Tamnei
Iteran te aomata ae maiu are iai i mwain bungiakina n te maiu n rabwata, e maeka i nanon te rabwata n ana tai n te maiu ae mamate, ao bon iai i mwin te mate ae ai aron te aomata ae kaokoroaki ni karokoa te Mangauti. Ni kabane bwaai aika maiu—botanaomata, maan, ao aroka—bon taian tamnei i mwain ae iai te bwai ae e maiu i aon te aonaba (KB 2:4–5; Mote 3:4–7). Rabwatan te tamnei bon titebo taraana ma te rabwata (1Nib. 11:11; Ita 3:15–16; R&B 77:2; 129). Te tamnei bon te bwai, ma e tamaroa riki ke e itiaki riki nakon te rabwata ke te bwai are e karikaki iai (R&B 131:7).
Aomata ni kabane bon natin te Atua te mwaane ke te aine, ae e tia ni bungiaki bwa te tamnei nakoia Kaaro i Karawa i mwain ae bungiaki nakoia kaaro n te maiu n rabwata i aon te aonaba (Ebera 12:9). Aomata n tatabemania i aon te aonaba iai rabwatana n tamnei ae aki mamate ni ikotaki ma te rabwata ae te iriko ao te ri. N aron ae kamatataaki n tabetai ni koroboki aika tabu, te tamnei ao te rabwata ni ikotaki a karika te aomata (KB 2:7; R&B 88:15; Mote 3:7, 9, 19; Abe. 5:7). Te tamnei e kona ni maiu n akea te rabwata, ma te rabwata e aki kona ni maiu n akea te tamnei (Iakobo 2:26). Te mate n rabwata bon maenakon te tamnei man te rabwata. N te mangauti, te tamnei e na manga ikotaki ma te rabwata naba arei ae te iriko ao te ri are e bwainna n te maiu ae mamate, ma iai uoua kaokorona aika korakora: a na aki manga maenako, ao te rabwata e na riki n aki mamate ao ni kakororaoaki (Aram. 11:45; R&B 138:16–17).