1 Na afei ɔbaa dɛ afe eduonu enum n’ahyɛse wɔ aber a atsɛmbuafo hwɛ Nephi no nkorɔfo do no, ber a nna asomdwee aba Lehi no nkorɔfo nye Morianton no nkorɔfo ntamu wɔ dza ɔfa hɔn nsaasesɛm ho no, na afe eduonu enum no so ahyɛ ase wɔ asomdwee mu no;

2 Mbom, woenntum amma asomdwee enntsim asaase no do annkyɛr, osiandɛ wentwiwentwi hyɛɛ ase wɔ dɔm no mu a ɔfa no ɔtsɛmbuafopanyin Pahoran ho; na hwɛ, dɔm no mu binom wɔ hɔ a wɔpɛɛ dɛ wɔsesã mbra no mu bi kakra.

3 Mbom hwɛ, Pahoran ammpɛ dɛ ɔsesã anaaso ɔammpɛ dɛ ɔbɛma kwan ma wɔasesã mbra no; dɛm ntsi, ɔannkasa hɔn a wɔdze bɔtoo n’enyim dɛ ɔnsesã mbra no hɔn ho.

4 Dɛm ntsi, hɔn a wɔpɛɛ dɛ wɔsesa mbra no hɔn bo fuuw no, na wɔammpɛ dɛ ɔyɛ ɔtsɛmbuafo panyin wɔ asaase no do bio; dɛm ntsi manso sii hɔn mu wɔ asɛm no ho, na mbom wɔannka bɔgya enngu.

5 Na ɔbaa dɛ wɔfrɛɛ hɔn a wɔpɛɛ dɛ wotu Pahoran fi atsɛmbu egua no do no ahensifo, osiandɛ wɔpɛɛ dɛ wɔsesã mbra no wɔ kwan bi do a ɔbɛma woetum etu fahodzi aban no egu na wɔahyɛ ɔhen wɔ asaase no do.

6 Na hɔn so a wɔpɛɛ dɛ Pahoran da ho yɛ ɔtsɛmbuafo panyin wɔ asaase no do no dze dzin fahodzifo too hɔn do; na dɛm na ɔdze mpaapaamu baa hɔn mu, osiandɛ fahodzifo no akã ntam anaadɛ woedzi ahyɛmu dɛ wobokura hɔn nyamesom ne kyɛfa na ne ndzinoa a fahodzi aban dze ama no mu.

7 Na ɔbaa dɛ dɔm no hɔnankasa siesiee wentwiwentwi no. Na ɔbaa dɛ dɔm no fuaa fahodzifo no hɔn nsɛm ekyir, ma Pahoran daa ho tsenaa atsɛmbu egua no do, na iyi maa enyigye kɛse baa Pahoran n’enuanom no mu na ahotɔfo no hɔn mu pii so yɛɛ ma ahensifo no yɛɛ dzinn, na wosuroo dɛ wɔbɔkõ etsia hɔn na mbom wɔgyee fahodzi nsɛm too mu dɛmara.

8 Afei hɔn a wofuaa ahemfo no nsɛm ekyir nye hɔn a wɔyɛ ^aadehye no, nna wɔrohwehwɛ edzi hen; na hɔn a wofuaa hɔn ekyir nye hɔn a wɔreper enya dɔm no do tum na tumdzi no.

9 Mbom hwɛ, nna dɛm aber yi nnyɛ aber a otwar dɛ dɛm wentwiwentwi yi ba Nephi no nkorɔfo mu; osiandɛ hwɛ, Amalickiah enunu Lamanfo no ma woenya ebufuw wɔ Nephifo ho, ma ɔroboaboa nsordaafo a wɔwɔ n’asaase no do hɔ nyina ano, na ɔmaa hɔn akodze, na ɔyɛɛ hɔn krado dɛ wɔrokɔkõ enyiberdo; osiandɛ ^aɔakã ntam dɛ ɔbɔnom Moroni no bɔgyaa.

10 Mbom hwɛ, yebohu dɛ ɔpɛɛ ntsɛm bɔɔ n’anohoba no; naaso, ɔboaboaa noho nye no nsordaafo no so ano ama wɔaaba na wɔnye Nephifo no abɔkõ.

11 Afei no nsordaafo no nndɔɔ sõ pii dɛ mbrɛ nkyɛ wɔtse no, osiandɛ Nephifo no ekuku hɔn mu mpempem; na mbom ammfa hɔnho koraa dɛ hɔn mu pii ahyew dze, eso Amalickiah boaboaa nsordaafo dɔm kese ara a oye ano ma dɛm ntsi nna onnsuro koraa dɛ ɔbɛba Zarahemla asaase do.

12 Nyew, Amalickiah nankasa so mpo na odzii Lamanfo no enyim bae. Na iyi sii atsɛmbuafo aber do wɔ afe eduonu enum no mu; na dɛm aber no ara so mu nna wɔhyɛɛ ase dɛ worisiesie wentwiwentwi a oesi ɔtsɛmbuafo panyin, Pahoran ho no.

13 Na ɔbaa dɛ ber a hɔn a wɔfrɛ hɔn ahensifo no tsee dɛ Lamanfo reba nye hɔn abɔkõ no, dɛw hyɛɛ hɔn akoma mu mã; na wɔpoow dɛ wɔbɛfa akodze, osiandɛ nna hɔn bo efuw ɔtsɛmbuafo panyin no, nye ^aahotɔfo no, dɛm ntsi wɔammpɛ dɛ wɔbɛfa akodze dze abɔ hɔn man ho ban.

14 Na ɔbaa dɛ ber a Moroni hun dɛm no, na ohunii so dɛ Lamanfo no reba hɔn asaase n’ahe do no, no bo fuuw nkorɔfo a ɔaberɛ hɔnho ara yie dze agye hɔn no hɔn asokyew no; nyew, no bo fuuw kɛse; ebufuw hyɛɛ ne kra mã wɔ hɔnho.

15 Na ɔbaa dɛ ɔnye dɔm no yɛɛ adwenkor somaa ma wɔdze ntotɔserɛ nwoma kɛmaa asaase no do ambrado no dɛ wɔpɛ dɛ ɔkenkan na ɔma ɔno (Moroni) tum dɛ ɔnhyɛ etuatsewfo no ma wɔmbɔ hɔn kurow ho ban na sɛ wɔannyɛ a wonku hɔn.

16 Osiandɛ dza osi n’enyi do a odzi kan nye dɛ ɔbɛma wentwiwentwi nye etuatsew a ɔwɔ dɔm no mu no abɔ adze; na hwɛ, iyi na ɔdze ɔsɛɛ aba hɔn do. Na ɔbaa dɛ dɔm no penee do.

17 Na ɔbaa dɛ Moroni hyɛɛ no nsordaafo no dɛ wɔnkɔ ahensifo no do nkotwuw hɔn adze wɔ famu mfa nsɛɛ hɔn ahantanyɛ nye hɔn adehyedzi anaadɛ wɔmfa akodze na wɔmfa mfua ahotɔ ekyir.

18 Na ɔbaa dɛ nsordaafo no sii mu kɔr hɔn do; na wotwuuw hɔn adze, sɛɛ hɔn ahantanyɛ nye hɔn adehyedzi araa ma ber a wɔfaa hɔn ɔkõ ho akodze, na wɔyɛɛ dɛ wɔnye Moroni no dɔm no robɔkõ no, wotwitwaa hɔn guu famu.

19 Na ɔbaa dɛ ^aetuatsewfo no hɔn mu mpem anan na wɔdze nkrantsee twitwaa hɔn guu famu; na hɔn banodzifo no a woennkuku hɔn wɔ ɔkõ mu no, wɔdze hɔn koguu efiadze, osiandɛ nna ber nnyi hɔ dɛm mber no mu a wɔdze bedzi hɔn asɛm.

20 Na etuatsewfo no a wɔaka no ammpɛ dɛ wɔbɛma wɔdze nkrantsee etwitwa hɔn egu famu, ntsi wɔpeen do dɛ wobedzi ahotɔ mfrankaa no do, na wɔhyɛɛ hɔn ma wɔdze ^aahotɔ mfrankaa sisii hɔn abantsentsen do, nye hɔn nkuropɔn mu, na wɔfaa akodze dze bɔɔ hɔn man ho ban.

21 Na dɛm na Moroni yɛe dze siiw dɛm ahensifo no hɔn ano, na dɔm no mu biara nnyi hɔ bio a wɔfrɛ hɔn ahensifo bio; na dɛm so na ɔdze siiw hɔn a wɔse wɔyɛ adehye no hɔn ahantanyɛ nye hɔn asokyew ano; na mbom ɔmaa wɔbrɛɛ hɔnho adze dɛ mbrɛ hɔn enuanom nkaa no tse ara pɛr, ama wɔaakõ akokodur mu dze agye hɔn fahodzi efi nkowaasom mu.

22 Hwɛ, ɔbaa dɛ ber a ^aMoroni gu do risiw akõkoekõ na wentwiwentwi a ɔwɔ nankasa no dɔm no mu ano, na ɔdze hɔn rokɔ asomdwee nye enyibue mu, na ɔreyɛ nhyehyɛɛ a wɔbɛfa do dze ayɛ ahomboaboa nye Lamanfo no akɔkõ no, hwɛ, nna Lamanfo no aba Moroni asaase a ɔda mpoano afamu no do.

23 Na ɔbaa dɛ nna Nephifo no a wɔwɔ Moroni kurow mu no hɔnho nnyɛ dzen, dɛm ntsi Amalickiah paam dɔm no na okum hɔn mu pii. Na ɔbaa dɛ Amalickiah faa kurow no, nyew, ɔfaa hɔn abantsentsen a wɔdze abɔ hɔnho ban nyina.

24 Na hɔn a woguanee fii Moroni kurow mu no baa Nephihah kurow mu; na dɔm a wɔwɔ Lehi kurow mu no so boaboaa hɔnho, na wosiesiee hɔnho yɛɛ krado tweɔɔn Lamanfo no.

25 Mbom ɔbaa dɛ Amalickiah amma kwan mma wɔannkɔ Nephihah kurow mu annkɔkõ, na mbom ɔmaa wɔtsenaa mpoano hɔ, na ogyaa nyimpa wɔ kurow biara mu dɛ wɔnhwɛ do na wɔmbɔ ho ban.

26 Na ɔkɔr do dɛmara dze faa nkurow pii, Nephihah kurow, nye Lehi kurow, nye Morianton kurow, nye Omner kurow, nye Gid kurow, nye Mulek kurow, iyinom nyina deda mpoano afamu.

27 Na dɛm na Amalickiah nam ne ndaadaa do ma Lamanfo a wonntum nnkan hɔn no nsa kãa nkurow pii, na dɛm nkurow yi nyina, Moroni ^agyee ban a ɔyɛ dzen dze bɔɔ ho ban; na dɛm ban yi nyina mu na Lamanfo dze yɛɛ hɔn sumabew.

28 Na ɔbaa dɛ wosii mu kɔr Dzifuu asaase do, na wɔpaam Nephifo no wɔ hɔn enyim na wokunkum hɔn mu pii.

29 Mbom ɔbaa dɛ wɔnye Teancum no a ^aokuu Morianton no na odzii no dɔm enyim nye hɔn guanee no hyiae.

30 Na ɔbaa dɛ otwaar Amalickiah so kedzii n’enyim, ber a ɔnye no nsordaafo nam dɛ wɔrokɔ akɛfa Dzifuu asaase nye asaase so a ɔda etsifi afamu no.

31 Mbom hwɛ n’abaw gurae, ber a ohyiaa Teancum nye no dɔm no osiandɛ wɔyɛ akofo mapã; na Teancum ne nyimpa kor biara n’ahoɔdzen so sen Lamanfo hɔn ahoɔdzen nye hɔn ɔkõ ho nyimdzee koraa, na iyi maa hɔn nsa daa Lamanfo no do.

32 Na ɔbaa dɛ wɔtseetsee hɔn na wokum hɔn araa kesii dɛ sum hyɛe. Na ɔbaa dɛ Teancum nye no dɔm no sisii hɔn ntamadan wɔ Dzifuu asaase no kurotsia hɔ; na Amalickiah so sii ne ntamadan wɔ mpoano afamu, na dɛm kwan yi do na wɔnam dze paam hɔn.

33 Na ɔbaa dɛ ber a adze sãe no, Teancum nye n’akowaa wiaa hɔnho kɔr Amalickiah ne nseraban hɔ; na hwɛ, nna nda afa no osiandɛ nna ɔafona ara yie osian berɛ a ɔaberɛ nna da no mu hyew ntsi.

34 Na ɔbaa dɛ Teancum wiaa noho bɔkɔɔ kɔr ɔhen no ne ntamadan mu, na ɔdze pea wɔɔ n’akoma mu; na okum ɔhen no ntsɛmara ma oennyan no nkowaa no.

35 Na ɔsaan n’ekyir bio nsumaamu kɔr ne nseraban hɔ, na hwɛ, nna no nkorɔfo no adeda, na onyaan hɔn na ɔkãa dza ɔayɛ nyina kyerɛɛ hɔn.

36 Na ɔmaa no nsordaafo no yɛɛ krado, ama sɛ Lamanfo no nyan na wɔba hɔn do a wɔnye hɔn akõ.

37 Na dɛm na afe eduonu enum wɔ ber a atsɛmbuafo hwɛ Nephi no nkorɔfo do no dze baa ewiei, na dɛm so na Amalickiah ne nda dze baa ewiei.