Kan, Christ ne Kan

Ahoɔdzen, tum, anaa nkenyan a ofi Nyankopɔn hɔ dua Christ do na ɔma ndzɛmba nyina nkwa na kan. Ɔyɛ mbra no a wɔnam do dze hwɛ ndzɛmba nyina a ɔwɔ sor na asaase do (N&A 88:6–13). Ɔboa nyimpa so ma ɔtse asɛmpa no nokwar no ase na ɔboa ma wɔdze hɔn to asɛmpa no kwan no a ogya hɛn kɔ nkwagye mu no do (John 3:19–21; 12:46; Alma 26:15; 32:35; N&A 93:28–29, 31–32, 40, 42).

Ɔnnsɛ dɛ wɔdze Christ ne kan no fora Sunsum Krɔnkrɔn no. Christ ne kan no nnyɛ nyimpa. Ɔyɛ nkenyan bi a ofi Nyankopɔn hɔ na osiesie nyimpa ma onya Sunsum Krɔnkrɔn no. Ɔyɛ nhyɛdo bi a ɔyɛ adzepa wɔ nyimpa nyinara hɔn abrabɔ mu (John 1:9; N&A 84:46–47).

Christ ne kan ho nsɛnkyerɛdze kor nye tsibowa a ɔboa nyimpa ma ohu soronko a ɔda papa na bɔn ntamu (Moro. 7:16). Ber a nyimpa rusua asɛmpa no mbordo no, hɔn tsibowa mu bue (Moro. 7:12–19). Nkorɔfo a wodzi Christ ne kan ekyir no ogya hɔn kɔ Jesus Christ n’asɛmpa no ho (N&A 84:46–48).