Adzesua Mboa horow
Paul no Nwoma


Paul no Nwoma

Nwoma duanan na ɔwɔ Ahyɛmu Fofor no mu a ɔyɛ nkrataa ankasa a Ɔsomafo Paul kyerɛwee dze kɛmaa Asɔrmba no. Wobotum akyekyɛ mu ekuwekuw dɛ mbrɛ odzidzi do yi:

Thessalonicafo 1 na 2 (wɔ Christ N’Awoo Ekyir mfe 50–51)

Paul n’asɛmpasomafo akwantu a otsĩa ebien no mu no na ɔkyerɛɛw nwoma no fi Corinth dze kɛmaa Thessalonicafo. Wɔakã n’edwuma a ɔyɛe wɔ Thessalonica no ho asɛm wɔ Ndwuma 17. Nna nkyɛ ɔpɛ dɛ ɔsan ba Thessalonica, naaso oenntum (1 Thes. 2:18). Dɛm ntsi ɔsomaa Timothy dɛ ɔnkɛhyɛ nkorɔfo a wɔasakyer hɔn no dzen na ɔmbɛkã mbrɛ hɔnho tse ho asɛm nkyerɛ no. Nwoma a odzi kan no yɛ Timothy ne nsanee mu nsɛm ho ndaase. Mber kakra guu mu no nna ɔkyerɛɛw nwoma a otsĩa ebien no.

Corinthfo 1 na 2, Galatiafo, Romefo (Christ N’Awoo Ekyir mfe 55–57)

Paul n’asɛmpasomfo akwantu a otsĩa ebiasa no mu na ɔkyerɛɛw nwoma no dze kɛmaa Corinthfo dɛ ɔdze riyiyi nsɛmbisa ano na ɔdze atsentsen basabasayɛ bi a esi Ahotseweefo a wɔwɔ Corinth mu no.

Ɔbɛyɛ dɛ nna wɔakyerɛw Galatiafo nwoma no dɛ wɔdze rekɛma Asɔr pii a ɔwɔ Galatia no nkorbata nyina. Osian Jewfo mbra ntsi nna Asɔrmba no bi rigyaa asɛmpa no ekyir dzi. Paul kyerɛkyerɛɛ Moses ne mbra no botae, na sunsum mu nyamesom no bo a ɔsom wɔ dɛm krataa yi mu.

Paul kyerɛɛw nwoma no fi Corinth dze kɛmaa Romefo, dɛ ɔdze rikesiesie Rome Ahotseweefo no wɔ nsera a ɔwɔ enyidado dɛ ɔbɔkɔ akɛsera hɔn no ho. Dɛm krataa yi so si do kã nkyerɛkyerɛ a nna ayɛ Jewfo a wɔasakyer hɔn abɛyɛ hɔn Christianfo mu ekyingye no ho asɛm.

Philippifo, Colossaefo, Ephesusfo, Philemon, Hebrewfo (wɔ Christ N’Awoo Ekyir mfe 60–62)

Paul kyerɛɛw nwoma yinom wɔ ber a ɔda efiadze ne ber a odzi kan wɔ Rome.

Paul kyerɛɛw nwoma no a ɔdze kɛmaa Philippifo no tsitsir dɛ ɔdze rekyerɛ ne ndaase na no dɔ a ɔwɔ dze ma Ahotseweefo a wɔwɔ Philippi no na ɔdze akyekye hɔn werɛ wɔ yaw a woridzi wɔ mber tsentsen a wɔdze no ato efiadze no ho.

Paul kyerɛɛw nwoma dze kɛmaa Colossaefo wɔ amandzɛɛbɔ bi a ɔtsee a ɔkyerɛ dɛ Ahotseweefo a wɔwɔ Colossae no rohwe ase wɔ mfom kɛse mu no ho. Wɔgyee dzii dɛ mudzi nam ahwɛyie a yɛyɛ wɔ ayɛdze a yɛyɛ wɔ guado nko mu ba kyɛn dɛ yebotu Christ su ho mpon.

Nwoma a wɔdze kɛmaa Ephesusfo no ho hia kɛse, osiandɛ Paul ne nkyerɛkyerɛ a ɔfa Christ N’Asɔr ho no wɔ mu.

Philemon nwoma no yɛ kokoamu krataa bi a ɔfa Onesimus, akowaa bi a oewia no wura, Philemon, na oeguan kɔ Rome ho asɛm. Paul dze krataa somaa Onesimus dɛ ɔmfa nsan nkɛma no wura na ɔmfa no bɔn nkyɛ no.

Paul kyerɛɛw nwoma dze kɛmaa Hebrewfo no dze maa Jewfo a wɔwɔ Asɔr no mu no dze ama wɔaatse ase dɛ wɔahyɛ Moses mbra no mã wɔ Christ mu na dɛ Christ n’asɛmpa mbra no ahyɛ ananmu.

Timothy 1 na 2, Titus (wɔ Christ N’Awoo Ekyir mfe 64–65)

Paul kyerɛɛw nwoma yinom wɔ ber a woyii no fii efiadze wɔ Rome ne ber a odzi kan no ekyir.

Paul tuu kwan kɔr Ephesus, hɔ na ogyaa Timothy dɛ ɔnhwɛ mbɔ huhuhuhu a esi hɔ no ano, a ɔwɔ n’adwen mu dɛ ekyir no ɔbɛsan aba hɔ. Ɔkyerɛɛw no nwoma a odzi kan no dze kɛmaa Timothy, ɔbɛyɛ dɛ fi Macedonia, dɛ ɔdze rutu no fo na ɔdze ahyɛ no nkuran wɔ n’edwumayɛ mu.

Paul kyerɛɛw nwoma no dze kɛmaa Titus wɔ aber no a woyii no fii efiadze no. Ɔbɛyɛ dɛ ɔkɛseraa Crete, bea a nna Titus rosom wɔ no. Krataa no kã tsitsir ara ɔbra pa na enyidzi a ɔwɔ Asɔr no mu ho asɛm.

Paul kyerɛɛw no nwoma a otsĩa ebien no dze kɛmaa Timothy wɔ ber a nna ɔda efiadze no ne mpɛn a otsĩa ebien, mber tsiabaa mu ansaana worubokum Paul wɔ ne gyedzi ho ntsi. Nwoma yi mu na Paul ne nsɛm a odzi ewiei no wɔ na ɔkyerɛ akokodur nwanwa na awerɛhyɛmu a ɔdze gyinaa no wu enyim.