Adzesua Mboa horow
Mark


Mark

Ahyɛmu Fofor no mu no, John Mark yɛ Mary a ɔtsenaa Jerusalem no ne babanyin (Ndwu. 12:12); Annhwɛ so a ɔbɛyɛ Barnabas no wɔfa ne ba anaa (n’awɔfase) (Col. 4:10). Ɔnye Paul na Barnabas fii Jerusalem kɔr hɔn asɛmpakã edwuma no a odzi kan no na wofii hɔ kɔr Perga (Ndwu. 12:25; 13:5, 13). Ekyir no ɔkãa Barnabas ho kɔr Cyprus (Ndwu. 15:37–39). Ɔkɔr Paul nkyɛn wɔ Rome (Col. 4:10; Philem. 1:24), na ɔkãa Peter so ho ma wɔkɔr Babylon (ɔbɛyɛ dɛ Rome) (1 Pet. 5:13). Ekyir koraa no ɔkãa Timothy ho ma wɔkɔr Ephesus (2 Tim. 4:11).

Mark Asɛmpa

Nwoma a otsĩa ebien wɔ Ahyɛmu Fofor mu no. Mark n’asɛmpa no ɔbɛyɛ dɛ Peter na ɔhwɛɛ no ma ɔkyerɛwee. No botae nye dɛ ɔbɛkyerɛ dɛ Ewuradze nye Nyame ne Ba no a ɔtse ase na odzi dwuma wɔ adasa mu no. Mark dze ahoɔdzen na ahobrɛadze kyerɛ mbrɛ Jesus ne ndzeyɛe sii tɔɔ nkorɔfo a wohun no no do. Abakɔsɛm kyerɛ dɛ Peter wui ekyir no, Mark kɔr Egypt, ɔkyekyeer Asɔr wɔ Alexandria na wokum no wɔ ne gyedzi ho ntsi ma owui.

Ama ehu Jesus N’abrabɔ mu nsɛm a wɔakã ho asɛm wɔ Mark Asɛmpa no mu no, hwɛ Nsɛmpa no ne Nsaae wɔ ntaekyir nwoma no mu.