Dɛ mbrɛ wɔakã wɔ kyerɛwsɛm mu no, ebɔ werdam nye dɛ ihu amandze wɔ bɔn bi ho, na enam do riyi bɔn no no nsunsuando efi dzebɔnyɛnyi no do ma oenya kwan nye Nyankopɔn abɔmu. Jesus Christ nkotoo na otumii bɔɔ werdam a odzi mu dze maa adasamba nyina. Otumii yɛɛ iyi osiandɛ Ɔno na wɔsaan mu yii no na wɔhyehyɛe too hɔ maa No wɔ Baguabɔ Soronko bi a wɔbɔe ansaana wɔrobɔ wiadze no (Ether 3:14; Moses 4:1–2; Abr. 3:27), N’Abayɛ a ofi Nyame hɔ, na Ne bra a bɔn biara nnyi ho. Dza ɔkã No Werdambɔ no ho nye N’amandze a Ohunii dze maa adasamba, No bɔgyaa a okyii, na No wu nye No wusoɛr fi owumaa mu a ɔtoaa do no (Isa. 53:3–12; Luke 22:44; Mosiah 3:5–11; Alma 7:10–13; N&A 19:16–19). Osian Werdambɔ no ntsi, nyimpa nyina dze nyimpadua a ɔmmprɔw bɔsoɛr efi ewufo mu (1 Cor. 15:22). Werdambɔ no so bɔ kwan to hɔ ma wɔnam do dze hɛn bɔn kyɛ hɛn na yɛnye Nyankopɔn tsena afebɔɔ. Mbom obi a oedu nkontaabuber na ne nsa kãa mbra no, gyedɛ onya gyedzi wɔ Jesus Christ mu, onu noho fi no bɔn ho, na ne nsa kã nkwagye ho ayɛdze, na odzi Nyankopɔn Ne mbrasɛm no do a, nna ne nsa botum akã nhyira yinom. Wɔnam Werdambɔ no do bɛgye hɔn a wonndur nkontaabuber na hɔn a wonnyim mbra no (Mosiah 15:24–25; Moro. 8:22). Kyerɛwsɛm no kyerɛkyerɛ pefee dɛ, sɛ Christ ammbɔ werdam no amma hɛn bɔn a, nkyɛ mbra, ayɛdze anaa afɔrbɔ biara nnkotum apata pɛrpɛrdzi, na nyimpa nnkotum asan akɔ Nyankopɔn Ne nkyɛn (2 Ne. 2; 9).