Ahyɛmu Dadaw

Tsetse nkɔnhyɛfo no a wɔnam Sunsum Krɔnkrɔn no do dzii dwuma na wɔgyee Christ na Ne ndaamba nkyerɛkyerɛ ho dase mfe pii no hɔn nkyerɛwee. Dza ɔwɔ mu so nye Abraham na n’asefo ho abakɔsɛm, ɔhyɛɛ ase fi Abraham, na ahyɛmu no a Ewuradze nye Abraham na n’asefo dzii.

Moses kyerɛɛw Ahyɛmu Dadaw no mu nwoma enum a odzi kan no. Hɔn nye Genesis, Exodus, Leviticus, Nkanee, na Deuteronomy. Genesis kã asaase n’ahyɛse, adasamba, kasa horow, nyimpa ekuw horow, na Israel fifo ahyɛse ho asɛm.

Abakɔsɛm nwoma no kã dza osisii Israelmba akwan mu ho asɛm. Dɛm nwoma no nye Joshua, Atsɛmbuafo, Ruth, 1 na 2 Samuel, 1 na 2 Ahemfo, 1 na 2 Mbermunsɛm, Ezra, Nehemiah, na Esther.

Awensɛm nwoma no mu na yebohu nkɔnhyɛfo no awensɛm na akyerɛwsɛm no mu bi. Hɔn nye Job, Ndwom, Mbɛbusɛm, Ɔsɛnkafo, Ndwom mu Ndwom na Kwadwom.

Nkɔnhyɛfo no bɔɔ Israel kɔkɔ wɔ no bɔn ho na wɔgyee dase wɔ nhyira a ofi setsie mu ba ho. Wɔhyɛɛ Christ ne mbae ho nkɔm, ɔno a ɔdze no nkwa bɔto hɔ ama hɔn a wonu hɔnho, wɔ ayɛdze, na wɔdze asɛmpa no bɔ hɔn bra. Nkɔnhyɛfo no nwoma nye Isaiah, Jeremiah, Ezekiel, Daniel, Hosea, Joel, Amos, Obadiah, Jonah, Micah, Nahum, Habakkuk, Zephaniah, Haggai, Zechariah, na Malachi.

Nwoma a ɔwɔ Ahyɛmu Dadaw no mu no wɔkyerɛɛw no Hebrew mu. No mu kakraabi na wɔkyerɛɛw no Aram mu, kasa a ɔtse dɛ ɔno kakra.