Tamuera, Burabeti n te O Tetemanti
Natin Erekana ao Anna, Tamuera e bungiaki ni kaekana ana tataro tinana (1Tamu. 1). Ngke e ataei e katukaki n ana tararua Eri, te ibonga ae rietata n te mwaneaba i Tiro (1Tamu. 2:11; 3:1). Te Uea e wetea Tamuera ngke te ataei bwa e na riki bwa te burabeti (1Tamu. 3). I mwin maten Eri, Tamuera e riki bwa te burabeti ae kakannato ao te tia moti i Iteraera ao e manga kaoka te tua, te rau, ao te taromauri n aaro ae teimatoa n te aba (1Tamu. 4:15–18; 7:3–17).
1Tamuera 28:5–20 kanoana bon taekan Tamuera ngke e kaokaki man te mate iroun te ibong n aine i Entora n ana bubuti te Uea ae Tauro. Tiaki aei te mii ni burabeti mai iroun te Atua, ibukina bwa te ibonga n aine ke tabeman riki ake a mamata anti irouia a aki kona ni kaira te burabeti bwa e na kaoti n ana bubuti teuanne ke neienne.
Boki 1 ao 2 n Tamuera
I nanon Baibara tabeua, boki 1 ao 2 n Tamuera bon ti teuana ni boki. Ni booki tabeua bon uoua booki. Booki a rinanon te tai ae kania 130 te ririki, man bungiakin Tamuera ni karokoa mwain raoi maten te Uea ae Tawita.
Boki 1 n Tamuera
Mwakoro 1–3 e kabwarabwara bwa te Uea e kamaraia ao e katuaea ana utu Eri ao e wetea Tamuera bwa te ibonga ae rietata ao te tia moti. Mwakoro 4–6 e taekinna bwa e kanga n reke te ati ni berita i nanon baia I-Biritia. Mwakoro 7–8 e koreaki iai ana kauring Tamuera ibukin karekean atua ni kewe ao te uea ae buakaka. Mwakoro 9–15 e kabwarabwara kaueakin Tauro ao ana tautaeka ngke e uea. Mwakoro 16–31 e taekina rongorongon Tawita ao karekean mwaakana—Tamuera e kabira Tawita are e tia n tiringa Koria. Tauro e riba Tawita, ma Tawita e rawa n tiringa Tauro e ngae ngke e reke ana tai ni karaoia.
Boki 2 n Tamuera
Kanoan te boki bon taekan ana tautaeka Tawita ngke e Uea i Iuta ao n tokina i aon Iteraera ni kabane. Mwakoro 1–4 e kaota te bobuaka ae abwabwaki i marenaia taan irira Tawita, i mwiin kaueana iroun Iuta, ao taan irira Tauro. Mwakoro 5–10 e kaota aron reken mwaakan Tawita ni kabuta aaba aika bati. Mwakoro 11–21 e kaota kekerikakin korakoran Tawita n te maiu n tamnei ibukin ana bure nako ao te kakaitaara i nanon oin ana utu. Mwakoro 22–24 e kabwarabwara aron Tawita ni kataia bwa e na tangiraki iroun te Uea.