1 Na ɔbaa dɛ hɔn adzedzi n’afe a otsĩa enum n’ahyɛse no wentwiwentwi hyɛɛ ase sii dɔm no mu; osiandɛ ɔbarimba bi a wɔfrɛ no Amlici a ɔawea, nyew, ɔyɛ wiadze nyansafo a nna ɔka kuw a dɛm ɔbarimba no a ɔdze nkrantsee kuu ^aGideon no dɔm no, nyia wokum no bi hyɛɛ ananmu dɛ mbrɛ mbra no tse no—

2 Afei Amlici yi nam ndabraba do twee nkorɔfo pii dzii n’ekyir; wɔdɔree araa ma wɔhyɛɛ ase dɛ worinya tum ara yie; na wɔhyɛɛ ase peer dɛ wɔdze Amlici bedzi ɔhen wɔ dɔm no do.

3 Afei dɛm adze yi haaw asɔrmba na hɔn a Amlici enntum anntwe hɔn enndzi n’ekyir no; osiandɛ wonyim dɛ mbrɛ hɔn mbra no tse no, dɔm no hɔn ^andze na wogyina do dze yɛ ndzɛmba a ɔtsetse dɛm.

4 Dɛm ntsi, sɛ ɔba dɛ dɔm no pen do ma Amlici, dɛ ɔyɛ omumuyɛnyi ntsi, ^aɔbɛgye hɔn kyɛfa nye dza ɔyɛ asɔr no ne ndzinoa efi hɔn nsamu; osiandɛ n’adwen ara nye dɛ ɔbɛsɛɛ Nyankopɔn n’asɔr.

5 Na ɔbaa dɛ dɔm a wɔwɔ asaase no do nyina boaa hɔn ano, obiara kyerɛɛ n’adwen dɛ ɔpɛ anaa otsia Amlici, wɔboaa hɔn ano ekuwekuw, na mansotwe wanwa ara yie baa hɔn mu ma ^awentwiwentwi baa ankorankor ntamu.

6 Na dɛm na wɔkaa hɔn ho bɔɔ mu dze kyerɛɛ hɔn adwen wɔ asɛm no ho; na wɔdze kɔtoo atsɛmbufo no enyim.

7 Na ɔbaa dɛ dɔm no maa hɔn ndze do tsiaa Amlici, ma wɔannhyɛ no ɔhen wɔ dɔm no do.

8 Afei dɛm maa hɔn a wotsia no no dzii dɛw kɛsenara wɔ hɔn akoma mu; na mbom Amlici kenyaan hɔn a wɔwɔ n’afã no ma hɔn bo fuuw hɔn a wonnyi n’afã no.

9 Na ɔbaa dɛ wɔboaa hɔn ano, na wɔseraa Amlici ngo ma ɔbɛyɛɛ hɔn hen.

10 Afei ber a wɔyɛɛ Amlici ɔhen wɔ hɔn do no, ɔhyɛɛ hɔn dɛ wɔmfa akodze nkɔ hɔn enuanom no do; na ɔyɛɛ iyi ama ɔdze hɔn aabɛhyɛ n’ase.

11 Afei Amlici no dɔm no dze Amlici ne dzin too hɔn do na wɔfrɛɛ hɔn ^aAmlicifo; na hɔn a wɔaka no so wɔfrɛɛ hɔn ^bNephifo, anaadɛ Nyame no dɔm.

12 Dɛm ntsi Nephi no dɔm no hun dza Amlicifo no rohwehwɛ ayɛ no, hɔn so siesiee hɔn ho dze hyiaa hɔn kwan; nyew, wɔfaa nkrantsee, na mpea, nye egyen na egyen menaba, nye abo na totowabo nye ɔkõ ho ^aakodze ahorow nyina bi.

13 Na dɛm na wosiesiee hɔn ho dɛ wɔdze behyia Amlicifo no kwan wɔ ber a wɔdze bɛba no mu. Na woyiyii nsordaafo no mu asahen, na asahen mpanyimfo na asahen mu ekunyin dɛ mbrɛ hɔn dodow tse.

14 Na ɔbaa dɛ Amlici maa no dɔm no ɔkõ ho akodze ahorow nyina bi; na no so yiyii ahwɛdofo na mpanyimfo, dɛ wondzi hɔn enyim nye hɔn enuanom no nkɔkõ.

15 Na ɔbaa dɛ Amlicifo no baa koko Amnihu do, dza ɔwɔ ^aesutsen Sidon no boka afamu hɔ no, dza ɔpem fa ^bZarahemla asaase do no, na hɔ na wɔhyɛɛ ase dɛ wɔnye Nephifo rokõ.

16 Afei Alma na ɔyɛ ^aɔtsɛmbufo panyin, nye Nephi no dɔm no hɔn ambrado, dɛm ntsi ɔnye no dɔm no kɔree, nyew ɔnye no asahen nye no asahen ekunyin a ɔdze hɔn sisii no nsordaafo no ano no, wɔnye Amlicifo no kɔkõe.

17 Na wɔhyɛɛ ase dɛ worukuku Amlicifo no wɔ koko a ɔwɔ Sidon boka afamu hɔ no do. Na Amlicifo no dze ahoɔdzen kɛse gyinaa Nephifo no enyim araa ma Nephifo no mu pii totɔree wɔ Amlicifo no enyim.

18 Naaso Ewuradze maa Nephifo hɔn abasa mu yɛɛ dzen ma wokunkum Amlicifo no ara yie ma wɔhyɛɛ ase dɛ woruguan fi hɔn enyim.

19 Na ɔbaa dɛ Nephifo no tsiiw Amlicifo no wɔ da no nyina mu, na wokunkum hɔn ara yie, na Amlicifo a ^awokum hɔn no yɛ akra mpem duebien ahaenum eduasa ebien, na Nephifo a wokum hɔn no so yɛ akra mpemesia ahaenum eduosia ebien.

20 Na ɔbaa dɛ ber a Alma hun dɛ onnkotum etsiw Amlicifo no bio no, ɔmaa no nkorɔfo no sisii hɔn ntamadan wɔ ^aGideon bɔnsa no mu, wɔdze Gideon no a owui wɔ ^bNehor ne nkrantsee ano no ne dzin too dɛm bɔnsa no; na dɛm bɔnsa yi mu na Nephifo no sisii hɔn ntamadan wɔ dɛm anafua da no mu.

21 Na Alma somaa atsɛwfo dɛ wontsiw Amlicifo nkaa no, ama woeehu hɔn nhyehyɛɛ nye hɔn apam, ama oetum abɔ noho ban wɔ hɔn ho, na oetum abɔ no dɔm so ho ban ma wɔaannsɛɛ hɔn.

22 Afei hɔn a ɔsomaa hɔn dɛ wɔnkɛtsɛw Amlicifo wɔ hɔn asoɛe no, wɔfrɛ hɔn Zeram, na Amnor, na Manti nye Limher; iyinom nye hɔn a wɔnye hɔn nkorɔfo kɔree kɛtsɛɛw Amlicifo hɔn nseraban no.

23 Na ɔbaa dɛ adze kyee no wɔsanee baa Nephifo asoɛe ntsɛmara a nna ahobow akã hɔn, na wɔdze suro kɛse see dɛ:

24 Hwɛ, yɛtaa ^aAmlicifo nseraban no do, na ahobow kɛse kãa hɛn wɔ Minon asaase a ɔwɔ Zarahemla asaase n’etsifi no, ɔdze rokɔ ^bNephi asaase do hɔ no, yehun Lamanfo dɔmtutuw; na hwɛ, Amlicifo no akɛkã hɔn ho;

25 Na wɔkɔ hɛn enuanom no a wɔwɔ dɛm asaase no do no hɔn do; ma wɔdze hɔn nguankuw, nye hɔn yernom na hɔn mba ruguan wɔ hɔn enyim dze reba hɛn kurow mu afamu, na gyedɛ hɛn ho yɛ har, annyɛ dɛm a, wɔbɛba abɛfa hɛn kurow, na woekuku hɛn egyanom, na hɛn yernom, nye hɛn mba.

26 Na ɔbaa dɛ Nephi no nkorɔfo no faa hɔn ntamadan, na wofii Gideon bɔnsa mu hɔ dze faa kwan a ɔdze kɔ hɔn kuropɔn a ɔyɛ ^aZarahemla kuropɔn no do.

27 Na hwɛ, ber a worutwa esutsen Sidon no, Lamanfo no nye Amlicifo no a hɔn ^adodow tse dɛ mpoano anhwea no, baa hɔn do dɛ wɔrebɛsɛɛ hɔn.

28 Naaso, Nephifo no a nna Ewuradze ama n’abasa do dze ^aahyɛ hɔn dzen no, wɔ ber a wɔbɔɔ mpaa dzendzenndzen maa no dɛ ɔngye hɔn mfi hɔn atamfo nsa no, dɛm ntsi Ewuradze tsiee hɔn sufrɛ, na ɔhyɛɛ hɔn dzen, ma Lamanfo nye Amlicifo no totɔree wɔ hɔn enyim.

29 Na ɔbaa dɛ Alma nye Amlici dze nkrantsee bɔɔ enyim; na wɔkõo dzendzenndzen.

30 Na ɔbaa dɛ Alma a ɔyɛ Nyame nyimpa, a ^agyedzi ahyɛ no mã no, tseaa mu dɛ: O Ewuradze, hu me mbɔbɔr na fa mo nkwa kyɛ me, ama mayɛ edwindadze wɔ wo nsamu dze eetum agye dɔm yi na maakora hɔn do.

31 Afei ber a Alma kãa dɛm nsɛm yi wiei no, ɔnye Amlici suoo ɔkõ mu bio; na ɔmaa no ahoɔdzen kɛsenara ma ɔdze nkrantsee kum Amlici.

32 Na ɔnye Lamanfo hɔn hen so suoo ɔkõ mu; na mbom Lamanfo hɔn hen no guanee fii Alma enyim kɔr n’ekyir na ɔsomaa n’aweɔmfo no dɛ wɔnye Alma nkɔkõ.

33 Mbom Alma na n’aweɔmfo no, nye Lamanfo hɔn hen n’aweɔmfo no kõe araa kesii dɛ okunkum hɔn na ɔpaam hɔn ma wɔkɔr ekyir.

34 Na iyi maa kwan daa asaase no do, anaadɛ ɔmaa kwan daa esutsen Sidon n’anee afamu, na wɔtoow Lamanfo a woekunkum hɔn no efun guu Sidon esu no mu, ama no dɔm no eenya kwan etwa na wɔnye Lamanfo no nye Amlicifo no akɔkõ wɔ esutsen n’anee afamu hɔ.

35 Na ɔbaa dɛ ber a hɔn nyinara twaa esutsen Sidon no, Lamanfo nye Amlicifo no hyɛɛ ase dɛ woruguan wɔ hɔn enyim, ammfa hɔn ho koraa dɛ wɔdɔɔ sõ ara ma wonnkotum akan hɔn.

36 Na woguanee wɔ Nephifo no enyim dze faa sar no do, bea a ɔda anee na etsifi afamu, wɔkɔr ekyir ma wɔtraa asaase n’ahe no; na Nephifo no dze hɔn ahoɔdzen nyina tsiiw hɔn na wokokunkum hɔn.

37 Nyew, wohyiaa hɔn afã na afã nyina, na wokunkum hɔn na wɔpaam hɔn, kesii dɛ wɔbɔɔ apetse wɔ anee nye etsifi afamu hɔ nyina, kesii dɛ wodur sar a wɔfrɛ no Hermounts no do; na hɔ yɛ sar no bea a mbowa abɔyafo nye mbowa a wɔyɛ ndam hyehyɛe.

38 Na ɔbaa dɛ dodowara wopirapirae no wowuwui wɔ sar no do, na dɛm mbowa abɔyafo yi nye wimu mpɛtɛ dzii hɔn nam; na wohun hɔn mbiew dɛ ɔboa ano krɔnn wɔ asaase no do.