1 Na ɔbaa dɛ ber a wɔkyekyeer asɔr wɔ asaase no do no, ɔhen Lamoni pɛɛ dɛ Ammon bɛkã noho ma wɔkɔ Nephi asaase do, ama ɔdze no aakyerɛ n’egya.

2 Na Ewuradze ne ndze baa Ammon hɔ dɛ: Mma nnkɔ Nephi asaase do, na hwɛ, ɔhen no bɛper eyi wo nkwa efi hɔ, na mbom kɔ Middoni asaase do na hwɛ, wo nua Aaron nye Muloki na Ammah so da efiadze.

3 Afei ɔbaa dɛ ber a Ammon tsee iyi no, ɔkãa kyerɛɛ Lamoni dɛ: Hwɛ, na m’enuanom da efiadze wɔ Middoni na morokɔ akɛgye hɔn.

4 Afei Lamoni see Ammon dɛ: Minyim dɛ ibotum ayɛ adze nyina wɔ Ewuradze ^an’ahoɔdzen mu. Na mbom hwɛ, menye wo bɔkɔ Middoni asaase do; na ɔhen a ɔwɔ Middoni asaase do no a ne dzin dze Antiomno no yɛ me nyɛnko; dɛm ntsi mobɔkɔ Middoni asaase do ama maakɔ akɛdzɛfɛdzɛfɛw ɔhen no a ɔwɔ asaase no do no, na obeyi w’enuanom no efi ^befiadze. Afei Lamoni see no dɛ: Woana see wo dɛ w’enuanom da efiadze?

5 Na Ammon see no dɛ: Obiara nnkaa nnkyerɛɛ me, gyedɛ Nyankopɔn nko; na ɔsee me dɛ—Kɔ na kɛgye w’enuanom no, osiandɛ wɔda efiadze wɔ Middoni asaase do.

6 Afei ber a Lamoni tsee iyi no ɔhyɛɛ no nkowaa no dɛ wɔnyɛ no ^ampɔnkɔ nye ntseaseanam no krado.

7 Na ɔsee Ammon dɛ: Bra, menye wo bɔkɔ Middoni asaase do, na hɔ na mobɔtotɔ aserɛ ɔhen no ma oeyi w’enuanom no efi efiadze.

8 Na ɔbaa dɛ ber a Ammon na Lamoni rokɔ no, wohyiaa Lamoni n’egya no a ɔyɛ ɔmanhen wɔ ^aasaase nyinara do no.

9 Na hwɛ, Lamoni n’egya see no dɛ: Ebɛnadze ntsi na ammba daano ^aaponto kɛse no a motoe maa me mbabanyin nye mo nkorɔfo no ase yi?

10 Na obisaa bio dɛ: Henfa na enye Nephinyi ^aɔtorfo ne mba mu kor yi rokɔ?

11 Na ɔbaa dɛ Lamoni kãa bea a ɔrokɔ kyerɛɛ no, osiandɛ osuroo dɛ ɔbɔfom no.

12 Na ɔkãa dza ɔmaa otsintsimii wɔ n’ahenman mu ma oenntum annkɔ n’egya n’aponto no ase no kyerɛɛ no.

13 Na afei ber a Lamoni kãa dɛm nsɛm yinom nyina kyerɛɛ no no, hwɛ, ahobowsɛm, n’egya no bo fuuw no, na ɔsee no dɛ: Lamoni, ana erokɔ akɛgye Nephifo yi a wɔyɛ akɔhwifo yi hɔn mbabanyin yi. Hwɛ, otwa hɛn egyanom edwoo; na afei ne mba so aba hɛn mu ama wɔdze hɔn ndabraba na hɔn atordzi, dze abadaadaa hɛn, ama hɔn so woeebotwa hɛn ahodze edwoo bio.

14 Afei Lamoni n’egya hyɛɛ no dɛ ɔmfa ne nkrantsee nku Ammon. Na ɔhyɛɛ no so dɛ mma ɔnye no nnkɔ Middoni asaase do, na mbom ɔnsan n’ekyir nye no nkɔ ^aIshmael asaase do.

15 Mbom Lamoni see no dɛ: Murunnku Ammon, nna merennsan m’ekyir nnkɔ Ishmael asaase do so, mbom mobɔkɔ Middoni asaase do akɛgye Ammon no nuanom no, na minyim dɛ wodzi pɛrpɛr nna wɔyɛ Nyame nokwafo no no nkɔnhyɛfo krɔnkrɔn.

16 Afei ber a n’egya tsee dɛm nsɛm yi no, no bo fuuw no, na ɔtwee ne nkrantsee dɛ ɔdze rubotwitwa no egu famu.

17 Mbom Ammon gyinae na ɔsee no dɛ: Hwɛ, mma nnku wo ba; osiandɛ ^aoye dɛ ɔno bɔtɔr sen ɔwo, na hwɛ ^boenu noho wɔ no bɔn ho; na mbom sɛ ɔwo etɔr aber yi mu wɔ w’ebufuhyew mu a, wo kra rinnya nkwa.

18 Na bio, oye dɛ inya abotar; osiandɛ sɛ ^aiku wo ba yi a, osiandɛ onndzi fɔ ntsi no bɔgyaa bosu efi asaase tsir mu afrɛ Ewuradze hɛn Nyankopɔn dɛ ɔmma werdzi mbra wo do; na annhwɛ a nna ayew wo ^bkra.

19 Afei ber a Ammon kãa dɛm nsɛm yi kyerɛɛ no no, obuaa no dɛ: Minyim dɛ sɛ muku me babanyin yi a nna makã bɔgya a afɔdzi nnyi ho egu; osiandɛ nna ɔwo na erohwehwɛ asɛɛ no.

20 Na ɔtseen ne nsa dɛ oruboku Ammon. Na hwɛ, Ammon nye no dzii esi, na otwaa n’abasa mma oenntum ɔammfa annyɛ hwee bio.

21 Afei ber a ɔhen no hun dɛ Ammon botum eku no no, ɔhyɛɛ ase dɛ ɔrototɔ serɛ no dɛ ɔmfa no nkwa nkyɛ no.

22 Mbom Ammon maa ne nkrantsee do na ɔsee no dɛ: Hwɛ, mubotwitwa wo, nna gyedɛ ema kwan dɛ wonyi m’enuanom no mfi efiadze.

23 Afei ɔhen no suroo dɛ bɛyɛ na ɔayew no nkwa ntsi ɔsee dɛ: Sɛ edze mo nkwa kyɛ me a ɔno biribiara a ibebisa me no mebɛyɛ ama wo, sɛ ɔyɛ m’ahenman ne fã mpo a.

24 Afei ber a Ammon hun dɛ ne nsa akã dza ɔrohwehwɛ efi ɔhen akɔkora no nkyɛn no, ɔsee no dɛ: Sɛ ebɛma woeyi m’enuanom no efi efiadze, na ama Lamoni so ada ho edzi adze wɔ n’ahenman mu, na wo bo rummfuw no, na mbom ebɛma no kwan ma ɔayɛ ^adza ɔnoara ɔdwen dɛ oye na ɔpɛ biara dɛ ɔyɛ a, ɔno medze wo nkwa bɛkyɛ wo; annyɛ dɛm a ɔno mubotwitwa wo egu famu.

25 Afei ber a Ammon kãa dɛm nsɛm yi no, ɔhen no hyɛɛ ase dɛ oridzi dɛw osian no nkwa ntsi.

26 Na ber a ohun dɛ Ammon nnyipɛ biara dɛ oboku no no, na ohun ɔdɔ kɛse so a Ammon wɔ dze ma ne babanyin Lamoni no, noho boow no kɛsenara, na ɔsee no dɛ: Osiandɛ iyi ara na erohwehwɛ, dɛ minyi w’enuanom no, na memma me babanyin Lamoni ndzi adze wɔ n’ahenman mu no, hwɛ, mebɛma me babanyin no afa n’ahenman no fitsi aber yi mu dze kesi afebɔɔ; na mirinndzi no do hen bio—

27 Na mebɛma woeyi w’enuanom no efi efiadze, na enye w’enuanom no botum aba me nkyɛn wɔ m’ahenman mu; osiandɛ mebɛ pɛ papaapa dɛ mobohu wo. Na ɔhen no noho boow no kɛsenara wɔ nsɛm a ɔkãa no ho, nye nsɛm so a ne babanyin Lamoni kãa no, dɛm ntsi ^aɔpɛɛ dɛ osũa.

28 Na ɔbaa dɛ Ammon na Lamoni sɔɔw hɔn akwantu no do dɛ wɔrokɔ Middoni asaase do. Na Lamoni n’enyim baa nyam wɔ ɔhen a ɔwɔ asaase no do no enyim; dɛm ntsi woyii Ammon n’enuanom no fii efiadze.

29 Na ber a Ammon hyiaa hɔn no, awerɛhow kɛse kãa no, osiandɛ nna wɔda adagyaw na hɔn honam so etwitwa pii osian nkyehoma dzendzen a wɔdze kyekyeer hɔn no ntsi. Na ɔkɔm na nsukɔm adze hɔn, na woehu amandze ahorow pii so; naaso wonyaa ^aabotar wɔ hɔn amandzehu pii no mu.

30 Na ɔbaa dɛ hɔn dze wɔkɔtɔɔ nkorɔfo a hɔn akoma epirim na wɔyɛ akɔnkyefo kɛse nsamu; dɛm ntsi woenntsie hɔn nsɛm no, na wɔpaam hɔn, na wɔhwee hɔn, na woyii hɔn edzi fii efiefi mu nye mbeambea do kesii dɛ wodur Middoni asaase do; hɔ wɔkyeer hɔn na wɔdze hɔn guu efiadze, na wɔdze ^ankyehoma dzendzen kyekyeer hɔn, na wɔmaa wɔdaa efiadze nda pii kesii dɛ Lamoni na Ammon bɛgyee hɔn.