Auti n Nebo

Te tabo ni botaki ae kabonganaki ibukin botakin te aro. Ni bongin te Nu Tetemanti, bwain nanona a aki bati, bwa kanoana te ake are a mena i nanona ninira ibukin te tua ao koroboki riki tabeua aika tabu, te taibora ni wareware, ao kaintekateka ibukiia taan taromauri.

A tararuakii auti n nebo n tatabeua nako iroun te kauntira n unimwaane n te tabo. A baireia bwa antai ae e na riai n rin ao antai ae e na katinanikuaki (Ioane 9:22; 12:42). Te tia mwakuri ae te kabanea ni kakannato bon te tia tautaeka n te auti n nebo (Mar. 5:22; Ruka 13:14). Bon te tia koroboki n angin te tai ae e tararua te kateitei, ao e tararua aron te botaki n taromauri. Te tia ibuobuoki e karaoi ana mwakuri te kiraaka (Ruka 4:20).

Bon iai te auti n nebo ni katoa kaawa are a maeka iai Iutaia, i Bwaretain ao n tabo nako. Aio bon te buoka ae korakora ni kabutan ana euangkerio Iesu Kristo ibukina bwa mitinare n te Ekaretia n taai ake ngkoa a bon kona n taetae n taian auti n nebo (Mwak. 13:5, 14; 14:1; 17:1, 10; 18:4). Bon iai naba te waaki naba aei i buakoia mitinare n Ana Boki Moomon (Aram. 16:13; 21:4–5; 32:1) ni ikotaki naba ma moan mitinare n te mwioko n tararua aei (R&B 66:7; 68:1).