Alma Nwoma No
Alma Ne Babanyin No

1 Afei ɔbaa dɛ ber a atsɛmbuafo no dzi adze wɔ Nephi no nkorɔfo do n’afe a odzi kan no mu no, ofitsi dɛm aber no dze kɔ, ber a ɔhen Mosiah ^akɔr asaase nyina kwan no, ɔno a ɔkõo ɔkõ pa, na ɔnantseew tsenenee mu wɔ Nyankopɔn enyim no, oennyi obiara a obesi n’ananmu edzi n’adze no; hwɛ ɔhyehyɛɛ ^bmbra, na dɔm no gyee too mu; dɛm ntsi nna otwar dɛ wodzi mbra no a ɔayɛ no do.

2 Na ɔbaa dɛ afe a odzi kan a nna Alma dzi adze wɔ atsɛmbu egua no do no, wɔdze ^aɔbarimba bi baa n’enyim dɛ ondzi n’asɛm, dɛm ɔbarimba no sõ ara yie, na wonyim dɛ noho yɛ dzen so yie.

3 Nna ɔnenam dɔm no mu rekã nsɛm bi a ^aɔato no dzin dɛ ɔyɛ Nyankopɔn n’asɛm, na ɔyɛ nsɛm a ^botsia asɔr no; ɔkãa kyerɛɛ dɔm no dɛ asɔfo nye akyerɛkyerɛfo no wɔ dɛ wɔyɛ ^catsenkã wɔ dɔm no mu; na ^dɔnnsɛ dɛ wɔdze hɔn nsa yɛ edwuma, mbom dɔm no na ɔsɛ dɛ wɔhwɛ hɔn.

4 Na ɔgyee dase kyerɛɛ dɔm no so dɛ wɔbɛgye adasamba nyinara nkwa wɔ da a odzi ewiei no mu, dɛm ntsi onnyi dɛ wosuro anaadɛ hɔn ho popo, na mbom wɔmma hɔn tsir do wɔ sor na wondzi ehurusi; osiandɛ Ewuradze na ɔabɔ nyimpa nyinara, na ɔapon hɔn nyinara so; dɛm ntsi da a odzi ekyir no, nyimpa nyinara benya onnyiewiei nkwa.

5 Na ɔbaa dɛ ɔkyerɛkyerɛɛ dɛm ndzɛmba yinom araa ma dodowara gyee ne nsɛm no dzii, mpo ara ma wɔhyɛɛ ase dɛ wɔroboa no na wɔrema no sika.

6 Na ɔhyɛɛ ase dɛ ɔremema noho do na ɔreyɛ ahantan wɔ n’akoma mu, na ɔhyɛɛ ntar a ɔsom bo, nyew, na ɔhyɛɛ ase dɛ ɔnam ne nsɛm kã do rekyekyer ^aasɔr mpo.

7 Na ɔbaa dɛ ber a ɔrokɔ akɛkyerɛkyerɛ hɔn a wɔagye ne nsɛm no edzi no, ohyiaa ɔbarimba bi a ɔkã Nyame n’asɔr no ho, nyew, hɔn akyerɛkyerɛfo no mu kor; na ɔhyɛɛ ase dɛ ɔnye no regye kyim dzendzenndzen, ama ɔnam do ɔaatwe dɔm a wɔwɔ asɔr no mu no aakɔ; na mbom ɔbarimba no nye no gyinae, na ɔdze Nyame ne ^ansɛm bɔɔ no kɔkɔ.

8 Afei dɛm ɔbarimba no ne dzin dze ^aGideon; na ɔyɛɛ edwindadze wɔ Nyankopɔn ne nsamu dze gyee Limhi no dɔm no fii nkowaasom mu.

9 Afei, ɔnam dɛ Gideon dze Nyame ne nsɛm no nye no gyinae ntsi no bo fuuw Gideon, na ɔtwee ne nkrantsee na ɔhyɛɛ ase dɛ ɔdze rutwitwa no. Nna Gideon n’enyi efir dodow, dɛm ntsi oenntum enngyina no hwe no ano, dɛm ntsi ɔdze ^ankrantsee kum no.

10 Na asɔrmba no suoo ɔbarimba no a okum no no mu, na wɔdze no baa Alma n’enyim dɛ ^aombu no atsɛn wɔ ewu a oedzi no ho.

11 Na ɔbaa dɛ obegyinaa Alma n’enyim na ɔdze akokodur kasaa serɛɛ maa noho.

12 Mbom Alma see no dɛ: Hwɛ, iyi nye mber a odzi kan a wɔdze ^aasɔfoɔtorsom aba dɔm yi mu. Na hwɛ, nndzi fɔ wɔ asɔfoɔtorsom nko no ho, na mbom aper so dɛ idua nkrantsee do edze hyɛ hɔn; na sɛ wɔnam nhyɛ do dze asɔfoɔtorsom reba dɔm yi mu a, nna ɔrebɛsɛɛ hɔn koraa.

13 Na akã ɔtseneneenyi no bɔgyaa egu, nyew, nyimpa a ɔayɛ papa pii wɔ dɔm yi mu; na hwɛ sɛ yegyaa wo a no bɔgyaa bɔsoɛr hɛn do ^aebedzi hɛn wer.

14 Dɛm ntsi ^awoebu wo okumfɔ, dɛ mbrɛ mbra a Mosiah, hɛn hen a odzi ewiei no, dze maa hɛn no tse; na dɔm yi agye ato mu; dɛm ntsi ɔwɔ dɛ dɔm yi dzi mbra no do.

15 Na ɔbaa dɛ wɔfaa no; na ne dzin dze ^aNehor; na wɔdze no kɔr koko Manti n’etsifi, na hɔ no wɔmaa, anaadɛ, ɔgyee tõo mu wɔ sor na asaase enyim dɛ dza ɔdze kyerɛkyerɛɛ dɔm no nye Nyankopɔn n’asɛm bɔ ebira; na hɔ na owuu ^benyimguase wu.

16 Naaso iyi amma asɔfoɔtorsom no ammbɔ adze wɔ asaase no do; osiandɛ dodowara wɔ hɔ a hɔn enyi gye wɔ wiadze egyangyandze mu, na wɔkɔr do kyerɛkyerɛɛ dza ɔnnyɛ nokwar; na wɔyɛɛ iyi osian ^aahonya nye enyimnyam ntsi.

17 Naaso, sɛ wɔkyer hɔn a, osian mbra no ntsi wonntum nndzi ^aator, ɔnam dɛ wɔtwe atorfo aso ntsi wɔhyɛɛ da dɛ wɔreka nsɛm a hɔnara wɔgye dzi; na mbra no nnyi tum wɔ obiara do wɔ ne ^bgyedzi ho.

18 Na woenntum ^aennwia adze, ɔnam dɛ wosuroo mbra no, na wɔtwee aso wɔ dɛm adze yi ho; eso woenntum ammbɔ epoo, anaa woenndzi ewu, ɔnam dɛ nyia ^bodzii ewu no ^cwɔtwee n’aso dze kum no.

19 Mbom ɔbaa dɛ hɔn a wɔnndɔm Nyame n’asɔr no hyɛɛ ase dɛ wɔretseetsee hɔn a wɔdɔm Nyame n’asɔr, na wɔafa Christ ne dzin ato hɔn do no.

20 Nyew, wɔtseetsee hɔn, na wɔdze nsɛm ahorow pii tsetsee hɔn, na wɔyɛɛ iyi osian hɔn ahobrɛadze ntsi; na wɔnnyɛ ahantan wɔ hɔn enyi do, na mbom wɔdze Nyame n’asɛm kyerɛkyerɛɛ hɔn ho nkorkor, na ^awɔanngye sika nna wonntwa bo so.

21 Afei mbra ketsee bi wɔ hɔ ma nkorɔfo a wɔwɔ asɔr no mu dɛ onnyi dɛ nyimpa biara a ɔdɔm asɔr no, soɛr na ^aɔtseetsee hɔn a wɔnndɔm asɔr no, na eso onnyi dɛ wɔma atseetsee biara si hɔnankasa so hɔn mu.

22 Naaso dodowara wɔ hɔn mu a wɔhyɛɛ ase dɛ wɔreyɛ ahantan, na wɔhyɛɛ ase dɛ wɔnye hɔn etsiafo ridzi esi, na wɔbɔɔ atwɛr mpo; nyew, wɔdze ekutuku bobɔɔ hɔn ho nkorkor.

23 Afei iyi nyina sisii wɔ afe a otsĩa ebien wɔ ber a Alma dzi adze no, na ɔyɛɛ atseetsee kɛse dze maa asɔr no; nyew, ɔyɛɛ nsɔhwɛ kɛse dze maa asɔr no.

24 Na dodowara hɔn akoma pirimii, na ^awɔpepaa hɔn edzin mu, na wɔannkan hɔn bio wɔ Nyame no dɔm mu. Na dodowara so ^btwee hɔnho fii hɔn mu.

25 Afei iyi yɛɛ nsɔhwɛ kɛse bi dze maa hɔn a woegyina pintsinn wɔ gyedzi mu no; naaso wogyinaa pintsinn na woennhihim dɛ wobedzi Nyankopɔn ne mbrasɛm do, na wonyaa ^aabotar dze sɔɔw atseetsee a ɔbaa hɔn do no.

26 Na sɛ asɔfo no gyaa hɔn ^andwuma a wɔyɛ na wɔkɛkã Nyame n’asɛm no kyerɛ dɔm no a, dɔm no so gyaa hɔn ndwuma a wɔyɛ dze tsie Nyame n’asɛm no. Na sɛ ɔsɔfo no kã Nyame n’asɛm no kyerɛ hɔn wie a, hɔn nyinara san hɔn ekyir kɔ bio kedzi hɔn dwuma dɛ mbrɛ ɔsɛ; na ɔsɔfo no mmbu noho nnkyɛn n’etsiefo, osiandɛ ɔsɛnkanyi no nnye nnkyɛn etsiefo no; anaadɛ kyerɛkyerɛnyi no nnye nnkyɛn osuanyi no; na dɛ hɔn nyinara yɛ pɛr, na hɔn nyinara yɛɛ edwuma, obiara yɛɛ ^bmbrɛ n’ahoɔdzen botum.

27 Na ^awoyiyii hɔn ahodze memae, obiara dɛ mbrɛ ɔwɔ, na wɔdze memaa ^behiafo na abɔbɔfo, nye ayarfo, na hɔn a woruhu amandze; na wɔannhyehyɛ ntar a no bo yɛ dzen, nna eso hɔn ho tsew na wodzi hɔn ho nyi.

28 Na dɛm na wɔdze hyehyɛɛ asɔr no mu dwumadzi; na dɛm na ɔmaa wɔhyɛɛ ase dɛ wɔrokɔdo nya asomdwee ntoado bio, atseetsee nyina ammfa hɔn ho koraa.

29 Na afei, osiandɛ asɔr no egyina pintsinn ntsi, wɔhyɛɛ ase dɛ wɔreyɛ ^aesikafo mapã, wonyaa ndzɛmba a wohia nyina no mbordo—nguankuw na anantwikuw, nye mbowa ahorow pii, na eburow so pii, nye sika na dwetɛ, nye ndzɛmba a ɔsom bo mapã, nye ^bserekye na atam fɛɛfɛw so ahorow pii.

30 Na hɔn ^aprɔmprɔmyɛ mber yi mu no, woennyi hɔn a wɔda ^badagyaw, anaa ɔkɔm dze hɔn, anaa nsukɔm dze hɔn, anaa wɔyaryar, anaa wɔyɛ abɔbɔfo edzi; na wɔammfa hɔn akoma anntaa ahonya do; na wɔyɛɛ ayamuyie maa obiara, mpanyimfo na mbofra, nkowaa na adehye, mbanyin nye mbaa, dɛ wonnyi asɔr no mu anaa wɔwɔ asɔr no mu, ^cwɔannhwɛ nyimpa enyim na wɔyɛɛ obiara n’ehiadze maa no.

31 Na dɛm na ɔmaa wɔyɛɛ prɔmprɔm na ahonyafo mapa kyɛɛn hɔn a wonnyi asɔr no mu.

32 Na hɔn a wonnyi asɔr no mu no dze hɔn ho kɛhyɛɛ abayisɛm na ^aabosonsom mu anaa ^benyihaw, nye ^ckasafĩ ne kã mu, na ^denyiber na basabasayɛ mu; na wɔhyehyɛɛ ntar a ɔsom bo; na ^ewɔmemaa hɔn ho do wɔ hɔn enyiwa a ɔtratra hɔn ntɔn do; atseetsee, atordzi, adzewia, edwotwa, ndwamambɔ, na ewudzi, nye emumuyɛdze ahorow nyina bɛyɛɛ hɔn suban; naaso, mber dodowara dɛ wobotum no, wɔmaa mbra no yɛɛ edwuma wɔ hɔn a wɔtõe no nyinara do.

33 Na ɔbaa dɛ wɔdze mbra no yɛɛ edwuma wɔ dɔm no mu, wɔtsẽaa obiara dɛ mbrɛ no bɔn a ɔyɛe no tse, na dɛm maa wɔhwɛɛ hɔn ho yie, na woenntum annyɛ emumuyɛdze biara a ɔbɛma hɔn ho ada hɔ; dɛm ntsi, asomdwee baa Nephi no nkorɔfo no mu kesii ber a atsɛmbuafo no dzii adze no ne mfe a otsĩa enum mu.