1 Me ^ababanyin, tsie me nsɛm; midzi nsew kyerɛ wo dɛ, mbertsentsen a ibedzi Nyankopɔn ne mbrasɛm do no ebɛyɛ prɔmprɔm wɔ asaase yi do.

2 Mepɛ dɛ eyɛ dza meyɛɛ na ekaa hɛn egyanom hɔn ndɔmmum no; osiandɛ wɔkɔr ^ankowaasom mu, na obiara enntum anngye hɔn gyedɛ ^bAbraham ne Nyankopɔn, nye Isaac ne Nyankopɔn, nye Jacob ne Nyankopɔn no nko; na nokwar, ɔgyee hɔn fii hɔn amandzehu mu.

3 Na afei, O me babanyin Helaman, hwɛ, ewɔ wo mberantsɛber mu, na dɛm ntsi, meserɛ wo dɛ tsie me nsɛm na sũa me; na minyim dɛ obiara a ɔdze no werɛ twer Nyame no ɔbɔboa no wɔ no ^ansɔhwɛ, nye n’amandzehu, nye n’akotorka mu, na ^bɔbɛma no do wɔ da a odzi ewiei no mu.

4 Na memmpɛ dɛ ebɔdwen dɛ mankasa na ^aminyim—nnyɛ honandua yi a, na mbom sunsum a, nnyɛ ^bhonam su adwen a, na mbom Nyame mu a.

5 Afei, hwɛ, mese wo dɛ, sɛ ^aNyame annwo me a nkyɛ ^bmurunnhu dɛm ndzɛmba yinom; na mbom Nyankopɔn edua no bɔfoe krɔnkrɔn no anomu ada dɛm ndzɛmba yinom edzi akyerɛ me, nnyɛ dɛ ^cmetsen ntsi a.

6 Na menye Mosiah ne mbabanyin kyinkyinii, peer dɛ ^ayɛbɛsɛɛ Nyankopɔn n’asɔr; na mbom hwɛ, Nyankopɔn somaa no bɔfoe krɔnkrɔn dɛ onsanka hɛn wɔ kwan mu.

7 Na hwɛ, ndze a ɔdze kasaa kyerɛɛ hɛn no tse dɛ sor robobɔ mu, na asaase nyina ^awosowee wɔ hɛn ananadze; na hɛn nyinara twitwae hwee famu, osiandɛ Ewuradze noho ^bsuro baa hɛn do.

8 Mbom hwɛ, ndze no see me dɛ: Soɛr. Na mosoɛree gyinaa hɔ, na muhun ɔbɔfo no.

9 Na ɔsee me dɛ: Sɛ ɔwo w’ankasa wɔbɛsɛɛ wo a, mma mmper bio dɛ ebɛsɛɛ Nyame n’asɔr no.

10 Na ɔbaa dɛ mohwee famu; na bɛyɛ ^anda ebiasa nye adzesaa ebiasa ntamu no nna munntum mmbue m’ano nna munntum mma me nsa na m’anan do.

11 Na ɔbɔfo no kãa nsɛm pii kyerɛɛ me a m’enuanom no tsee, na mbom emi manntse osiandɛ ber a metsee dɛm nsɛm yi—Sɛ ɔwo w’ankasa wɔbɛsɛɛ wo a, mma mmper dɛ ebɛsɛɛ Nyame n’asɔr no—suro na ahobow kɛse bi kãa me ma ɔyɛɛ me dɛ annhwɛ a wɔbɛsɛɛ me, dɛm maa mohwee famu na manntse hwee bio.

12 Mbom ^aonnyiewiei ahohyehye haaw me osiandɛ me kra dzii atseetsee kɛsenara na mo bɔn nyina haaw me.

13 Nyew, mekaa mo bɔn na m’emumuyɛ nyina, na iyi ho na hɛl ne yaw maa moho ^ahyehyee me ara yie; nyew, muhun dɛ matsew me Nyame do etua na dɛ menndzi ne mbrasɛm krɔnkrɔn no do.

14 Nyew, na medzii ne mba pii ewu anaadɛ magye hɔn akɔ ɔsɛɛ mu; nyew, ne sin ara nye dɛ nna m’emumuyɛ sõ ara yie, na dɛm ntsi Nyankopɔn n’enyim nkɔree ho adwendwen sunsuaan me kra mu pasapasa.

15 O, modween dɛ nkyɛ ^awobotum apam me ma m’ayew koraa me kra nye me nyimpadua nyina, amma wɔnye me ammba emmbegyina me Nyankopɔn enyim, ama oebu me atsɛn wɔ me ^bndzeyɛɛ ho.

16 Na afei, nda ebiasa nye adzesaa ebiasa mu na atseetsee sunsuaan me, mpo dɛ ɔkra a ^awoebu no fɔ no ne yaw.

17 Na ɔbaa dɛ ber a ahohyehye rusunsuan mo mu no, ber a mo bɔn pii ho adwendwen ^arehaw me no, hwɛ, mekae so dɛ metsee dɛ m’egya rehyɛ nkɔm kyerɛ dɔm no fa obi a wɔfrɛ no Jesus Christ a ɔyɛ Nyankopɔn ne Ba a ɔreba abɔbɔ werdam dze etua wiadze bɔn no.

18 Afei, ber a m’adwen twee dɛm nsɛm yi maa me no, musũi wɔ m’akoma mu dɛ: O Jesus, ɔwo a eyɛ Nyankopɔn ne Ba, hu me mbɔbɔr, emi a ^amehyɛ bɔwen wenwen mu; na ^bowu ne daapem nkɔnsɔnkɔnsɔn etwa moho ehyia no.

19 Na afei, hwɛ, ber a modween dɛm no, mannkaa me yaw no bio; nyew, mo bɔn ho adwendwen no ^aannhaaw me bio.

20 Na ao, ebɛn ^adɛw nye yi, na ebɛn kan nwanwa na muhunii yi; nyew, dɛw mbordo a ɔtse dɛ me yaw no pɛpɛɛpɛr hyɛɛ me kra mã!

21 Nyew, mese ɔwo, me babanyin dɛ biribiara nnyi hɔ a ɔbɛyɛ yaw kɛse tse dɛ me yaw no. Nyew, na mese wo bio, me babanyin, dɛ biribiara so nnyi hɔ a ɔbɛyɛ dɛw kɛse tse dɛ m’enyigye no.

22 Nyew, ɔyɛ me dɛ muhun adze a hɛn egya ^aLehi hunii no mpo, Nyankopɔn dɛ ɔtsena n’ahengua do a abɔfo mboano pii a wonntum nnkan hɔn etwa noho ehyia, na wɔrotow ndwom na wɔrotonton hɔn Nyankopɔn; nyew, na me kra pɛɛ dɛ ɔkɔ hɔ bi.

23 Mbom hwɛ, me nsa na m’anan nyaa ^aahoɔdzen bio, na mosoɛree gyinaa m’anan do, na medaa no edzi kyerɛɛ dɔm no dɛ ^bNyankopɔn awo me.

24 Nyew, na ofi dɛm aber no dze besi ndɛ mpo, mayɛ edwuma atoa do a menngyaa da, ama matwe akra aaba nnuho mu; ama medze hɔn aaba ma ^awɔabɔsɔ dɛw mbordo a masɔ ahwɛ no bi, ama hɔn Nyankopɔn aawo hɔn so, na Sunsum Krɔnkrɔn no ^baahyɛ hɔn mã.

25 Nyew, na afei hwɛ, O me babanyin, Ewuradze ama menya enyigye kɛse wɔ eduaba a mo dwumadzi asow no ho;

26 Na osian ^aasɛm no a ɔdze maa me no ntsi, hwɛ, Nyankopɔn nam do dze awo dodowara, na dza mosoɛe hwɛɛ no, hɔn so wɔasɔ ahwɛ, na wɔdze hɔn enyiwa ehu dza meehu; dɛm ntsi wonyim dɛm ndzɛmba yinom a maakã ho asɛm dɛ minyim yi; na dza minyim no fi Nyame.

27 Na ɔaboa me wɔ mo nsɔhwɛ nye ɔhaw biara mu, nyew, wɔ amandzehu ahorow nyina mu; nyew, Nyankopɔn eyi me efi efiadze, nye mpokyerɛ na owu mu; nyew, medze mo werɛ ahyɛ no mu, na ɔbɔkɔ do ^aagye me.

28 Na minyim dɛ ^aɔbɛma mo do wɔ da a odzi ewiei no mu, ma menye no aatsena wɔ ^benyimnyam mu; nyew, na mibeyi no ayɛw afebɔɔ, osiandɛ ɔdze hɛn egyanom efi Egypt ^caba, na ɔamemen ^dEgyptfo no wɔ Po Memen no mu; na ɔnam no tum do dze hɔn kɔr anohoba asaase no do; nyew, na oeyi hɔn efi nkowaasom nye ndɔmmum mu fi ber to ber.

29 Nyew, na ɔdze hɛn egyanom efi Jerusalem asaase do so aba; na ɔnam no tum a ɔwɔ hɔ daapem no do agye hɔn efi ^ankowaasom nye ndɔmmum mu fi ber to ber dze ebesi dɛm da yi mu so mpo; na daa mekaa hɔn ndɔmmum no; nyew, na wo so ɔsɛ dɛ ekaa hɔn ndɔmmum no, dɛ mbrɛ mayɛ yi.

30 Mbom hwɛ, me babanyin, nnyɛ ne nyinara nye iyi; na ɔsɛ dɛ ihu dɛ mbrɛ mehu yi, dɛ ^asusuampaara dɛ ibedzi Nyankopɔn ne mbrasɛm do no, ebɛyɛ prɔmprɔm wɔ asaase yi do; na mbertsentsen biara a innkedzi Nyankopɔn ne mbrasɛm do no, wobotwa wo efi n’enyim akyen. Afei dɛm na n’asɛm se.