Enyidzi kwan a nyimpa fa do nye Nyankopɔn kasa, dua do dze ndaase ma no na obisa nhyira. Yedua Jesus Christ ne dzin do bɔ mpaa ma hɛn Sor Egya. Yebotum ebue hɛn ano abɔ mpaa anaa yɛakã no wɔ hɛn tsir mu. Dza nyimpa dwendwen ho no so, sɛ ɔdze to Nyankopɔn enyim a otum yɛ mpaabɔ. Atseneneefo adwontow tum yɛ mpaabɔ dze ma Nyankopɔn (N&A 25:12).
Mpaabɔ no botae nnyɛ adze a ɔsesã Nyankopɔn ne pɛ, na mbom ɔyɛ adze a ɔboa ma yenya nhyira a Nyankopɔn ahyehyɛ dada dɛ ɔdze rema hɛn nye binom na mbom ɔwɔ dɛ yebisa ama hɛn nsa aakã.
Yɛbɔ mpaa ma Egya no wɔ Christ ne dzin mu (John 14:13–14; 16:23–24). Sɛ hɛn pɛ tse dɛ Christ ne pɛ a, yetum bɔ mpaa wɔ Christ ne dzin mu ampa (John 15:7; N&A 46:30). Afei yebisa ndzɛmba a ɔtsen na ɔnam dɛm ntsi Nyankopɔn dze bɛma (3 Ne. 18:20). Mpaabɔ bi wɔ hɔ a wɔmma ho mbuae osiandɛ kwan biara nnyi ho a ɔkyerɛ Christ ne pɛ mbom ofi nyimpa ne pɛsɛankonya mu ba (James 4:3; N&A 46:9). Nokwar, sɛ yebisa dza ɔnntsen fi Nyankopɔn hɔ a, ɔbɛdan hɛn mbusu (N&A 88:65).