Mosese

E dua na parofita ni Veiyalayalati Makawa ka a kauti ira tani na Isireli mai na veivakabobulataki e Ijipita ka solia vei ira eso na lawa ka vakatakila mai na Kalou me baleta na lotu, veimaliwai, kei na kakana.

Na veiqaravi nei Mosese a lako sivita na iyalayala ni nona bula vakayago. E vakavuvulitaka o Josefa Simici, ena veitokani nei Ilaija, a lako mai ko koya ki na Ulunivanua ni Veivakamataliataki ka solia na idola eso ni matabete vei Pita, Jemesa, kei Joni (Maci. 17:3–4; Mari. 9:4–9; Luke 9:30; V&V 63:21).

A rairai ko Mosese vei Josefa Simici kei Oliva Kaudari ena i ka 3 ni Epereli 1836, ena valetabu mai Katiladi, e Oaio, ka solia vei rau na idola ni nodra vakasoqoni vata na Isireli (V&V 110:11).

E vuqa na ka e tukuni ena ivakatakila ni gauna oqo e baleti Mosese. Sa dau cavuti vakawasoma ena iVola i Momani, ka da vulica mai na Vunau kei na Veiyalayalati na nona veiqaravi (V&V 84:20–26) ka ciqoma na matabete mai vua na vugona ko Jecoro (V&V 84:6).

E vakadeitaka talega na ivakatakila ni gauna oqo na itukutuku vakaivolatabu ni nona veiqaravi vei ira na luvei Isireli ka vakadeitaka tale ni sai koya ka a vola na lima na ivola ka tekivu kina na Veiyalayalati Makawa (1 Nif. 5:11; Mosese 1:40–41).

Vakabulai mai vua na luvei Fero yalewa, L.Y 2:1–10.
Dro ki Mitiani, L.Y 2:11–22.
Sa rairai vua na agilosi ni Turaga mai na dua na veikau kama, L.Y 3:1–15.
Sa tukuna ni na tauvi ira na kai Ijipita na mate dau veitauvi, L.Y 7–11.
Sa vakayacora na Turaga na lako sivia, L.Y 12:1–30.
Liutaki ira na luvei Isireli ena nodra kosova na Wasa Damudamu, L.Y 14:5–31.
Sa biuta yani na Turaga na mana ena vanua dravuisiga, L.Y 16.
Sa mokuta na vatu mai Orepi ka drodro mai kina na wai, L.Y 17:1–7.
Erau sa laveta cake tiko na ligana ko Eroni kei Uri me rawa ni qaqa kina ko Josua ena nona veivala kei ira na Amaleki, L.Y 17:8–16.
Sa vakasalataki koya ko Jecoro, L.Y 18:13–26.
Sa vakarautaki ira na tamata me baleta na nona rairai mai na Turaga ena ulunivanua ko Saineai, L.Y 19.
Sa vakatakila na Turaga ki vua na iVakaro e Tini, L.Y 20:1–17.
A ra sa raica na Kalou ko koya kei na le vitusagavulu na qase, L.Y 24:9–11.
A sa vorolaka na vatu raraba, ka vakavurumemeataka na luve ni pulumokau koula, L.Y 32:19–20.
A rau sa veivosaki kei Mosese ko Jiova, L.Y 33:9–11.

Na ivola i Mosese

E dua na ivola ena Mataniciva Talei ka tu kina na ivakadewa veivakauqeti nei Josefa Simici ni matai ni vitu ni iwase ni iVakatekivu.

Na wase 1 e tukuni kina e dua na raivotu ka raica kina na Kalou ko Mosese, o koya a qai vakatakila vua na ituvatuva taucoko ni veivakabulai. Wase 2–5 e dua na itukutuku ni nona Buli kei na nona Lutu na tamata. Wase 6–7 e tu kina e dua na raivotu me baleti Inoki kei na nona veiqaravi e vuravura. Na wase e 8 e koto kina e dua na raivotu me baleti Noa kei na Waluvu levu.

Na lima na ivola i Mosese

Na imatai ni lima na ivola ena Veiyalayalati Makawa era vakatokai me ivola i Mosese. Na peleti parasa a taura mai vei Lepani ko Nifai era tu kina na ivola i Mosese (1 Nifai 5:11).