Mormon, Nephi Nkɔnhyɛnyi
Nephi nkɔnhyɛnyi, nsordaa mu ɔsahen katakyi, Mormon Nwoma mu nyia ɔdze kyerɛwsɛm siei. Mormon tsenaa ase bɛyɛ Wɔwoo Christ n’ekyir mfe 311–385 (Morm. 1:2, 6; 6:5–6; 8:2–3). Ammaron hyɛɛ Mormon dɛ ɔnyɛ ahoboa dɛ ɔbɔhwɛ nkyerɛwee ne nsiei nye dza wɔbɛkyerɛw no do (Morm. 1:2–5; 2:17–18). Ɔyɛɛ nsordaa mu banodzinyi no nkwa nda dodowara mu, ɔhyɛɛ ase fi ber a odzii mfe duenum no mu (Morm. 2:1–2; 3:8–12; 5:1; 8:2–3). Mormon kyerɛɛw nankasa ne bra mu nsɛm wiei no, otwitwaa Nephi ne nsɛm a ɔwɔ mprɛtse akɛse no do no esinesin dze baa Mormon mprɛtse no do. Ekyir no ɔdze ne kyerɛwsɛm krɔnkrɔn no hyɛɛ ne ba Moroni nsa. Dɛm mprɛtse yi kã mprɛtse a Joseph Smith hwɛɛ mu kyerɛɛ Mormon Nwoma no ase no ho.
Mormon ne Nsɛm no
Nwoma kakraba bi a ɔwɔ Mormon Nwoma no mu. Amaleki ne nsɛm a odzi ewiei wɔ Omni nwoma no mu, na nsɛm a odzi kan wɔ Mosiah nwoma mu no ne ntamu, na Mormon a ɔyɛ kyerɛwsɛm nyina ne samufo no dze dɛm nsɛm kakra yi hyɛɛ finimfin. (Hwɛ “Nsɛm kakra bi a wɔakã dze akyerɛkyerɛ Mormon Nwoma mu” no a odzi Mormon Nwoma no kan.)
Mormon nwoma no
Nwoma bi a ɔwɔ kyerɛwsɛm mboano nwoma no a wɔfrɛ no Mormon Nwoma no mu. Tsir 1–2 kã mbrɛ Ammaron, Nephi Nkɔnhyɛnyi no sii kasae kyerɛɛ Mormon wɔ ber na bea a ne nsa bɛka mprɛtse no. Bio, ɔkõ akɛse no hyɛɛ ase, na osian nkorɔfo no emumuyɛ ntsi, wɔfaa Nephifo Baasa no kɔree. Tsir 3–4 kã nnuho asɛm a Mormon paa mu kãe kyerɛɛ nkorɔfo no, mbom nna hɔn akoma epirim ara yie, na emumuyɛdze kɛse soɛree kyɛɛn mbrɛ esi Israel mu pɛn. Tsir 5–6 kã ɔkõ a odzi ewiei a osii Nephifo na Lamanfo ntamu no ho asɛm. Wɔdze Mormon kãa Nephi amamfo no mu pii ho kum hɔn. Tsir 7 no, ansaana Mormon rubowu no, ɔsee nkorɔfo a—nna wɔwɔ hɔ na hɔn a wɔbɛba ndaamba no dɛ—wonnu hɔnho. Etsir 8–9 no kã dɛ ekyir no Mormon ne ba, Moroni, nko, na ɔkae. Ɔkyerɛɛw owu na ewudzi nyanyan a osisii ekyir no nye mbrɛ Nephifo ewiei bɛyɛe na nsɛm a wɔdze bɛma mbasantsen a wɔbɛba ekyir yi nye hɔn a wɔbɛkenkan dɛm kyerɛwsɛm yi.