Ahemfo
Nwoma ebien a ɔwɔ Ahyɛmu Dadaw no mu. Nwoma yinom yɛ abakɔsɛm a ɔfa Israelfo ho fi Adonijah, Ɔhen David ne babanyin a otsĩa anan no n’etuatsew (bɛyɛ afe 1015 Ansaana wɔrobɔwo Christ) dze kesi Judah ne ndɔmmumfa a obua ekyir koraa no (bɛyɛ afe 586 Ansaana wɔrobɔwo Christ). Etsifi ahenman no n’abakɔsɛm nyina wɔ mu (Israel ebusuakuw du no) fi ber a wɔtseew hɔnho dze kesi ber a Assyriafo no faa hɔn ndɔmmum dze hɔn kɔr etsifi nkurow do no. Hwɛ Mber a Nsɛm Sisii so wɔ Ntaekyir Nwoma no mu.
Ahemfo a odzi kan
Tsir 1 fa Ɔhen David n’abrabɔ ne nda a odzi ewiei no ho. Etsir 2–11 kyerɛɛw Solomon n’abrabɔ ho. Etsir 12–16 kã hɔn a Solomon wui ekyir no wodzii adze, Rehoboam na Jeroboam. Jeroboam na ɔmaa mpaapamu baa Israel ahenman no mu. Wɔbobɔ ahemfo binom so hɔn edzin. Etsir 17–21 mu no yɛ Elijah no somdwuma no mu bi ber a otuu Ahab, Israel ɔhen no fo. Tsir 22 no yɛ ber a Ahab nye Jehoshaphat, Judah ɔhen no kãa hɔn nsordaafo bɔɔ mu kõe tsiaa Syria no. Nkɔnhyɛnyi Micaiah no hyɛ nkɔm tsia ahemfo no.
Ahemfo a otsĩa ebien
Tsir 1:1–2:11 toa Elijah n’abrabɔ no do, Elijah fowee kɔr sor wɔ ogya tseaseanam mu no kã ho. Etsir 2–9 kã Elisha no somdwuma nye no tum kɛse no ho asɛm. Tsir 10 kã Jehu, ɔhen noho asɛm, nye mbrɛ osii sɛɛ Ahab ne fie nye Baal n’asɔfoe no. Etsir 11–13 yɛ Jehoash ne tsenenee ahendzi no na Elisha no wu no. Etsir 14–17 kã ahemfo ahorow a wodzii hen wɔ Israel na Judah ho nsɛm, mpɛn pii wɔ emumuyɛdze mu. Tsir 15 kã mbrɛ Assyriafo sii faa Israel ebusuakuw du no ndɔmmum no ho asɛm. Etsir 18–20 kã Judahhen Hezekiah, nye nkɔnhyɛnyi Isaiah hɔn bra tsenenee ho nsɛm. Etsir 21–23 kã ahemfo Manasseh nye Josiah hɔnho nsɛm. Dɛ mbrɛ tsetsesɛm kyerɛ, Manasseh na ɔmaa wokum Isaiah wɔ ne gyedzi ho ntsi. Josiah yɛ ɔhen tseneneenyi a ɔmaa wɔsanee hyehyɛɛ mbra wɔ Jewfo no mu. Etsir 24–25 kã Babylon ndɔmmum ho nsɛm.