Kyerɛwsɛm
Alma 49


Tsir 49

Lamanfo no a woetu sa no nntum mmfa Ammonihah na Noah nkurow a wɔabɔ ho ban no—Amalickiah paa Nyame na ɔkã ntam dɛ ɔbɔnom Moroni no bɔgyaa—Helaman na n’enuanom kɔ do hyɛ Asɔr no dzen. Bɛyɛ mfe 72 Ansaana wɔbɔwo Christ.

1 Na afei ɔbaa dɛ bosoom a otsĩa dubiako wɔ afe a otsĩa duakron no mu wɔ da a otsĩa du wɔ bosoom no mu no, wohun dɛ Lamanfo nsordaafo no reba Ammonihah asaase do.

2 Na hwɛ, wɔakyekyer kurow no bio, na Moroni dze nsordaafo ekogu kurow no ne kurotsia, na wɔatow ndɛtse dze abɔ ho aporɔw dze agye hɔnho ban amma Lamanfo hɔn egyen-menaba nye abo annka hɔn; na hwɛ, wɔdze abo nye egyen-menaba kõ.

3 Hwɛ, mekaa dɛ aAmmonihah kurow no wɔakyekyer no bio. Mese hom dɛ, nyew, wɔakyekyer ne fã bi; na osian dɔm no hɔn emumuyɛ ntsi Lamanfo no asɛɛ hɔ pɛn, wɔdween dɛ ɔrennyɛ dzen mma hɔn bio dɛ wɔbɛfa.

4 Na mbom hwɛ, hɔn abaw guraa kɛsenara; na hwɛ, Nephifo no etutu dɛtse aboa ano afã na afã dze etu bɔnsa etwa hɔnho ehyia, na ɔkrɔn ara yie ma Lamanfo nntum nntow hɔn abo nye hɔn egyen-menaba no nngu hɔn do mmpira hɔn, nna wonnkotum afa beebi aba hɔn do gyedɛ hɔn kwan a wɔfa mu no ara nko.

5 Afei dɛm aber yi no Lamanfo nsordaafo asahen ekunyin no hɔn abaw guraa mbordo, osian Nephifo no hɔn nyansaa a wonyae dze bɔɔ hɔnho ban no ntsi.

6 Afei Lamanfo hɔn banodzifo no dween dɛ osiandɛ wɔdɔɔ sõ ntsi, nyew, wɔdween dɛ iyi bɛma woetum aba hɔn do dɛ mbrɛ wɔyɛ no daa no; nyew, nna hɔn so wɔdze akokyɛm, nye akatabo esiesie hɔnho, na wɔdze abowa-nwoma apempam ntar ahyɛ, nyew, ntar a no mu yɛ dur ara yie na wɔdze akata hɔn adagyaw do.

7 Na wosiesiee hɔnho dɛm no ntsi wɔdween dɛ ɔrennyɛ dzen mma hɔn koraa dɛ wɔbɛkã hɔn enuanom no ahyɛ na woedzi hɔn do konyim na wɔdze hɔn ahyɛ nkowaasom kɔndua mu, anaa woetwitwa hɔn eku hɔn dɛ mbrɛ wɔpɛ.

8 Na mbom hwɛ, hɔnho boow hɔn kɛsenara wɔ ber a wohun dɛ awoesiesie hɔnho rotweɔn hɔn wɔ kwan bi do a wonnhun bi da wɔ Lehi ne mba mu. Afei nna woesiesie hɔnho rotweɔn Lamanfo no, na wɔnye hɔn akõ wɔ kwan a Moroni dze akyerɛ hɔn do.

9 Na ɔbaa dɛ Lamanfo no, anaadɛ Amalickifo no hɔnho boow hɔn mbordo ber a wohun mbrɛ woesi esiesie hɔnho dɛ wɔrobɔkõ no.

10 Afei sɛ ɔhen Amalickiah na odzii no nsordaafo hɔn enyim fi aNephi asaase do dze bae a nkyɛ annhwɛ a ɔbɛma Lamanfo no akɔ Nephifo no do wɔ Ammonihah kurow no mu; na hwɛ, ɔnodze ommbu no nkorɔfo hɔn bɔgyaa ho bi koraa.

11 Na mbom hwɛ, Amalickiah nankasa ammba ammbɔkõ. Na hwɛ, no nsordaafo no hɔn asahen ekunyin no enntum annkɔ Nephifo no do wɔ Ammonihah kurow no mu, osiandɛ Moroni asakyer nhyehyɛɛ biara a wɔyɛe wɔ Nephifo no mu araa ma Lamanfo no abaw guraa wɔ hɔn asoɛe hɔ ma woenntum ammba hɔn do.

12 Dɛm ntsi wɔsaan hɔn ekyir kɔr sar no do na wɔkɛfaa hɔn ntamadan na wɔdze faa Noah asaase do kwan; wɔdween dɛ hɔ so nye bea a ntoado a obeye ama hɔn ama woeetum aba Nephifo do.

13 Nna wonnyim dɛ Moroni agyegye ban anaadɛ esisi aaban atsentsen wɔ kuropɔn biara a etwa ehyia asaase no ho nyina; dɛm ntsi, wosii mu dɛ wɔrokɔ Noah asaase do a wɔabɔ hɔn tsirmu pɔw dzendzenndzen wɔ hɔnho; nyew, hɔn nsordaafo asahen ekunyin begyinaa hɔn enyim na wodzii nsew dɛ wɔbɛsɛɛ dɔm a wɔwɔ dɛm kurow no mu no nyina.

14 Na mbom hwɛ, hɔnho boow hɔn, osiandɛ nna Noah kurow no a nkyɛ ɔyɛ bea a hɔ yɛ mberɛw, osian Moroni ntsi no, hɔ abɛyɛ dzen, na n’ahoɔdzen akyɛn Ammonihah kurow n’ahoɔdzen mpo.

15 Na afei, hwɛ, iyi yɛ Moroni ne nyansaa; osiandɛ osusuu ho na ohun dɛ sɛ wɔba Ammonihah kurow no mu a hɔn akoma botu; na Noah kurow no nye asaase ne bea a hɔ yɛ mberɛw, dɛm ntsi, wobefi hɔ akɔ hɔ nye hɔn akɔkõ; na dɛmara nna ɔrohwehwɛ.

16 Na hwɛ, Moroni eyi Lehi ayɛ no nsordaafo no hɔn asahen panyin dɛ ɔnhwɛ dɔm a wɔwɔ kurow no mu no do; na ɔno nye aLehi kor noara a ɔnye Lamanfo no kõe wɔ Sidon esutsen no boka afamu bɔnsa no mu no.

17 Na afei hwɛ, ɔbaa dɛ, ber a Lamanfo no hun dɛ Lehi na ɔhwɛ kurow no do no, hɔn abaw guraa bio, osiandɛ wosuroo Lehi dodow naaso nna hɔn nsordaafo asahen ekunyin no akã ntam edzi nsew dɛ wɔbɔkɔ kurow no do; dɛm ntsi, wɔdze hɔn nsordaafo no bae.

18 Afei hwɛ, Lamanfo no nnhu kwan biara a wɔbɛfa do dze akɔ hɔn abantsentsen no mu biara mu kã hɔn kwan kortsee no ho, osiandɛ ban a wɔatow dze abɔ kurow noho aprɔw no krɔn dodow, na mona a woetu dze etwa ho ehyia no so mu dɔ dodow, na kwan a ɔda hɔ ara nye kwan kortsee noara.

19 Na aber no nna Nephifo no ayɛ krado dɛ wɔbɔtotow abo nye egyen-menaba dze asɛɛ hɔn mu biara a ɔbɛper dɛ ɔbɔfow akɛhɛn abantsentsen no mu wɔ kwan biara do.

20 Dɛm na wɔboaboaa hɔnho, nyew, hɔn mbarimba akatakyi ahoɔdzenfo, dɔm a wokurakura hɔn nkrantsee nye hɔn totowabo ayɛ krado dɛ wobotwitwa obiara a ɔbɛper dɛ abodua kwan no mu dze aba bea a wɔabɔ ho ban no na dɛm na wɔboaboaa hɔnho dɛ wɔnye Lamanfo no robɔkõ dze agye hɔnho.

21 Na ɔbaa dɛ Lamanfo no hɔn nsordaafo asahen mpanyimfo no dze hɔn nsordaafo baa kwan no ano, na wɔhyɛɛ ase dɛ wɔnye Nephifo no ridzi aper wɔ hɔ, dze enya kwan dze hɔn aba bea a wɔagye ban wɔ no; na mbom hwɛ, wɔpaam hɔn fi ber to ber, araa ma wokum hɔn mu pii.

22 Afei ber a wohun dɛ hɔn nsa nntum nnda Nephifo no do wɔ kwan n’ano hɔ no, wɔhyɛɛ ase dɛ worututu hɔn dɛtse a wɔaboa ano no dze abɔ kwan ama hɔn nsordaafo no ma wɔafa mu, ama hɔn so woeetum nye hɔn akõ pɛr; na mbom hwɛ, ber a wogu do reyɛ dɛm no, wɔtotow abo nye egyen-menaba guu hɔn do dze paam hɔn fii hɔ; na ber a nkyɛ wɔpɛɛ dɛ wotutu dɛtse dze esiw mona no, hɔn efun na epirafo na wɔdze hyɛɛ mu mã.

23 Dɛm maa Nephifo no dzii hɔn atamfo do konyim; na iyi maa Lamanfo no peer dɛ wɔbɛsɛɛ Nephifo no kesii dɛ wokum hɔn asahen ekunyin no nyina; nyew, wokum Lamanfo bɔbor apem; wɔ aber a nna woennku Nephinyi ɔkra kor.

24 Bɛyɛ hɔn mu eduonum na wopirapirae, iyinom Lamanfo hɔn egyen-menaba a wɔtotowee duaa kwan tseaba no mu no na ɔkãa hɔn na mbom hɔn akokyɛm nye hɔn akatabo, nye hɔn dadzekyɛw no gyee hɔn, dɛm ntsi wopirapiraa wɔ hɔn anan ho nko, na hɔn mu pii pirae ara yie.

25 Na ɔbaa dɛ, ber a Lamanfo no hun dɛ woekuku hɔn asahen ekunyin nyina no, woguanee kɔr sar no do. Na ɔbaa dɛ wɔsaan hɔn ekyir kɔr Nephi asaase do, dɛ wɔrekɛkã akyerɛ hɔn hen Amalickiah a ɔyɛ Nephinyi wɔ awo mu no dza osii hɔ a ɔmaa hɔn mu pii ewuwu.

26 Na ɔbaa dɛ no bo fuuw no nkorɔfo no mbordo, osiandɛ ne nsa annka Nephifo no ammfa hɔn ammbɛhyɛ nkowaasom kɔndua mu.

27 Nyew, no bo fuuw mbordo ma dɛm ntsi aɔpaa Nyankopɔn, nye Moroni so, ɔkãa ntam dzii bnsew dɛ ɔbɔnom no bɔgyaa; na iyi kyerɛ dɛ Moroni dzi Nyankopɔn ne mbrasɛm do, ntsi na otumii siesiee sumabew dze maa no nkorɔfo no.

28 Na ɔbaa dɛ, dɛm aber noara so mu nna Nephi no nkorɔfo no so adaa Ewuradze hɔn Nyankopɔn ase, wɔ no tum a onnyi kabea a ɔnam mu agye hɔn efi hɔn atamfo nsa.

29 Na dɛm na atsɛmbuafo hɔn afe a otsĩa duakron wɔ Nephi no nkorɔfo do dze baa ewiei.

30 Nyew, na asomdwee baa dɔm no hɔn mu kyɛree ara yie, na asɔr no yɛɛ prɔmprɔm kɛse osiandɛ wosii nketse suoo Nyame n’asɛm mu dɛ, ma dza Helaman na Shiblon, nye Corianton, nye Ammon na n’enuanom no kãa kyerɛɛ hɔn no, nyew, nye hɔn so a wɔnam Nyankopɔn ne anhyehyɛɛ krɔnkrɔn do hyɛɛ hɔn asɔfo, na wonumaa hɔn kɔr nnuho mu no, na wɔsomaa hɔn dɛ wɔnkɛkã nsɛmpa no wɔ dɔm no mu.