Moses Mbra

Nyankopɔn dze mbra duaa Moses do maa Israel fifo dze hyɛɛ mbra no a ɔkrɔn no a woenntum enndzi do no ananmu (Ex. 34; JSN, Ex. 34:1–2; JSN, Deut. 10:2 [Ntaekyir Nwoma]). Dza ɔwɔ Moses mbra no mu nye nkyerɛkyerɛ, nhyehyɛɛ, guado-ndzeyɛe, sunsum mu ayɛdze na ngyinahɔmadze a ɔma nkorɔfo kaa hɔn dwumadzi na asodzi. Dza ɔkã ho so nye suban, ndzeyɛɛ pa nyamesom, na nyimpadua ho mbrasɛm, na sunsum mu ayɛdze so kã ho (Lev. 1–7)—wɔyɛɛ iyi ama akaa hɔn Nyame nye dwuma a ɔsɛ dɛ wodzi ma No (Mosiah 13:30). Gyedzi, nnuho, nsu mu enuma, nye bɔnfakyɛ yɛ mbra no ne fã bi, tse dɛ Mbra Du no nye mbrasɛm binom so a ohia a ɔfa suban na ndzeyɛɛ pa ho. Enyido-ayɛdze mbra no mu dodowara hyɛɛ mã wɔ Jesus Christ No wu no na No Wusoɛr ber no, dza ɔmaa afɔrbɔ a wokyi bɔgya gu baa ewiei no (Alma 34:13–14). Mbra n’ayɛdze no dzii dwuma wɔ Aaron Asɔfodzi no ase na ɔyɛ asɛmpa ho nsiesie ma hɔn a wodzi Christ Ne mbra do no.