Alma, Alma ne Babanyin
Mormon Nwoma no mu no, ɔno nye ɔtsɛmbuafo panyin a odzi kan na Nephi ɔman no no nkɔnhyɛnyi. N’ahyɛse ber mu no ɔpɛɛ dɛ ɔsɛɛ Asɔr no (Mosiah 27:8–10). Naaso, ɔbɔfo yii no ho kyerɛɛ no ma ɔsakyeree na ɔgyee asɛmpa no (Mosiah 27:8–24; Alma 36:6–27). Ekyir no ogyaa dɛ ɔbɛyɛ ɔtsɛmbuafo panyin ama oeetum akyerɛkyerɛ nkorɔfo no (Alma 4:11–20).
Alma nwoma no
Ɔyɛ nwoma a ɔatsew no ho wɔ Mormon Nwoma no mu. Nkɔnhyɛfo Alma, ne babanyin Alma, nye ne babanyin Helaman hɔn nkyerɛwee a woetwitwa do esinesin na ɔwɔ mu. Ndzɛmba a wɔakã ho nsɛm wɔ mu no sisii fi bɛyɛ mfe 91 kɛpem mfe 52 ansaana Wɔrowo Christ. Nsɛm etsir 63 wɔ nwoma no mu. Etsir 1–4 no fa Nehor na Amlici hɔn akadofo no a wɔtseew etua wɔ Nephifo do no ho. Dɛm akokoeko no no nsunsuando kã adzesɛɛ kɛse a osii Nephifo hɔn abakɔsɛm mu bodu dɛm aber no ho. Etsir 5–16 no fa Alma ne asɛmpasomafo akwantu a odzii kan tui, nye ne nsɛm so a ɔfa Oguanhwɛfo Pa (Alma 5) nye asɛmpa a ɔnye Amulek kɛkãe wɔ Ammonihah kurow mu no ho. Etsir 17–27 no kã Mosiah ne mbabanyin no hɔn nyamedwuma a wɔyɛe wɔ Lamanfo mu no ho asɛm. Etsir 28–44 no kã Alma ne nyamesɛm a ɔkãe no mu dza no ho hia kɛse no mu bi ho asɛm. Tsir 32 mu no Alma dze asɛm no too aba ho; ɔkãa ne nsakyer ho asɛm kyerɛɛ ne babanyin Helaman wɔ Tsir 36. Etsir 39–42 no yɛ afotu a Alma dze maa ne babanyin Corianton a nna ɔrobɔ ɔbra bɔn no; dɛm nyamesɛm a no ho hia yi kyerɛkyerɛ pɛrpɛrdzi, ehumbɔbɔr, Owusoɛr na Werdambɔ mu yie. Etsir 45–63 no kã Nephifo hɔn akokoeko wɔ dɛm aber no mu nye ber a wɔhyɛ Hagoth ase no hɔn tukɔr ho asɛm. Banodzifo etsitsir tsetse dɛ Ɔsahen Moroni, Teancum na Lehi nam hɔn akokodur na mbɔdzembɔ na ndzeyɛɛ wɔ ne mber pa mu boae ma wɔkoraa Nephifo do.