1 Na ɔbaa dɛ dodowara a wɔmmpɛ dɛ wotsie Helaman na n’enuanom hɔn nsɛm no kãa hɔnho boaa ano tsiaa hɔn enuanom no.

2 Na afei hwɛ, hɔn bo fuuw kɛse ma wɔyɛɛ hɔn adwen dɛ woboku hɔn.

3 Afei hɔn a hɔn bo efuw hɔn enuanom no hɔn ɔkandzifo no yɛ nyimpa a ɔsõ na noho so yɛ dzen; na ne dzin dze Amalickiah.

4 Na Amalickiah pɛɛ dɛ obedzi hen; na nkorɔfo no a hɔn bo efuw no so pɛɛ dɛ ɔyɛ hɔn do hen; na hɔn mu pii na wɔyɛ ^aatsɛmbuafo nkumaa wɔ asaase no do, nna wɔrohwehwɛ tum.

5 Na Amalickiah daadaa hɔn dɛ sɛ wɔgye no to mu na wɔboa no ma ɔbɛyɛ hɔn hen a ɔbɛyɛ hɔn ahwɛdofo wɔ dɔm no do.

6 Dɛm na Amalickiah dze twee hɔn ma wɔtsew etua, na Helaman na n’enuanom no hɔn nsɛmpa a wɔrekã no ammfa hɔnho koraa, nyew, ɔhwɛ kɛse a wɔdze rohwɛ asɔr no do no ammfa hɔnho koraa; nna hɔn na wɔyɛ asɔfo mpanyimfo a wɔhwɛ asɔr no do.

7 Na dodowara wɔ asɔr no mu a wɔgyee Amalickiah ne ndaadaasɛm no dzii, dɛm ntsi wɔtseew etua fii asɔr no mu mpo; na dɛm na ɔmaa Nephi no nkorɔfo no hɔn ndzeyɛɛ bɛyɛɛ ɔhaw na esian kɛse na hɔn ^akonyimdzi kɛse a wodzii wɔ Lamanfo do, nye hɔn ehurusi kɛse a wodzii wɔ ɔgye a Ewuradze dze agye hɔn no ammfa hɔnho koraa.

8 Iyi ma yehu mbrɛ osi ma adasamba hɔn werɛ fir Ewuradze hɔn Nyankopɔn ^antsɛntsɛm, nyew, mbrɛ osi ma hɔnho yɛ har wɔ emumuyɛ ne yɛ ho, na wɔma abɔnsam twe hɔn kɔ.

9 Nyew, na yehu ^aemumuyɛdze kɛse so a omumuyɛnyi kor tum ma osi adasamba mu.

10 Nyew, yehu dɛ Amalickiah, osian ne ndabraba na ɔyɛ nyimpa a ndaadaasɛm pii ahyɛ n’anomu mã ntsi ɔtwee dɔm no pii hɔn akoma ma wɔyɛɛ bɔn; nyew, na wɔpɛɛ dɛ wɔsɛɛ Nyankopɔn n’asɔr, na wɔsɛɛ ^aahotɔ fapem a Nyankopɔn dze ama hɔn no, anaadɛ nhyira a Nyankopɔn dze ehyira asaase n’enyi osian ^batseneneefo a wɔwɔ asaase no do no ntsi.

11 Na afei ɔbaa dɛ ber a Moroni a ɔyɛ Nephifo hɔn ^ansordaafo panyin no tsee dɛm etuatsew yi no, no bo fuuw Amalickiah.

12 Na ɔbaa dɛ osunsuaan no sortar mu; na ɔfaa no mu kor, na ɔkyerɛɛw mu dɛ—^aYɛdze kaa hɛn Nyankopɔn, hɛn nyamesom, nye fahodzi, nye hɛn asomdwee, hɛn yernom, nye hɛn mba—na ɔdze kyekyeer poma ano.

13 Na ɔdze ne dadzekyɛw hyɛe, nye n’akatabo na ɔfaa n’akokyɛm, na ɔdze ne nkrantsee bɔɔ n’asen do; na ɔfaa poma no a no sortar bɔ ano no, (na ɔfrɛɛ no ahotɔ mfrankaa) na ɔbɔɔ no mu adze wɔ famu, na ɔbɔɔ mpaa dzendzenndzen maa ne Nyankopɔn dze serɛɛ dɛ fahodzi mbra n’enuanom do mber dodow biara a Christian fɛkuw bɛda ho atsena asaase no do no—

14 Na dɛm na hɔn a wonnyi asɔr no mu no dze frɛɛ Christ n’agyedzifo nokwafo no a wɔwɔ Nyankopɔn n’asɔr no mu no.

15 Na hɔn a wɔwɔ asɔr no mu no dzii nokwar; nyew, hɔn a wɔyɛ Christ n’agyedzifo nokwafo no faa Christ ne ^adzin too hɔn do enyigye mu ara, na wɔfrɛɛ hɔn ^bChristianfo osian gyedzi a wɔwɔ wɔ Christ a ɔbɛba no no mu ntsi.

16 Na dɛm ntsi aber yi mu, Moroni bɔɔ mpaa dɛ Christianfo hɔn ahwehwɛdze nyɛ hɔ, mma hɔn na fahodzi a ɔwɔ asaase no do no ntsim.

17 Na ɔbaa dɛ ber a ɔdze ne kra mu nsɛm too Nyame enyim no, ɔbobɔɔ nsaase nyina a ɔwɔ ^aAmamfõ n’anaafo afamu edzin, nyew, ne sin ara nye dɛ, nsaase nyina a ɔwɔ etsifi nye dza ɔwɔ anaafo nyina—Asaase a wɔasan mu eyi, nye fahodzi asaase no.

18 Na ɔsee dɛ: Ampa Nyankopɔn remma kwan mma hɛn a wokyir hɛn osiandɛ yɛafa Christ ne dzin ato hɛn do ntsi, wonntsiatsia hɛn do wɔ famu na wɔnnsɛɛ hɛn, gyedɛ hɛnankasa hɛn mbrato na ɔdze dɛm adze yi bɛba hɛn do.

19 Na ber a Moroni kãa dɛm nsɛm yi wiei no, ɔkɔr dɔm no mu, na onyaam ^an’atar a osunsuaan mu no wɔ wimu, ama hɔn nyinara woeehu dza ɔakyerɛw wɔ tamsin no mu no, na ɔdze ndze kɛse tsẽaa mu dɛ:

20 Hwɛ, obiara a ɔgye dɛm frankaa yi to mu wɔ asaase yi do no, ɔmbra wɔ Ewuradze n’ahoɔdzen mu, na woedzi ahyɛmu ntsi wɔnnkɛpɛ dɛ wobosuo hɔn kyɛfa, nye hɔn nyamesom mu, ama Ewuradze Nyankopɔn eehyira hɔn.

21 Na ɔbaa dɛ ber a Moroni kãa dɛm nsɛm yi wiei no, hwɛ, dɔm no faa hɔn akotar hyɛe na wotuu mbirika bae, na wosunsuaan hɔn ntar mu dze dzii ahyɛmu dɛ wɔrommpow Ewuradze hɔn Nyankopɔn, anaadɛ sɛ wɔtõ Nyankopɔn ne mbrasɛm no, anaa wɔyɛ mbratofo, na hɔn ^aenyi tõ dɛ wɔbɛfa Christ ne dzin no ato hɔn do a, ɔno Ewuradze ntsetsew hɔn mu tse dɛ mbrɛ woesunsuan hɔn ntar mu no.

22 Afei iyi nye ahyɛmu a wodzii, na wɔtoow hɔn ntar guu Moroni n’ananadze, see dɛ: Yɛnye hɛn Nyame edzi ahyɛmu, dɛ ɔnsɛɛ hɛn dɛ hɛn enuanom a wɔwɔ etsifi afamu no, sɛ yɛhwe ase wɔ mbrato mu a; nyew sɛ yɛhwe ase wɔ mbrato mu a ɔntow hɛn nkyen hɛn atamfo hɔn ananadze, mpo dɛ mbrɛ yɛatow hɛn ntar egu w’ananadze dɛ wontsiatsia do yi.

23 Moroni see hɔn dɛ: Hwɛ, yɛyɛ Jacob n’asefo nkaa; nyew, yɛyɛ ^aJoseph no a n’enuanom sunsuaan ^bn’atar mu nketsenketse pii no ^cn’asefo nkaa; nyew, na afei hwɛ, hom mma yɛnkaa dɛ yebedzi Nyankopɔn ne mbrasɛm do, annyɛ dɛm a hɛn enuanom no bosusuaan hɛn ntar mu, na wɔdze hɛn egu efiadze, anaadɛ wɔatɔn hɛn, anaa woekuku hɛn.

24 Nyew, hom mma yensuo hɛn ahotɔ mu dɛ Joseph ne ^ankaa; nyew, hom mma yɛnkaa Jacob ne nsɛm a ɔkãa ansaana orubowu no, na hwɛ, ohun dɛ wɔakora Joseph no sortar no ne fa nkaa bi do amma ɔannsɛɛ. Na ɔsee dɛ—Dɛ mbrɛ wɔkoraa me babanyin n’atar ^bnkaa yi do no, dɛmara so na Nyankopɔn bɔkora me babanyin n’asefo nkaa no do, dze ama noho, na ber no mu ara so na Joseph n’asefo nkaa no so wɔbɛhera, dɛ mbrɛ n’atar nkaa no yɛe no.

25 Afei hwɛ, iyi ma me kra dzi yaw; naaso, iyi ekyir nyina me kra wɔ enyigye wɔ me babanyin no mu, osian n’asefo binom a wɔbɛfa hɔn akɔ Nyankopɔn nkyɛn no ntsi.

26 Afei hwɛ, iyi nye Jacob n’anomukasa.

27 Na afei woana nyim dɛ ɔbɛyɛ dɛ Joseph n’asefo nkaa no a wɔbɛhera dɛ mbrɛ n’atar yɛe no, nye hɔn a wɔatsew etua efi hɛn mu no? Nyew, na obotum ayɛ hɛnankasa so mpo sɛ yenngyina pintsinn wɔ gyedzi mu wɔ Christ mu a.

28 Na afei ɔbaa dɛ ber a Moroni kãa dɛm nsɛm yi wiei no, ɔkɔree, na ɔsomaa so ma wɔkɔr asaase ne mbeabea nyina a etuatsew wɔ no, na wɔboaboaa nkorɔfo nyina a wɔpɛ dɛ wosuo hɔn ahotɔ mu yie no ano na wɔsee hɔn dɛ wɔnye Amalickiah nye hɔn a wɔatsew etua no a wɔfrɛɛ hɔn Amalickifo no nsi.

29 Na ɔbaa dɛ ber a Amalickiah hun dɛ Moroni no nkorɔfo no dɔɔ sõ koraa sen Amalickifo no—na ohunii so dɛ no nkorɔfo no hɔn adwen hihim wɔ dza wɔayɛ ho no, osuroo dɛ bɛyɛ na orinnya egyinabew, dɛm ntsi ɔfaa no nkorɔfo no a onyim dɛ wɔbɛkã no do no, na ɔdze hɔn fii hɔ kɔr Nephi asaase do.

30 Afei Moroni hun dɛ ɔnnsɛ dɛ Lamanfo no nya ahoɔdzen bio; dɛm ntsi osusuu ho dɛ obesiw Amalickiah no nkorɔfo no kwan, anaadɛ ɔbɛfa hɔn nye hɔn asan hɔn ekyir aba na oeku Amalickiah; nyew, osiandɛ onyim dɛ obonunu Lamanfo no ma hɔn bo efuw hɔn, na ɔama wɔaba nye hɔn abɔkõ; na iyi nye dza onyim dɛ Amalickiah bɛyɛ ama ne nsa akã dza osi n’enyido.

31 Dɛm ntsi, Moroni hun dɛ ohia dɛ ɔfa no nsordaafo no, hɔn a wɔaboa hɔn ano, na woesiesie hɔnho, na woedzi ahyɛmu ntsi wɔnnkɛpɛ dɛ wɔbɔhwehwɛ asomdwee—na ɔbaa dɛ ɔfaa no nsordaafo na ɔdze hɔn kɔr sar no do, dɛ orikesiw Amalickiah no kwan wɔ sar no do.

32 Na ɔbaa dɛ ɔyɛɛ dza ɔrohwehwɛ, na ɔkɔr sar no do na okotwar Amalickiah no nsordaafo no.

33 Na ɔbaa dɛ Amalickiah nye no dɔm no mu kumaabi guanee, na hɔn a wɔkaa no, wɔdze hɔn hyɛɛ Moroni ne nsa na ɔdze hɔn sanee kɔr Zarahemla asaase do.

34 Afei, Moroni nye nyimpa a atsɛmbuafo mpanyimfo no nye dɔm no ^ayii no sii hɔ, dɛm ntsi ɔwɔ tum wɔ Nephifo nsordaafo do, dɛ ɔbɛma woetsim na ɔakyerɛ no tumdzi wɔ hɔn do.

35 Na ɔbaa dɛ Amalickifo no mu biara ɔammpɛ dɛ ɔnye hɔn woedzi ahyɛmu ntsi wɔnnkɛpɛ dɛ ɔboboa ma woesuo fahodzi mu, ama woeenya fahodzi aban no, ɔmaa wokum no; na hɔn mu kumaabi na wɔpoow fahodzi ahyɛmu no.

36 Na ɔbaa so dɛ, ɔmaa wɔdze ahotɔ mfrankaa sisii abantsentsen biara a ɔwɔ asaase no nyinara a ɔyɛ Nephifo dze no do; na dɛm na Moroni dze duaa ahotɔ mfrankaa wɔ Nephifo no mu.

37 Na wɔhyɛɛ ase dɛ worinya asomdwee bio wɔ asaase no do; na dɛm maa wɔtsenaa asomdwee mu wɔ asaase no do araa dze kesii bɛyɛ afe duakron n’ewiei wɔ atsɛmbuafo no hɔn aber do.

38 Na Helaman nye ^aasɔfompanyimfo no so hwɛe ma biribiara kɔr do pɛpɛɛpɛr wɔ asɔr no mu; nyew, bɛyɛ mfe anan ntamu no mpo wonyaa asomdwee na enyigye wɔ asɔr no mu.

39 Na ɔbaa dɛ dodowara wɔ hɔ a wowui wɔ ^agyedzi a osi pi mu dɛ Ewuradze Jesus Christ apon hɔn akra; dɛm ntsi wɔdze enyigye fii wiadze mu kɔree.

40 Na binom nam papu mu wui, na dɛm yarba yi taa sii wɔ afe ne ber bi mu wɔ asaase no do—na mbom papu no ennku hɔn pii, osian ^andua nye ndwow a oye a nna Nyankopɔn esiesie wɔ hɔ a wɔdze sa yarba no a osian mbrɛ hɔn wimu tse ntsi ɔtaa kã nyimpa no—

41 Mbom binom so wɔ hɔ a osian mpanyinyɛ ntsi ɔmaa wowui; na hɔn a wowui a nna wɔwɔ gyedzi wɔ Christ mu no wɔ tse ^aahomka mu wɔ no mu, dɛ mbrɛ yesusu no ara.