1 Na afei, me babanyin, mowɔ nsɛm pii kã kyerɛ wo sen dza mekãa kyerɛɛ wo nua no; na hwɛ, ana innhun wo nuabanyin no ne nketsesi, nye no nokwardzi, nye no mbɔdzembɔ wɔ Nyame ne mbrasɛm ho? Hwɛ ɔnnyɛ mfatoho pa mmfa mma wo?

2 Na ɔwo annyɛ, setsie dɛ mbrɛ ɔsɛ amma me nsɛm dɛ mbrɛ wo nuabanyin no yɛe wɔ ^aZoramfo no mu no. Afei iyi na mowɔ dze tsia wo, ɔwo ekɔr do tuwii wɔ w’ahoɔdzen nye wo nyansaa mu.

3 Na nnyɛ ne nyina nye yi, me babanyin, ɔwo ayɛ biribi a medzi ho yaw; osiandɛ epoow ɔsomdwuma no, na ekɔr Siron asaase do wɔ Lamanfo no hɔn nkurotsia kedzii Isabel ^aedwamambɔnyi no ekyir.

4 Nyew, ^aɔtwee dodowara hɔn akoma; na mbom iyi runntum nngye wo, me babanyin. Nkyɛ ɔwɔ dɛ eyɛ wo ɔsomdwuma no a wɔdze hyɛɛ wo nsa no.

5 Ana innyim, me babanyin, dɛ ^andzɛmba yinom yɛ ekyiwadze wɔ Ewuradze enyim, nyew, ɔyɛ bɔn kɛse a ɔbor bɔn nyina do, gyedɛ obi a ɔkã obi a onndzi fɔ no bɔgyaa gu kwa anaa obi a ɔpow Sunsum Krɔnkrɔn no?

6 Na hwɛ, sɛ ^aepow Sunsum Krɔnkrɔn no wɔ ber a ɔabɛtsena wo mu pɛn, na inyim dɛ apow no a, hwɛ iyi yɛ bɔn a ^bonnyi fakyɛ; nyew, na obiara a odzi ewu tsia Nyankopɔn ne kan nye ne nyimdzee no, ɔbɛyɛ dzen ama no dɛ obenya ^cbɔnfakyɛ; nyew, mese, ɔwo, me babanyin, ɔbɛyɛ dzen dɛ obenya bɔnfakyɛ.

7 Na afei, me babanyin, ɔbɛyɛ me dɛw wɔ Nyame mu dɛ ^ainndzii fɔ wɔ dɛm bɔn akɛse yi ho; sɛ nnyɛ wo yieyɛ ntsi a nkyɛ merennkasa wo bɔn yi ho pii mmfa nnhaw wo kra.

8 Mbom hwɛ irunntum mmfa wo bɔn nnsuma Nyankopɔn; na gyedɛ inu woho, annyɛ dɛm a ɔbɛyɛ dasegye etsia wo wɔ da a odzi ewiei no mu.

9 Afei, me babanyin, mepɛ dɛ inu woho na epow wo bɔn, na nnkedzi w’enyiwa ^an’akɔndɔbɔn ekyir bio, na mbom ^bebɛdan w’ekyir ama dɛm ndzɛmba yinom nyina; na gyedɛ eyɛ iyi, annyɛ dɛm a irunntum nnya Nyankopɔn n’ahenman no nnyɛ wodze. Ao, kaa, na gye to wo do, na dan w’ekyir ma dɛm ndzɛmba yinom.

10 Na mehyɛ wo dɛ ma ɔnyɛ wo ehiadze dɛ enye w’enuanom mpanyimfo no bɔdwen wɔ dza ebɛyɛ biara ho; na hwɛ, ewɔ wo mberantsɛber mu, na ohia dɛ w’enuanom no tsetse wo. Na tsie hɔn afotu.

11 Ma mma woho kwan ma egyangyandze anaa nkwaseadze biara nntwe wo nnkɔ; ma mma kwan ma abɔnsam nntwe w’akoma mmfa nnkedzi dɛm ndwamambɔfo emumuyɛfo no ekyir bio. O me babanyin, hwɛ bɔn kɛse a edze aba ^aZoramfo do; na ber a wohun wo ^bsuban no na ɔmaa wɔanngye me nsɛm no enndzi.

12 Na afei Ewuradze no Sunsum se me dɛ: ^aHyɛ wo mba no ma wɔnyɛ papa, amma wɔanntwe nkorɔfo pii hɔn akoma annkɔ ɔsɛɛ mu; dɛm ntsi mehyɛ wo, me babanyin, wɔ Nyankopɔn ho suro mu, dɛ twe woho fi wo emumuyɛ ho;

13 Ama edze w’adwen, w’ahom, nye w’ahoɔdzen nyina aadan akɔ Ewuradze nkyɛn; amma anntwe ɔdodow hɔn akoma ma wɔannyɛ emumuyɛdze bio; na mbom san kɔ hɔn nkyɛn bio ^akɛkã wo mfom nye bɔn a ayɛ kyerɛ hɔn.

14 ^aMma mmper nnhwehwɛ sika anaa wiadze yi mu egyangyandze; na hwɛ irunntum mmfa nnka woho nnkɔ.

15 Na afei, me babanyin, mepɛ dɛ mekã biribi a ɔfa Christ ne mbae ho kyerɛ wo. Hwɛ, mese wo dɛ nokwar, ɔno na ɔbɛba ebeyi wiadze bɔn akɔ; nyew, ɔreba abɛda nkwagye ho enyigyesɛm edzi akyerɛ no nkorɔfo.

16 Na afei, me babanyin, iyi nye ɔsomdwuma no a wɔfrɛɛ wo ho no, ama aakɛda asɛm a oye yi edzi akyerɛ nkorɔfo yi, dze esiesie hɔn adwen; ama woeenya nkwagye, ma woesiesie hɔn ^amba hɔn adwen ma woeetsie asɛm no wɔ ber a ɔbɛba no mu.

17 Na afei mobɔboa wo kakra wɔ dɛm asɛm yi ho. Hwɛ, ɔbɛyɛ wo nwanwa dɛ wobohu dɛm ndzɛmba yinom dadaada ansaana esi. Hwɛ mese wo dɛ ana ɔkra a ɔtse ase aber yi mu nnsom bo mma Nyankopɔn dɛ ɔkra a ɔbɛtsena ase wɔ aber a ɔbɛba no mu?

18 Ana onnhia dɛ wɔbɛma nkorɔfo yi atse ɔpon ho nhyehyɛɛ no na hɔn mba so atse no dɛmara?

19 Ana ɔnnyɛ mberɛw mma Ewuradze wɔ aber yi mu dɛ ɔbɔsoma no bɔfoe ma ɔabɛda dɛm enyigyesɛm yi edzi akyerɛ hɛn nye hɛn mba, anaa tse dɛ mber a ɔdze bɛba no ekyir?