Iobi

E ngae ngke te boki bon taekan rawawatan Iobi, e aki kaeka raoi te titiraki are tera bukina ngkai Iobi (ke te aomata riki temanna) e kona ni karawawataki n te maraki ao buan ana utu ao ana bwai. Te boki e kamatata bwa reken te karawawataki irouna tiaki nanona bwa te aomata anne e a tia ni bure. Te Uea e kona ni kamanena te karawawata ibukin karekean te atatai, tauan arom, ao reirei ni ikotaki naba ma te tuaa (R&B 122).

Te boki e kona n tibwauaki nakon aua mwakoro. Mwakoro 1–2 bon te kabwarabwara nakon te karaki. Mwakoro 3–31 e taekini maroro aika reitinako i marenan Iobi ao teniman raona. Mwakoro 32–37 kanoana bon ana maroro Eriu, raona are te kaaman, are e kabuakaka Iobi ibukin bwaai riki tebeua ae kaokoro bukina ma are irouia raona ake teniman. Mwakoro 38–42 bon motin te boki ma kakoauana nakon Iobi bwa wakina ni te maiu e bon tamaroa mai moana.

Ana boki Iobi e reirei bwa ngkana e eti ana atatai te aomata iroun te Atua ao e maiuakina te maiu are butimwaeki iroun te Atua, e na kona n teimatoa rinanon kataki are a roko irouna. Ana onimaki Iobi ae aki bwabwaka e kaotaraeaki n aekan taeka aikai: “Ngkana tao E kamateai, ao I a bon kantaningaia naba” (Iobi 13:15). Iobi e taekinaki naba n Etekiera 14:14; Iakobo 5:11; Reirei ao Berita aika Tabu 121:10.