John, Zebedee ne Babanyin
Ahyɛmu Fofor mu Asomafo Duebien no mu kor, Zebedee ne babanyin, ɔyɛ James no nua. Ne bra ahyɛse no nna ɔyɛ ɔpofonyi (Mark 1:17–20). Ɔbɛyɛ dɛ ɔno nye John Onumanyi no suanyi no a wɔammbɔ ne dzin a ɔwɔ John 1:40 mu no. Ekyir no onyaa ɔfrɛ dɛ ɔmbɛyɛ Jesus Christ No suanyi (Matt. 4:21–22; Luke 5:1–11). Ɔkyerɛɛw John Asɛmpa no, nkrataa ebiasa, nye Nyikyerɛ nwoma no. Ɔyɛ baasa no a nna wɔkã Ewuradze ho ma Onyaan Jairus ne babaa no hɔn mu kor (Mark 5:35–42), wɔ Nsakyeree Bepɔw no do hɔ no (Matt. 17:1–9), nna Gethsemane mu hɔ (Matt. 26:36–46). Wɔ nankasa n’akyerɛw mu no ɔkã dɛ ɔnoara nye osuanyi no a Jesus dɔɔ no no (John 13:23; 21:20) na tse dɛ “osuanyi baako” no (John 20:2–8). Jesus frɛɛ ɔno na no nuabanyin no Boanerges, “senaman mba” (Mark 3:17). Wɔtaa kã noho nsɛm wɔ Mbeamuduamubɔ na Owusoɛr abakɔsɛm no mu (Luke 22:8; John 18:15; 19:26–27; 20:2–8; 21:1–2). Ekyir no wɔpaam John kɔr Patmos, hɔ na ɔkyerɛɛw Nyikyerɛ nwoma no wɔ (Nyi. 1:9).
Wɔtaa bɔ John ne dzin mpɛn pii wɔ nda a odzi ekyir nyikyerɛ mu (1 Ne. 14:18–27; 3 Ne. 28:6; Ether 4:16; N&A 7; 27:12; 61:14; 77; 88:141). Nsɛm yinom si Bible mu nkyerɛwee a ɔfa John ho no pi na ɔma yehu ne kɛseyɛ nye Ewuradze N’edwuma a ohia a ɔdze maa no dɛ ɔbɛyɛ wɔ asaase do wɔ Ahyɛmu Fofor mber no mu nye nda a odzi ewiei no mu. Nda a odzi ekyir kyerɛwsɛm da no edzi pefee dɛ John ennwu na mbom wɔama no kwan dɛ ɔntsena asaase do dɛ ɔsomdwuma mu ɔsomfo nkodu Ewuradze Ne Mbaa a Otsia Ebien no (John 21:20–23; 3 Ne. 28:6–7; N&A 7).
John ne nkrataa no
Ɔwɔ mu dɛ nkrataa ebiasa yinom kyerɛwfo no mmbɔ nankasa ne dzin dze, naaso kwan a ɔfa do kasa no da edzi pefee dɛ John Ɔsomafo no na ɔkyerɛɛw ebiasa no nyina.
1 John 1 tu Ahotseweefo fo dɛ wonya Nyankopɔn N’anyɛnkofa no. Tsir 2 tsi mu kã dɛ Ahotseweefo no ndua setsie do mfa nhu Nyankopɔn na ɔkyerɛkyerɛ hɔn dɛ mma wɔnndɔ wiadze. Tsir 3 frɛ hɔn nyinara dɛ wɔmbɛyɛ Nyankopɔn Ne mba na wɔndodɔ hɔnho nkorkor. Tsir 4 no kyerɛ mu dɛ Nyame yɛ dɔ na Ɔtsena hɔn a wɔdɔ No no hɔn mu. Tsir 5 no kyerɛ mu dɛ Nyankopɔn dua Ahotseweefo hɔn gyedzi a wɔwɔ no Christ mu no do wo hɔn.
2 John no tse dɛ 1 John. No mu na John dzi dɛw osian “ewuraba a ɔasan mu eyi no no” ne mba no hɔn nokwardzi ntsi.
3 John no dze nkamfo ma nyimpa bi a wɔfrɛ no Gaius wɔ no nokwardzi na mboa a ɔdze ma hɔn a wɔdɔ nokwar no.
John Asɛmpa no
Wɔ dɛm Ahyɛmu Fofor nwoma yi mu, John Ɔsomafo gyee dase dɛ (1) Jesus nye Christ no anaadɛ Messiah (2) Jesus yɛ Nyankopɔn Ne ba (John 20:31). Ndzɛmba a osisii Jesus N’abrabɔ mu a ɔkyerɛkyerɛɛ mu no, ɔtoo bo yiyii na ɔhyehyɛe wɔ ber a dɛm botae yi wɔ n’adwen mu. Nwoma no dze Christ Ne gyinabew a ɔwɔ mu ansaana wɔrobɔwo No no hyɛ ase: nna Ɔnye Nyankopɔn wɔ hɔ, Ɔyɛ Nyame, na Ɔno nye ndzɛmba nyina bɔfo. Wɔwoo No wɔ honam mu dɛ Ɔyɛ Egya Ne Ba a Ɔwoo no Kortoo no. John kyerɛw Jesus No somdwuma ho asɛm, otsĩ mu kã No krɔnkrɔnyɛ na No wusoɛr ho asɛm papaapa. Osi no pi dɛ Jesus yɛ Nyame Ne Ba no, ɔnam etumdze, dasegye, nkɔnhyɛfo na Christ nankasa Ne nsɛm do ada no edzi. John kyerɛkyerɛ soronko a ɔda kan na sum ntamu, nokwar na ator mu, papa na bɔn mu, Nyankopɔn na abɔnsam mu. Ɔbɛyɛ dɛ nkyerɛwee biara nnyi hɔ a no mu nsɛm no da Jesus No krɔnkrɔnyɛ na Jewfo hɔn ahemfo hɔn nokwardzi no edzi pefee dɛm.
John kyerɛɛw tsitsir ara faa Jesus No somdwuma wɔ Judea ho, nkanka Ne ɔnnkyebo mu ɔsomdwuma ne dapɛn a odzi ewiei no ho, ber a Matthew, Mark na Luke nom kyerɛɛw tsitsir ara faa No somdwuma wɔ Galilee ho. Ndzɛmba pii a ɔwɔ Asɛmpa yi mu no wɔakyerɛ ase yie wɔ nda a odzi ekyir nyikyerɛ mu (N&A 7 nye N&A 88:138–141).
Ama ehu Jesus N’abrabɔ mu nsɛm a wɔakã ho asɛm wɔ John Asɛmpa no mu no, hwɛ Nsɛmpa no ne Nsaae wɔ ntaekyir nwoma no mu.