Nibwaai, Natin Nibwaai, Natin Ereman

Te boki ae koreaki iroun Nibwaai, are natin Nibwaai, n Ana Boki Moomon. Mwakoro 1–10 e kaota kakoroan nanon taetae ni burabeti i aon rokon te Uea. E kaotaki te kanikina ibukin bungiakin Kristo; a raira nanoia aomata; ma a manga okira ae buakaka. N tokina, angibuaka, rurun aon te aba, angibuaka aika rangi ni korakora, ao te uruaki ae korakora e kaota maten Kristo. Mwakoro 11–28 e koreaki iai rokon Kristo n aban America. Aio bon boton te boki ae te 3Nibwaai. A mwaiti Ana taeka Kristo aika titebo ma Ana kabwarabwara ake a koreaki n te Baibara (te katooto, Mat. 5–7 ao 3Nib. 12–14). Mwakoro 29–30 bon ana taeka Moomon nakoia botanaomata ni boong aika kaitira.

Te boki aio bon ti abwi ma ruaiwa kibuna, aika bane n teuana te mwakoro, ma e rinanon ae kania tenibubua ririki n rongorongoia ngkoa Nibwaite (34–321 N.K.). A mwaiti rooro aika taan koroboki, ni ikotaki ma Nibwaai, ake a karekea kanoan te rekoti. Kiibu 1–19 e taekinna bwa i mwin kawarakia iroun Kristo are tia ni mangauti a bane n rairaki Nibwaite ao Reimwanaite nakon te euangkerio. Te raoi, te tangira, ao te mweraoi e tautaeka. Nibwaite ake teniman ake reirei, are e tia ni kariaia Kristo bwa a na tiku i aon te aonaba ni karokoa Kauaokina (3Nib. 28:4–9), a mwakuri ni ibuobuoki nakoia aomata. Nibwaai e katuka te rongorongo nakon natina ae Amota. Kiibu 19–47 bon rongorongon ana mwakuri ni ibuobuoki Amota (84 ririki) ao natina naba are Amota (112 ririki). N 201 N.K., te kamoamoa e a moanna ni kariki kaangaanga i buakoia aomata, ake a kakaokoroia nakon karinan ao a moanaki ekaretia aika kewe ibukin karekean te raka (4Nib. 1:24–34).

Kabanean kiibu n 4Nibwaai a kaotia bwa aomata a manga oki nakon te buakaka (4Nib. 1:35–49). N 305 N.K., Amota are natin Amota e mate ao tarina ae Amaron e karabai ni kabane rongorongo aika tabu ibukin kawakinaia. I mwina Amaron e katuka te mwioko iroun Moomon ibukin rongorongo, are e koroi mwiin baika bati aika riki n oin maiuna ao i mwina e kakimototoi (Moom. 1:2–4).