Tevita

E dua na tui ni Isireli makawa ena Veiyalayalati Makawa.

O Tevita e luvei Jese ena mataqali i Juta. O koya e dua na cauravou yaloqaqa ka a vakamatea e dua na laione, dua na bea, kei na tuwawa ni Filisitia o Koliaci (1 Samu. 17). A digitaki ka lumuti me tui Isireli ko Tevita. Me vakataki Saula ena nona gauna ni bula vakauabula a cakava eso na ivalavala ca bibi, ia, erau duidui ga kei Saula baleta o koya a yaco dina mai vua na yalo bibivoro. A mani kunea kina ko koya na veivosoti, vakavo ga ena nona labati ko Uraia (V&V 132:39). E rawa ni wasei vaka va na nona bula: (1) mai Peceliema, na vanua a dau vakatawa sipi voli kina (1 Samu. 16–17); (2) ena nona itikotiko na Tui ko Saula (1 Samu. 18:1–19:18); (3) ni vuni voli (1 Samu. 19:18–31:13; 2 Samu. 1); (4) ni Tui Juta mai Epironi (2 Samu. 2–4), e muri ni tui vei ira kece na Isireli (2 Samu. 5–24; 1 Tui 1:1–2:11).

Na nona ivalavala ca ko Tevita ni veibutakoci vata kei Pacisepa a tarava mai e vuqa na kalouca ka vakaimawe sara vakalevu ena iotioti ni ruasagavulu na yabaki ni nona bula. A yaco na bula sautu ena vanua taucoko ena nona gauna ni veiliutaki, ia a kune rarawa ko Tevita me isau ni nona ivalavala ca. A dau yaco vakawasoma na veilecalecavi ena loma ni matavuvale, a yaco sara kina na veisaqasaqa e matanalevu ena vukudrau ko Apisalome kei Atonija. Na veika eso oqo sa vakayacori ga kina na veika sa tukuna ko Necani na parofita ni na yaco vei Tevita ena vuku ni nona ivalavala ca (2 Samu. 12:7–13).

E dina ni yaco na veika dredre oqo, ia na nona gauna ni veiliutaki ko Tevita e gauna vakasakiti duadua ena itukutuku kei Isireli, baleta ni (1) a vakaduavatataka na veimataqali ki na dua na matanitu, (2) a rawata na kena taukeni na vanua ka sega tale ni dua na kena veiba, (3) a yavutaka na cicivaki ni matanitu ena lotu dina me rawa ni yaco kina me lawa kei Isireli na loma ni Kalou. Ena vuku ni veika oqo, a qai kilai kina ena veigauna e muri na gauna ni veiliutaki nei Tevita me itabayabaki koula ena vanua ka mataqali vata kei na veitabayabaki lagilagi cake ni sa lako mai kina na iVakabula (Ais. 16:5; Jere. 23:5; Isi. 37:24–28).

Na bula nei Tevita e vakaraitaka na kena gadrevi vei keda kece na tamata me da na ivalavala dodonu tikoga ka vosota me yacova na ivakataotioti. Ni se cauravou gone, a dau tukuni ni o koya e dua na tamata sa vaka na yalona na Turaga, (1 Samu. 13:14); ni sa tamata bula, sa dau vosa ena veivakauqeti ni Yalo ka taura e vuqa sara na ivakatakila. Ia a sauma e dua na isau bibi sara ni nona talaidredre ena ivakaro ni Kalou (V&V 132:39).