Simici, Josefa Lailai
    Footnotes
    Theme

    Simici, Josefa Lailai

    Na parofita a digitaki me vakalesuya tale mai na Lotu dina i Jisu Karisito ki vuravura. A sucu ko Josefa Simici ena yasana ko Vemoni e Amerika ka a bula voli mai na 1805 ki na 1844.

    Ena 1820, erau a rairai kina na Kalou na Tamana kei Jisu Karisito vei Josefa, ka qai kila kina ni sega ni dua na lotu e tu e vuravura e dina (JS—AT 1:1–20). A qai veisiko mai muri na agilosi ko Moronai, ka mai vakatakila na vanua e vunitaki tu kina na peleti koula ka tu kina na kedra itukutuku na tamata era a bula e liu e Amerika (JS—AT 1:29–54).

    A vakadewataka ko Josefa na peleti koula ka qai tabaka ena 1830 me iVola i Momani (JS—AT 1:66–67, 75). Ena 1829, a ciqoma kina na kaukauwa ni matabete mai vei Joni na Dauveipapitaisotaki kei Pita, Jemesa kei Joni (V&V 13; 27:12; 128:20; JS—AT 1:68–70).

    Ena veidusimaki ni Kalou, ena ika 6 ni Epereli 1830, eratou a tauyavutaka ko Josefa kei na lewe vica tale na Lotu i Jisu Karisito sa vakalesui mai (V&V 20:1–4). Ena veiliutaki nei Josefa, sa tubu kina na Lotu mai Kenada, Igiladi, kei na tokalau kei Amerika, vakauasivi e Oaio, Misuri kei Ilinoi. A muri Josefa voli kei ira na Yalododonu na veivakacacani ca sara ena veivanua kecega era laki tikora. Ena 27 ni June 1844, erau a vakamatei kina ena vuku ni nodrau vakabauta mai Kaceji, Ilinoi e Amerika ko Josefa kei na tuakana ko Airame.

    Na ivolanikalou e kauta mai na Parofita ko Josefa Simici

    A vakadewataka ko Josefa e dua na iwase ni peleti koula a solia vua na agilosi ko Moronai, ia na vakavakadewa oqori a tabaki ena 1830 me iVola i Momani. A ciqoma talega e vuqa na ivakatakila mai vua na Turaga ka tuvalaki mai kina na ivunau taumada kei na tauyavu ni Lotu. E vuqa na ivakatakila oqori era qai biu vata ena ivola ka sa kilai tu ena gauna oqo me Vunau kei na Veiyalayalati. A qarava talega o koya na kena vakarautaki kei na kena tabaki na Mataniciva Talei, ka ra lewena tu na ivakavakadewa vakauqeti ni veika era vola o Mosese, Eparaama, kei Maciu, na veitikina digitaki mai na kena itukutuku kei na nona ivakadinadina, kei na tinikatolu na iyatuvosa ivunau ka vakabauta ni Lotu