Isaiah
Ahyɛmu Dadaw ber do nkɔnhyɛnyi a ɔhyɛɛ nkɔm fi 740–701 Ansaana Wɔrobɔwo Christ. Ɔyɛ Ɔhen Hezekiah ne ɔfotufo tsitsir, Isaiah nyaa tum wɔ nyamesom nye amambu mu.
Jesus seraa kãa nsɛm a Isaiah kãe no mpɛn pii kyɛɛn dza Ɔseraa kãa dza nkɔnhyɛnyi biara kãe. Peter so seraa kãa Isaiah ne nsɛm mpɛn pii, John na Paul so dɛmara wɔ Ahyɛmu Fofor no mu. Mormon Nwoma na Nkyerɛkyerɛ na Ahyɛmudzi mu no wɔakã nsɛm pii a Isaiah kãe wɔ mu kyɛn nkɔnhyɛnyi biara, na ɔboa papaapa so ma wɔkyerɛ Isaiah ne nsɛm ase. Nephi dze Isaiah ne kyerɛwsɛm no kyerɛkyerɛɛ no nkorɔfo (2 Ne. 12–24; Isa. 2–14). Ewuradze kãa kyerɛɛ Nephifo no dɛ “Isaiah ne nsɛm mu yɛ dur” na ndzɛmba nyina a Isaiah hyɛɛ ho nkɔm no bɛba mu (3 Ne. 23:1–3).
Isaiah nwoma
Ahyɛmu Dadaw no mu nwoma bi. Isaiah no nkɔnhyɛ pii fa Ɔpomfo ne mbaa nye N’asaase do ɔsomdwuma nyina ho (Isa. 9:6) na dɛ ɔyɛ Ɔhen Kokroko wɔ da a odzi ewiei no mu (Isa. 63). Ɔhyɛɛ nkɔm pii so a ɔfa Israel ne ndaamba.
Tsir 1 yɛ nwoma nkaa no ne mbueinyi. Isaiah 7:14; 9:6–7; 11:1–5; 53; na 61:1–3 kã dwuma a Agyenkwa no ribedzi ho nsɛm. Etsir 2, 11, 12, na 35 no Isaiah kyerɛɛw ndzɛmba a obesisi wɔ nda a odzi ekyir no mu, ber a wɔdze asɛmpa no bɛsan aba, wɔbɔboaboa Israel ano, na asaase kɛsɛɛ no bɔsow nhyiren tse dɛ rose-nhyiren. Tsir 29 yɛ nkɔnhyɛ a ɔfa Mormon Nwoma ne mbae ho (2 Ne. 27). Etsir 40–46 paa mu kã Jehovah n’abasayɛ ho asɛm dɛ ɔyɛ Nyame nokwafo a ɔbɔ abosonsɔrfo hɔn enyame ehonyi do. Etsir 47–66 no a aka no kã Israel a ekyir no ɔbɛsan aba na Zion a wɔbɛkyekyer, na Ewuradze atsena No nkorɔfo mu ho asɛm.