Nephi, Helaman ne Babanyin Nephi, ne Babanyin

Nwoma a Nephi, Nephi ne babanyin no kyerɛwee, wɔ Mormon Nwoma no mu. Etsir 1–10 kyerɛ nkɔnhyɛsɛm a ɔfa Ewuradze Ne mbae ho no ne mahyɛ. Wɔdze Christ N’awoo ho asɛnkyerɛdze mae; nkorɔfo no nuu hɔnho; mbom wɔsanee bɛyɛɛ emumuyɛfo. Ekyir no mframa, asaasewosow, ehum a ano yɛ dzen na ɔsɛɛ kɛse sii dze kyerɛɛ Christ No wu. Etsir 11–28 kyerɛ Christ N’America asaase tɔw do mbae. Iyi nye 3 Nephi nwoma no ne ngyinado. Christ Ne nsɛm no pii wɔ hɔ a, ɔtse dɛ Ne nyamesɛm a wɔakyerɛw wɔ Bible mu no (mfatoho bi nye, Matt. 5–7 na 3 Ne. 12–14). Etsir 29–30 yɛ Mormon ne nsɛm a ɔdze ma aman a ɔwɔ nda a odzi ekyir no.

Nwoma yi wɔ nyiyimu eduanan-akron pɛr, ne nyina wɔ tsir kor mu, naaso ɔtserɛw kodu Nephifo hɔn bɛyɛ mfe ahaebiasa abakɔsɛm ho (Christ N’Awoo n’Ekyir, 34–321 no). Mbasantsen pii mu akyerɛwfo, a Nephi kã ho, ma wɔkyerɛwee. Nyiyimu 1–19 kã dɛ Christ no wusoɛr nserae ekyir no, wɔsakyeer Nephifo na Lamanfo nyina ma wobohun asɛmpa no. Asomdwee, ɔdɔ, na koryɛ dzii hen. Nephi esuafo baasa no a, nna Christ akã dɛ wɔntsena asaase do nkɛpem Ne Mbae a Otsĩa Ebien no (3 Ne. 28:4–9), soom nkorɔfo no. Nephi dze kyerɛwsɛm no gyaa ne ba Amos. Nyiyimu 19–47 no yɛ Amos no somdwuma a ɔyɛe no a wɔakyerɛw (mfe 84) nye ne babanyin Amos so dze (mfe 112). Christ N’Awoo Ekyir, afe 201 no, ahantanyɛ hyɛɛ ase dɛ ɔdze basabasayɛ rehɛn nkorɔfo no mu na dɛm ntsi wɔkyekyɛɛ hɔn mu ekuwekuw na wɔhyɛɛ ase tsetseew ator nsɔrbansɔrba dɛ wɔdze rohwehwɛ ahonya (4 Ne. 1:24–34).

4 Nephi ne nyiyimu a odzi ewiei no kyerɛ dɛ nkorɔfo no asan abɛyɛ emumuyɛfo bio (4 Ne. 1:35–49). Afe 305 wɔ Christ N’Awoo Ekyir no, Amos ne babanyin Amos wui na no nuabanyin Ammaron dze kyerɛwsɛm krɔnkrɔn no nyina siei. Ekyir no Ammaron dze kyerɛwsɛm no hyɛɛ Mormon nsa ma ɔkyerɛɛw nsɛm pii a esisi nankasa ne bra mu na afei otwaa no tsia (Morm. 1:2–4).