiko eso na Jiu era sa vuki ki na vakabauta Vakarisito.

A vola na ivola eso oqo ko Paula ena nona tiko vakavesu ena imatai ni gauna mai Roma.

A vola na ivola vei ira mai Filipai ko Paula vakabibi me vakaraitaka na nona vakavinavinaka kei na nona taleitaki ira na Yalododonu mai Filipai ka me vakayalovinakataki ira mai na kena rarawataki na nona sa tauri vakavesu tu ena dua na gauna balavu.

A vola na ivola vei ira mai Kolosa ko Paula me sauma kina e dua na itukutuku ni ra sa vakacalai tiko vakalevu na Yalododonu mai Kolosa. Era vakabauta tiko ni rawa ni ra yaco me ra tamata uasivi sara ena nodra vakamuria vakavinaka na veicakacaka tabu vakalotu eda rawa ni raica ka sega ena kena tarai cake na ivakarau ni bula e Vakarisito.

E bibi sara vakalevu na ivola vei ira mai Efeso, ni tu kina na ivakavuvuli nei Paula me baleta na Lotu i Karisito.

Na ivola vei Filimoni e dua na ivola me baleti Onisimo, e dua na bobula ka butako mai vua na nona turaga, ko Filimoni, qai dro sara ki Roma. A qai talai Onisimo lesu vua na nona turaga ko Paula vata kei na ivola ka kerea tiko kina me vosoti ko Onisimo.

A vola ko Paula na ivola vei ira na Iperiu vei ira na lewenilotu Jiu ni Lotu me vakauqeti ira ni lawa i Mosese sa vakayacori oti vei Karisito ka sa vakaisosomitaka na lawa ni kosipeli i Karisito.

A vola na ivola eso oqo ko Paula ni oti na nona sereki mai valeniveivesu e Roma ena imatai ni gauna.

A lako ki Efeso ko Paula, ka biuti Timoci tu kina me tarova na kena tubu tiko mai eso na itukutuku veikauyaki me baleta na ivunau kei na Kalou, ka nona inaki me na qai lesu tale mai. A vola na imatai ni nona ivola vei Timoci, mai Masitonia beka, me vakasalataki koya ka vakayaloqaqataki koya me baleta na nona qarava vakavinaka na nona itavi.

A vola ko Paula na nona ivola vei Taito ena dua na gauna ni sa sereki mai valeniveivesu. E rairai a sikovi Kiriti beka, na vanua a veiqaravi voli kina ko Taito. Na ivola a baleta vakatabakidua na bula dodonu kei na bula vakaivakarau ena loma ni Lotu.

A vola ko Paula na ikarua ni nona ivola vei Timoci ena gauna a tiko voli kina e valeniveivesu ena ikarua ni gauna, ni sa voleka sara toka na gauna me vakamatei kina ko Paula ena vuku ni nona vakabauta. E koto ena ivola oqo na iotioti ni vosa nei Paula ka vakaraitaka na yaloqaqa kei na vakanuinui vakasakiti a sotava kina na mate.