1 Afei ɔbaa dɛ ber a Amulek dze ne nsɛm baa ewiei no, wɔtwee hɔnho fii dɔmtutuw no mu na wɔbaa Jershon asaase do.

2 Nyew, na enuanom nkaa no so ber a wɔkãa asɛm no kyerɛɛ Zoramfo no wiee no, hɔn so baa Jershon asaase do.

3 Na ɔbaa dɛ ber a Zoramfo no mu etsitsir pii boaa hɔn ano dɛ wɔrodwendwen nsɛm a wɔakã akyerɛ hɔn no ho no, hɔn bo fuwii wɔ nsɛm no ho, osiandɛ ɔsɛɛ hɔn ^andwuma bɔn no; dɛm ntsi wɔammpɛ dɛ wotsie nsɛm no.

4 Na wɔsomaa ma wɔkɔboaboaa dɔm a wɔwɔ asaase no do nyinara ano, na wɔnye hɔn dwendween nsɛm a wɔakã akyerɛ hɔn no ho.

5 Afei hɔn ahwɛfo nye hɔn asɔfo nye hɔn akyerɛkyerɛfo no amma dɔm no ennhu dza wɔrohwehwɛ; dɛm ntsi wɔnam nsumaamu hun dɔm no nyina hɔn adwen.

6 Na ɔbaa dɛ ber a wohun dɔm no nyinara hɔn adwen no, wɔpaam hɔn a nna wɔagye nsɛm a Alma na n’enuanom no akã no edzi no fii asaase no do; na hɔn dodow dɔɔ sõ; na hɔn so wɔbaa Jershon asaase do.

7 Na ɔbaa dɛ Alma nye no nuanom no soom hɔn.

8 Afei Zoramfo dɔm no bo fuuw Ammon no nkorɔfo no a wɔwɔ Jershon no, na Zoramfo hɔn ɔhwɛfo panyin a ɔyɛ omumuyɛfo no, somaa ma wɔkɔr Ammon no nkorɔfo nkyɛn kɛsee hɔn dɛ wɔmpam hɔn a wofii hɔn mu baa hɔn asaase do no mfi hɔn asaase no do.

9 Na opuuw hɔn mpɛn pii. Na afei Ammon no nkorɔfo no ennsuro hɔn nsɛm no koraa; dɛm ntsi wɔammpam hɔn, mbom wɔgyee Zoramfo ehiafo no nyinara a wɔbaa hɔn nkyɛn no; na ^awɔmaa hɔn edziban ma wodzii, na wɔhyɛɛ hɔn ntar, na wɔmaa wɔkyɛɛ hɔn nsaase ma ɔbɛyɛɛ hɔn egyapadze; na wɔmaa wɔsoom hɔn dɛ mbrɛ hɔn ehiadze tse.

10 Afei iyi maa Zoramfo no bo fuuw Ammon no nkorɔfo, na wɔhyɛɛ ase dɛ wɔnye Lamanfo no ridzi afora dze enunu hɔn ma hɔn so hɔn bo efuw hɔn.

11 Na dɛm ntsi Zoramfo nye Lamanfo so hyɛɛ ase dɛ wɔroboaboa hɔnho akɔkõ etsia Ammon no nkorɔfo nye Nephifo no.

12 Na dɛm na afe a otsĩa duesuon wɔ atsɛmbuafo a wɔhwɛ Nephi no nkorɔfo do no dze baa ewiei.

13 Na Ammon no nkorɔfo no fii Jershon asaase do, na wɔbaa Melek asaase do, na wɔdze Jershon asaase no too hɔ dze maa Nephifo nsordaafo no, ama woeetum nye Lamanfo nsordaafo nye Zoramfo nsordaafo no edzi esi, na dɛm na ɔkõ hyɛɛ ase wɔ Lamanfo nye Nephifo no mu wɔ afe a otsĩa duawɔtwe wɔ atsɛmbuafo no hɔn aber do; na ^adza ɔfa ɔkõ yi ho no wɔbɛkã no ekyir yi.

14 Na Alma nye Ammon nye hɔn enuanom no nye Alma ne mbabanyin beenu no so saan hɔn ekyir kɔr Zarahemla asaase do, ber a Nyankopɔn duaa hɔn abaw do twee Zoramfo no mu ^apii ma wonyaa nnuho no; na dodowara a wonyaa nnuho no, wɔpaam hɔn fii hɔn asaase do; na mbom nna woenya Jershon nsaase dze ayɛ hɔn egyapadze, na wɔfaa akodze dɛ wɔdze bɛgye hɔnho, nye hɔn yernom na hɔn mba, nye hɔn nsaase.

15 Afei Alma nna no werɛ ahow osian no nkorɔfo hɔn emumuyɛ ntsi, nyew, osian akõkoekõ nye bɔgya a wɔrekã gu, nye wentwiwentwi a aba hɔn mu no ntsi; na ber a ɔkɔr dɛ ɔrekɛkã asɛm no, anaadɛ wɔsomaa no dɛ ɔnkɛkã asɛm no wɔ dɔm no nyina mu wɔ kurow biara mu no; na ohun dɛ nkorɔfo no hɔn akoma ahyɛ ase repirim no, na dɛ asɛm no yɛ hɔn ^afintsindua osian ne katseeyɛ ntsi, n’akoma dzii awerɛhow kɛsenara.

16 Dɛm ntsi, ɔsomaa dɛ wɔmboa ne mbabanyin no hɔn ano, ama ɔdze hɔn mu kor biara ^an’edwuma aahyɛ ne nsa, wɔ ɔfa no tsenenee ndzɛmba ho. Na yɛwɔ ne mbrasɛm a ɔdze maa hɔn no ho abakɔsɛm dɛ mbrɛ nankasa ne kyerɛwsɛm no tse.